ازاى تبقى انسان موسوعي فاهم فى كل حاجة .. وهل ينفع اصلا ؟!

.
السؤالين دول بتسئلهم دايما .. فخلينا نجاوب على السؤال التاني الاول .. هل ينفع ؟ اه ينفع لكن فيه ملاحظة هامة ..
فيه فرق بين العلم والثقافة ..
علم يعني تخصص .. يعني دراسة اكاديمية وخطة تعلم منتظمة .. اما الثقافة فهى علم بالقشور غالبا بيتم تحصيلها بشكل عشوائي ..
.
الخطر بقى انك تخلط بين المفهومين .. وتعتبر الثقافة اللى عندك علم وتبدأ تجادل اهل التخصص او تجتهد فى استنباط احكام ونظريات .. حاجة كدا مثلا زى الملتزمين زمان ايام شرايط الكاسيت .. تلاقى الواحد عنده مكتبة فيها 100 شريط كاسيت ( مكتبتى كانت اكتر من 500 شريط ) لكن فى الاخر لو حفظ كل اللى فيهم عن ظهر قلب مينفعش نقول عليه شيخ .. هو حصل ثقافة بشكل عشوائي مش علم ..
.
طيب يعني كدا المهندس مثلا مينفعش يكون على علم بتخصص تاني ؟!
ينفع يبقى على علم بتخصص واتنين وتلاتة .. المهم يدرسهم بشكل نظامي او اكاديمي .. دا الفيصل ..
.
طيب حد اتكلم فى النقطة دى قبل كدا.. وفيه حد جمع بين كل العلوم ؟
اه فيه كتير جمعوا بين العلوم الشرعية والطب والهندسة والفلك و الرياضيات و الفلسفة والجغرافيا .. كتير جدا ..
البيروني مثلا .. كان فيلسوف و فلكي وجيولوجي وجغرافي ورياضي وصيدلي و رحالة و مؤرخ ومترجم ( اعمل سيرش عنه وانبهر اكتر واكتر ) .. ومصطلح (( موسوعي )) اصلا اختراع يوناني كان بيتصف بيها علماء المسلمين فى العصر الذهبي وعصر النهضة للاسلام .. لان الطبيعي وقتها ان علماء المسلمين كانوا دايسين فى كل حاجة ..
ابن خلدون (( اللى لسة ميت من 600 سنة )) اتكلم عن ( تحقيق التكامل المعرفي ) .. وكان يقصد الالمام بكل العلوم وقالك دا ممكن بشرط تبسيط العلوم؛ وقال ان اللى صعب الموضوع دا فى زمانه كثرة المؤلفات وتشعب المصطلحات وبالتالى تشتت المتعلم .. ومع ذلك فهو وارد ..
.
.
طيب ازاى تبقى موسوعي ؟
لو تقصد موسوعي (( علما )) فكدا انت محتاج تدرس بشكل نظامي زى ما اتفقنا وتنتقل من تخصص لتخصص .. وبصراحة منصحكش بكدا .. كفاية تجمع بين فنين او تلاتة .. الهندسة .. العلوم الشرعية .. علوم الادارة .. دى توليفة ذهبية للمهندسين .. هتحاول تضيف طب و فلسفة و كيمياء وفيزياء .. هتلبس فى الحيط .. انت اساسا كنت شايل فيزياء فى اعدادي هندسة ومخبي على ابوك ..
ولو تقصد موسوعي ( ثقافة ) وهو دا الصح والسهل والممتع .. تطبيقا لمبدئى الشخصي فى الحياة ( اعرف حاجة عن كل حاجة .. واعرف كل حاجة عن حاجة ) .. فعليك بقراءة كتب تبسيط العلوم للعوام فى كل فرع .. مثلا لو حد ميعرفش حاجة عن الهندسة الالكترونية وحمل كتابى اللى نزلته فى البوست اللى فات .. في خلال اسبوع هيفهم اللى مستحيل يفهمه لو جاب كتب هندسة وقرأ فيها بنفسه لمدة شهور .. كتب فى السيرة زى الرحيق المختوم .. كتب فى التاريخ زي مختصر تاريخ العالم لارنست جومبريتش .. سلسلة وثائقيات هياكل عملاقة هتعرفك عن الهندسة المدنية .. إلخ ..
.
بمداومة العمل على زيادة رصيدك الثقافى من العلوم المختلفة هتحس انك انسان تاني .. هتكتشف نفسك من جديد وتعرف انك اكبر بكتير من الصورة اللى كنت متخيلها فى ذهنك .. طريقة تفكيرك تجاه حياتك عموما هتتغير بشكل اسطوري .. المهم متقعش فى فخ الخلط بين العلم والثقافة ..