أهم نواقل القدرة و تطبيقاتها

احتراما لوقتك البوست هياخد منك دقيقة

.
1- الجنزير : يستخدم فى السيور الناقلة .. نقل العزوم العالية بسرعات منخفضة نسبيا.. مش مناسب لو انت محتاج دقة عالية فى نقل الحركة ..
2- السيور حرف v : بتستخدم عادة لنقل القدرات المتوسطة من المواتير من خلال طنابير ( Pulley ) .. ومينفعش تستخدمها لو محتاج دقة عالية فى نقل الحركة.
3- السيور المسننة Timing belts : ودي بتستخدم لو محتاج دقة فى نقل الحركة زى سير كاتينة العربية و سيور ماكينات الليزر والكتر بلوتر .. بتوفرلك سرعة عالية جدا فى نقل الحركة لكن مينفعش تستخدمها مع العزوم الكبيرة.
4- السيور الدائرية : ودي وظيفتها الاهم هى انك تنقل محور الحركة بزاوية عادة بتكون 90 درجة .. في حين ان السيور التانية بتشتغل فى نفس المستوي.
5- الجريدة المسننة : ودى تقدر تستخدمها فى سرعات فوق المتوسطة مع عزوم كبيرة .. مناسبة لماكينات البلازما والراوتر و الفرايز.. لكن دقتها مش اعلى حاجة ممكن توصلها.
6- التيش .. او فتيل القلاووظ : الانواع التقليدية منه بتديك دقة عالية فى البداية مع سرعة منخفضة جدا بتوازيها عزوم رهيبة .. فيه منها خطوة مثلثة و مربعة و اكمي .. مشكلتها انها بتتآكل بمرور الوقت وبتواجهنا مشكلة مع الباك لاش .
7- البول سكرو : هو تيش لكن بتصميم مختلف .. بناخد منه حركة قوية بعزوم كبيرة جدا .. دقة اعلى من اى حاجة تانية .. سرعة منخفضة لكن فى نفس الوقت عمره الافتراضى طويل جدا و تصميمه بيخليه فى مأمن من مشكلة الباك لاش مستقبلا.
8- التروس : بأنواعها الكتير بنلاقيها تقريبا بتشتغل فى كل العزوم والسرعات اللى ممكن نتخيلها وحتي فى مهام وظيفية مختلفة.. وطبعا هى العنصر الاساسي فى اى صندوق تروس.
9- الواير الصلب : بيكون عبارة عن ضفيرة من اسلاك الصلب الرفيعة جدا .. بتديله متانة رهيبة .. بيستخدم فى الاسانصيرات و المهمات البحرية وغيرها .. مش مستخدم بشكل واسع فى نقل الحركات الدقيقة مع ان فيه ميكانيزمات بتوفرله الميزة دى.
.