وصلنا الحلقة اللى فاتت لهجرة سيدنا لامك و انجابه نوح .. هنأجل الكلام عن نوح للحلقة الجاية بإذن الله وربما نقعد 3 حلقات نحكي فى حكايته وهنخصص الحلقة دى لفكرة الطوفان العظيم فى الحضارات المختلفة ..

نبدأ بالحضارة السومرية القديمة .. الحضارة دى كانت مستوطنة جنوب العراق .. وبدأت بيها خصيصا لإن أقدم أثر بيحكي حكاية الطوفان العظيم هو أثر سومري .. الاثر دا عبارة عن لوح من الحجارة مدون عليه جميع عناصر حدوتة الطوفان العظيم وعمره 4500 سنة .. مشكلة اللوح دا انه كان مشوه بشكل بشع .. مفيش غير فقرتين بس اللى ظاهرين فيه والباقى صعب جدا قراءته .. الفقرة الاولى بتقول ان كان فيه ملك كاهن ( دولة ثيوقراطية .. راجع الحلقة الخامسة ) .. الملك دا كان اسمه زيوسودرا السومري .. فى احد الليالى نام زيوسودرا وشاف حلم عجيب اوى .. سمع صوت ملك الألهة بيكلمه من خلف جدار وبيقوله ان مجلس ادارة الالهة اجتمع والالهة قررت افناء الحياة من على وجه الارض .. دى الفقرة الاولى ومن بعدها الكلام كان متكسر ومتشوه وبعدين جت الفقرة التانية بتقول ان زيوسودرا صنع سفينة ضخمة ضم ليها مجموعة من البشر و زوجين من كل صنف من الحيوانات وبعدين حصل الطوفان .. بعد 7 ليالى و 7 ايام تجلى إله الشمس واشرقت الشمس من جديد فراح عمك زيوسودرا عامل فتحة فى سقف السفينة علشان شعاعها يدخل .. وبمجرد ما دخل شعاع الشمس خر زيوسودرا ساجدا وشكر إله الشمس على نعمته عليه .. إله الشمس دا كان خبّاص اوى ومبتتبلش فى بقه فوله .. رجع لباقى الألهة وقالهم إلحقوا يا ألهة فيه ناس نجت من الطوفان العظيم .. وعلى عكس المتوقع فرحت الألهة جدا بكدا لإنهم بعد ما ابادوا الحياة على وجه الارض ندموا .. ماهو مفيش حد هيعبدهم بقى .. و بعدها وهبوا لزيوسودرا الحياة الابدية على سبيل المكافأة ..

البابليين بقى أضافوا شوية بهارات على الاسطورة دى من عندهم .. فقالوا ان زيوسودرا دا كان له اسم تانى مش فاكره للاسف ومش مسجله عندى .. وان كبير الألهة ( آنو ) هو اللى ضحك على باقى الالهة وراح من وراهم كلم زيوسودرا فى الحلم وقاله يعمل سفينة ضخمة ويجمع فيها كل الذهب والفضة و امهر الحرفيين وزوجاتهم و من كل نوع من الحيوانات زوجين .. وقام الطوفان .. فكل الألهة اتخضت .. منظر الطوفان كان مهيب .. والألهة كانت كيوت خالص وبتخاف .. فهربوا من الارض وفضلوا يطلعوا يطلعوا لحد ما استخبوا فى السماء السابعة .. حيث ملك الالهة ( آنو ) .. يعنى من الاخر راحوا لحضن مامتهم ..

بعدها طلعت الإلهة ( عشتار ) وفضلت تعيط وتصوت وتنوح وتكاكي .. الإلهة عشتار دى هى إلهة المزز فى الحضارة البابلية القديمة .. صعبت عن كبير الألهة ( آنو ) اللى كانت نقطة ضعفه التاء المربوطة .. فقرر ميطولش الحوار اكتر من كدا .. فأمر إله الارض انه يفتح أفواه السهول ( حاجة كدا زى البلاعات عندنا ) .. وأمر إله الشمس انه يرسل الشمس لتشرق مرة تانية .. و أمر إله الريح انه يدفع الماء الى مناطق معينة ليظهر اليابسة ويوقف الاعاصير .. وبذلك نجي زيوسودرا ومن معه فى السفينة وسجد امام بعض الألهة ونال الحياة الابدية ..

تعالوا بقى ننتقل لحضارات مختلفة شوية .. بعيدة جغرافيا عن الحضارات اللى سكنت العراق .. هنتكلم عن الحضارة الاغريقية .. كانت برضو عندهم قصة مشابهة عن الطوفان العظيم ..

بدأت القصة عند الملك زيوس كبير الآلهة .. البشر بقوا يعملوا حاجات كتير مش ظريفة وقل احترامهم للالهة .. فبعتلهم انذرات متعددة .. مرة واتنين وتلاتة .. الراجل مقصرش .. ومع ذلك عناد البشر كل يوم كان بيزيد .. إلا اتنين من البشر .. اجتمعوا على الطاعة واتجوزوا وعاشوا قصة حب ظريفة فى معابد الألهة وطول الوقت كانوا بيخدموهم .. اسمهم ديوكاليون و بيرا .. حاول زيوس يصلح من البشر مرات عديدة لكن بلا جدوى .. فجمع الالهة وعمل اجتماع وقالهم انا جبت اخرى من البشر فعايز اولع فى الارض باللى فيها .. رفضت الألهة التانية فكرة زيوس لإنها هتضيع ملك الألهة .. انت دلوقتى لما تحرق الارض باللى عليها مش هتلاقى اى مظهر من مظاهر الحياة يعبدك و ينصاع لاوامرك .. يعنى هنبقى آلهة عاطلين والايد البطالة نجسة .. احنا نغرق الارض وبكدا نقضى على كل البشر و الحيوانات لكن هيتبقى عندنا الأسماك والكائنات البحرية تفضل تعبدنا وكدا .. عجبته اوى الفكرة واتفقوا فعلا على كدا .. ولما جه وقت التنفيذ زيوس الحبوب قلبه رق .. ديوكاليون وبيرا .. ذنبهم ايه ؟؟ دول عاشوا طول عمرهم بيعبدوني وبيخدموني !! فراح مكلمهم وقالهم اعملوا صندوق خشب واقعدوا فيه .. وبعدها أمر الانهار انها تجرى والبحار تثور و الرياح تدور .. فحدث الطوفان العظيم والمية غطت كل شىء.. فكنت بتلاقى الاسماك متعلقة فوق اغصان الاشجار .. والحيتان بتتسلق اعالي الجبال .. وانتهى الحياة البرية من على وجه الارض تماما ما عدا ديوكاليون و زوجته الجميلة بيرا .. الصندوق الخشبى اللى قعدوا فيه حملهم فوق المية و استقر بيهم فوق سطح جبل مهيب .. كان المنظر بشع اوى .. اكيد شوفتم قبل كدا فيديوهات لتسوماني على يوتيوب .. دى كانت ولا حاجة بالنسبة للطوفان العظيم .. فكانت بيرا طول الوقت بتعيط .. ديوكاليون بيحتضنا وجسمه بيرتعش من رهبة اللى شافه .. فصعبوا على زيوس .. فأمر زيوس إله البحار ( بوسيدون ) بإنه يسحب المياه تاني .. بعدها الأرض بدأت تجف وبعدين طلع الإله ( أبوللو ) بعربيته الذهبية الشبيهة بعربة بابا نويل وطار بيها فى الافق فأنبتت الارض مرة تانية وازهر الزهور ..

يوم ورا يوم الزوجين الاتقياء اتخنقوا من الوحدة .. عايشين لوحدهم بدون رفقاء ولا جيران ولا اهل ولا اى حاجة .. فأكثروا من الصلاة وتضرعوا الى زيوس علشان يخلصهم من الوحدة .. تقبل زيوس ابو قلب كبير صلاتهم ودعائهم .. واوحى ليهم بـ (( اخرجا من معبدى وضعا على رأسيكما غطاء وتخففا من الاحزمة التى تشد ثيابكما و اقذفا خلفكما من عظام أمكما الجليلة )) .. فنزلوا من المعبد اللى على قمة الجبل الى الوادي .. ولبسوا زنط على دماغهم و فكوا الاحزمة الجميلة اللى كانت الستات بتلبسها زمان علشان متطلعش الكروش المعفنة اللى بنشوفها اليومين دول ( زى نطاق ستنا اسماء بنت ابى بكر ) .. وبعدين قعدوا يفكروا .. ايه عظام امكما الجليلة دى ؟؟ نجيبها منين ؟؟ وبعدين حلوا اللغز وفهموا ان امهم الجليلة هى الارض mother earth .. والعظام بتبقى مدفونة تحت اللحم .. فحفروا الارض و طلعوا حصوات مدفونة .. هى دى بقى عظام امهم الجليلة .. ومشيوا فى الوادى .. الزوجين جنب بعض .. وكل خطوة يرموا وراهم حصوة .. الحصوة اللى كان بيرميها ديوكاليون كانت بتتحول لراجل .. والحصوة اللى كانت بترميها بيرا كانت بتتحول لامرأة .. وبذلك اتولدت حياة جديدة للجنس البشرة على سطح الارض .

هكتفى بالحواديت اللى قولتها دى بالرغم ان فيه غيرهم كتير لكن كلهم بيصبوا فى نفس الموضوع .. وهتكلم عن نقطة تانية .. ازاى الطوفان العظيم موجود فى كل ثقافات الحضارات القديمة ؟ الاجابة بسيطة جدا

1- لانه حصل فعلا وفقا لعقيدتنا كمسلمين .. وكمان نوح جد البشر كلهم .. جد البابلين وجد الاغريق وجد الفرس و جد الفراعنة .. فكل ثقافة اخدتها و فصلتها على مقاس معتقداتها .. وزى ما قولنا قبل كدا وارد جدا ان المؤرخين يكونوا اخطأوا فى اعتبار الملائكة آلهة .. فجعلوا الله كبير الالهة وجعلوا الملائكة الهة للبحار والحب و الحرب والهة مبلغين رسائل كبير الالهة .. إلخ

2- لانه حصل فعلا وفقا للابحاث العلمية .. ودى النقطة اللى هختم بيها حلقة النهاردة بإذن الله ..

فيه دراسات كتيرة جدا بتقول ان فيه طوفان عظيم حصل فى منطقة الشرق الاوسط من 7000 -9000 سنة .. منهم دراسة مشهورة جدا لجامعة كولومبيا بتقول ان حرارة الارض بدأت فى الارتفاع من 12000 سنة .. وبعد 5000 سنة انصهرت كميات ضخمة من الجبال الجليدية فزاد منسوب المياه فى البحر المتوسط بشكل غريب جدا .. ودا اللى سبب فيضانات كاسحة حصلت فى منطقة الشرق الاوسط ( خد بالك ان كل البشر كانوا بيسكنوا المنطقة دى اصلا ودا اللى قولناه فى الحلقات السابقة ) .. بعد كدا المية دى اتسربت لباقى المحيطات والبحار وعاد مستوى الماء مستقر مرة تانية بعد ارتفاع منسوب المياة فى البحار والمحيطات 2-5 متر نتيجة صرف مياة الطوفان فيها ..

والدراسات دى بتقضى على الخلاف الشرعي القديم ظاهريا .. الخلاف بين المفسرين فى هل الطوفان كان مغطي الكرة الارضية كلها ولا منطقة معينة منها اللى كان بيسكنها قوم نوح ؟

الراجح انها كانت بتغطى الكرة الارضية كلها لقوله تعالي (( فأنجيناه و من معه فى الفلك المشحون .. ثم أغرقنا بعد الباقين )) .. فالمفسرين اللى قالوا انها اغرقت الكرة الارضية كلها قالوا كدا لان الاية بتقول ان كل الناس غرقت ما عدا اللى طلعوا السفينة .. المفسرين التانيين قالولك لا الكلام دا مقتصر على قوم نوح بدليل ان السفينة اللى عملها مستحيل تشيل زوجين من كل الكائنات اللى فى الدنيا .. يا دوب تشيل زوجين من كل الكائنات اللى فى منطقته اللى بيسكنها بس .. طب وبالنسبة للنباتات نظامها ايه ؟؟ طب الحمامة جابت غصن الزيتون منين والارض كلها غرقانة ؟!!

فعلشان نوفق بين الكلام دا كله فهنقول انها كانت فى الشرق الاوسط بس .. وفعلا قضت على كل البشر ماعدا اللى على السفينة .. و قد يكون الاستنتاج دا صحيح وقد يكون خاطىء .. مش بقولكم قرآن انا ..