الانواع الـ 9 لاجنحة الطائرات الحربية (الجزء الاول)
Ahmed Aboul Fotouh
احتراما لوقتك البوست هياخد منك دقيقتين
.
اجنحة الطيارة هي المسئولة عن انجاز عملية الاقلاع والهبوط و تحقيق اتزانها و تمكينها من اعمال المناورة وكمان بيتم تحميلها بصواريخ ومقذوفات بأوزان كبيرة .. ودا السبب اللى مخليها الجزء الاصعب على فرق التصميم الميكانيكي للطائرات ..
.
عندنا 9 عائلات لاجنحة الطائرات .. ناخدهم واحدة واحدة ..
.
1- الاجنحة المستطيلة: ودى ابسط انواع الاجنحة واسهلها فى التصنيع لانها مفيهاش سلبات ولا انحناءات موديولية ولا تفاصيل معقدة .. كمان ميكانيزماتها بتكون بسيطة جدا جدا .. مع المميزات العظيمة دى بتفضل مشكلتها الكبيرة انها كفاءتها الايروديناميكية ضعيفة جدا .. مثال للعائلة دى طيارة pa-38 ..
.
2- الاجنحة البيضاوية: على عكس المستطيلة فدى صعبة جدا من ناحية التصنيع لكن بتتميز بكفائتها الايروديناميكية العالية جدا .. والسبب فى كدا الانحاء المثالى فى جسم الجناح ودا بيخليها تقدر تحقق اقلاع بأقل مجهود .. النوع دا من الاجنحة موجود فى طائرات Spitfire اللى احكمت السيطرة على سماء بريطانيا فى الحرب العالمية التانية .. وخلونا نقول ان تصميم الاجنحة دى بالاساس مكنش بهدف تقليل القوة اللازمة للاقلاع .. كان بهدف الحصول على جناح بأقل سمك ممكن بحيث نقلل من فرص اصابته بنيران الطائرات التانية..
.
3- الاجنحة المسلوبة: ودا نوع ظهر بعد النوعين الاول والتاني بهدف الجمع بين مميزاتهم .. نقدر نقول ان الاجنحة المسلوبة هى اجنحة مستطيلة لكن عملنالها سلبة مع مقاطع بيضاوية .. وبكدا نبقى حصلنا على كفاءة ايروديناميكية مرتفعة ( طبعا مش زى البيضاوية ) وكمان سهولة تصنيعها.. احد اشهر الامثلة للنوع دا الطيارة P-51 ..
.
4- الاجنحة المثلثة (الدلتا) : احد اعظم العائلات .. لانها ببساطة سهلة فى التصنيع .. عظيمة جدا فى المناورة .. مستقرة فى الملاحة بأطوارها التلاتة ( اقل من سرعة الصوت – بسرعة الصوت – كسر حاجز الصوت ).. بالنسبة لمواصفاتها الايروديناميكية فهي عظيمة جدا .. وكمان تصميم الاجنحة دى بيتيح اماكينة تحميل الطيارة بكمية اكبر من الوقود .. ودا معناه انها تقدر تسافر مسافات ابعد .. مشكلة العيلة دى ان طول الجناح بالنسبة لطول الطيارة صغير .. ودا معناه حاجتين .. انها بتبذل مجهود بشع عند اقلاعها .. وبتتحمل احمال ديناميكية بشعة عند هبوطها .. خاصة في حال السرعات المنخفضة نسبيا .. يمكن اشهر طائرات العيلة دى هي الميج21.
.
5- الاجنحة شبه المنحرفة : هتلاقى النوع دا منتشر فى المقاتلات الامريكية .. الجناح فيه بتحرك بمفاصل امامية وخلفية لمضاعفة تأثيره .. ودا بيخليها عظيمة جدا فى المناورات اللى بتتم بسرعات اعلى من الصوت .. احد اشهر انواع العيلة دي هى الطيارة F22 ..
.
.
