الأصل في العلوم الدنيوية اننا نحصل العلوم الشرعية المرتبطة بيها ..

فمثلا .. مينفعش محاسب ميبقاش عارف فقه المعاملات المالية اكتر من شيوخ لجان فتوى الازهر نفسهم ..

مينفعش طبيبة تجيلها واحدة تقولها هاخد حبوب منع حمل علشان تأخر الحيض واعرف احج .. ومتعرفش ان كان دا مباح وحجها صحيح ولا لا ..

مينفعش طبيب بيطري ميبقاش عارف احكام الاضحية والذبائح ..

العلوم الشرعية المرتبطة بالتخصص تحصيلها بياخد حكم ( فرض العين ) علي اهل التخصص .. .لكن لاننا – للاسف – اهملناها لابعد الحدود .. فبقى عندنا اللي بيجمع بين العلوم الشرعية والدنيوية كائن فضائي!!! مع انه مجرد ادى فرض واجب عليه .. زي الصلاة والصيام .. معملش حاجة زيادة .. وبقي عادي جدا تلاقي واحد يفتي بغير علم .. واحد ميعرفش ألف باء اقتصاد وبيصدر فتاوي متعلقة بالبنوك والعملات .. واحد ميعرفش ألف باء طب وبيصدر فتاوى متعلقة بزراعة الاعضاء …طلب العلم الشرعي المرتبط بتخصصك فرض عين زيه زي كل مسائل وافرع العلم الشرعي اللي محتاجها علشان تقيم عباداتك ..