مشروع التخرج الهدف منه انك تجيب امتياز .. فيتحط في الشهادة جنب التقدير الكلي ( اللى غالبا هيكون واقع ) فيديها شكل أفضل ..
لكن لازم تاخد بالك من كام حاجة .. اولا لما تيجي تختار المشروع :-
- اختار مشروع سهل.
- اختار مشروع في المجال اللى انت حابب تشتغل فيه.
- اختار دكتور معروف انه مش متعنت ومتعاون وبيدي امتيازات.
- اختار نص الجروب على الاقل برا الشلة.
- اختار مشروع مش مكلف.
هنركز مع بعض في المقال دا على اخر نقطة .. التكلفة
انت مش هتستفيد لما تعمل مشروع مكلف .. كدا كدا مش هتاخده وانت مروح .. وكدا كدا سعر المشروع مش عامل من عوامل تحديد التقدير! فوفر على نفسك يا هندسة .. وانا هساعدك بإني هرشحلك ارخص اماكن ومكونات في مصر لقطع غيار المشروع :
1- لو مشروعك فيه مواتير ستيبر كتير .. متشتريهاش .. هات مكنة تصوير خردة تمنها في حدود 1000 جنيه هتطلع منها كل المواتير والتروس والاكسات والبلي اللى محتاجه .. اشتريها من اسواق الخردة .. فيه في سوق الجمعة .. ولو مش كتير ممكن تشتريها من كتكوت في الوحدة او الرملي في روض الفرج.
2- لو مشروعك فيه مواتير دي سي .. سوق الجمعة كتكون الرملي .. وزود عليهم محمود بتاع قليوب ونزلتلك قبل كدا بياناتهم عناوين وتليفونات. بس كلمه الاول قبل ما تروح علشان تتأكد ان طلبك عنده.
3- حساسات الغاز .. انتشرت جدا الفترة الاخيرة .. لو مشروعك الهدف منه انك تشم غاز قابل للاشتعال فاستخدم سنسور MQ-2 سنسور جميل ولطيف وفعال وبيشم الغازات القابلة للاشتعال و الدخان وسعره لا يتجاوز 150 جنيه .
4- لو الهدف انك تحس بغازات سامة او طبية .. فعليك وعلى الحساسات الصيني غير المجمعة .. هي تعبانة وهتشتغل معاك شهرين تلاتة وتموت .. بس سعرها حلو جدا .. من اول 600 لحد 1000 على حسب نوع الغاز .. هتحتاج بس حد من التيم يكون فاهم كهرباء كويس علشان يجمعها مع بعض وتقدر تربطها باردوينو او البي ال سي .
5- حساسات الضغط .. مفيش اكتر منها عند ميكرز ورام وغيرهم .. سعرها بيبدأ من 60 جنيه .
6- حساسات الحرارة .. لو عايز حساس يفتح ويقفل عند الوصول لدرجة معينة هات مفتاح حراري في رام ب 30 جنيه .. لو عايز تحكم دقيق هات كنترول حرارة من نجيب الريحاني .. اسمه عداد حرارة هيعمل 250 جنيه.
7- تقطيع الليزر .. اوعى تروح تقطع شغلك لوحدك .. انت هتجمع شغلك وشغل الجروبات التانية وتقطعوهم مرة واحدة وتوزعوا التكلفة .. كدا هتوفر اكتر من نص التكلفة ومش هيبقى فيه هادر في الخامة وكمان تكلفة النقل هتتوزع على الكل .. الكلام دا لقطع المعادن مش الخشب ولا الاكريليك.
نصائح مهمة بخصوص الاتصالات اللاسلكية :-
- متستوردش بلوتوث او واي فاي او اي حاجة فيها القطعتين دول من على اكسبريس لانهم هيقفوا في الجمارك ويتعرضوا اتصالات وهتبقى حوار .
- متفكرش نفسك ناصح وتخلي التاجر يبعت بسعر مختلف علشان تدفع جمرك اقل .. انت كدا كدا جايب عينة .. فحتى لو مأخدتش اعفاء .. وحتى لو متقفشتش .. هتبقى حرامي .. مينفعش تبقى حرامي!!
- متعملش مشاريع درونز .. الجمارك مش هتدخل حاجتك .. ولو اشتريتها مهربة من السوق المحلي هتلبس مع الامن لإنك بتخالف القانون .
- لو مضطر لقطع غيار لاسلكية فلازم تبعت مع الشحنة كل اوراقها علشان لما تتعرض اتصالات الموضوع ياخد وقت أقل .. وتفهم دكتورك كدا علشان لو احتاجوا جواب من الكلية يصدره هو.
ربنا يوفقكم يا شباب وبعد كام شهر تبقى زمايلنا مش طلابنا
