الحلقة الثانية: الخطوات الاولى للانسان على وجه الأرض
انتهينا المرة اللى فاتت من الكلام عن الفترة اللى سبقت خلق الانسان الاول .. وقصة خلقه بإيجاز شديد لإننا كلنا عارفينها .. المرادى هنتكلم عن مرحلة ما بعد نزول ادم وحواء الى الارض .. والكلام دا فى تقديرى الشخصي كان من 10 ألاف سنة بالكتير اوى ..
هقولك تواريخ مش متعلقة اوى بكلامنا فى الحلقة دى لكن حابك تبقى عارفها من الاول علشان تتخيل التاريخ البشري .. احنا حابين نربط بين الاحداث التاريخية والتراث الديني .. سيدنا ادم كان من 10 الاف سنة .. سيدنا نوح كان من 6000 او 7000سنة .. سيدنا ابراهيم كان من 5000 سنة .. سيدنا موسي كان من 3200 سنة .. سيدنا عيسى كام من 2000 سنة .. سيدنا محمد كان من 1450 سنة .. صلى الله عليهم جميعا ..
بدأت حياة البشر على سطح الارض من 10 الاف سنة .. انتقل ادم وحواء لمكة وبنوا الكعبة وساعدتهم الملائكة لاقامة اول بيت و الطواف حوله كنوع من الاعتذار الى الله بعد ما قالوله ( أتجعل فيها من يفسد فيها ويسفك الدماء ) بالرغم ان السؤال كان على سبيل الاستفهام لا الاستنكار .. إلا انهم ملايكة بقى 
والامر خلافى فيمن بنى الكعبة .. بعدها انتقلوا لفلسطين وبنوا المسجد الاقصي .. امنا حواء انجبت مرات كتيرة .. كل مرة كانت بتولد توأم ولد وبنت .. اول توأمين كانوا قابيل واخته وهابيل واخته .. كل واحد منهم اتجوز اخته .. و قابيل اشتغل فلاح بيزرع الارض و سيدنا هابيل اشتغل راعي غنم .. سيدنا ادم كان نبى .. بعث بالاسلام زيه زى كل الانبياء حتى موسي وعيسي .. وكانت من شعائر الاسلام وقتها تقديم القرابين الى الاله .. حاجة كدا اشبه بأضحية العيد عندنا حاليا .. وكان القربان عندهم ذو دم .. يعنى يقدم خروف يقدم جدي .. لكن اللى حصل غير كدا .. قابيل قالك يا عم انا فلاح .. انا هقدم لربنا شوية خضار .. سيدنا هابيل المؤمن التقي قال لا انا هلتزم بأمر الله وجاب خروف قدمه كقربان .. كان علامة قبول القربان انه يتحرق .. فهابيل وقابيل كلاهما حطوا قرابينهم فى منتصف احد الاودية .. وفجأة اشتعلت النار بقربان سيدنا هابيل و لم تشتعل بقربان قابيل .. رُفض لانه غير مطابق للمطلوب .. ودا استخفاف بالله .. اتغاظ اوي قابيل من هابيل و الحقد والغل والنفسنة ملقت قلبه .. راح يجر شكله وكلمة من هنا على كلمة من هنا مسك حجر وهووووووووووووب على دماغه .. قابيل قتل هابيل ..
يا نهار ابيض .. اول جريمة قتل فى تاريخ البشرية .. اخ بيقتل اخوه .. والاتنين اولاد نبي !! ساعتها اوحى الله لقابيل قاله : فين هابيل اخوك ؟ قاله وانا مالى هو انا الحارس بتاعه ؟ قاله الارض بتصرخ لامتصاصها دمه .. اذهب فإنك ملعون ألعنك وتلعنك الارض .. الكلام دا مذكور فى كتب اليهود .. خدوا بالكم ان قابيل كان يعمل بالزراعة .. فمصدر رزقه كانت الارض .. دلوقتى الارض لعنته وبالتالى مش هيقدر يعمل بالزراعة مرة تانية .. اول ما حصل اللى حصل وقبل ما ابوه وامه يشموا خبر .. جرى قابيل على زوجته واولاده اخدهم وهرب بعيد جدا .. راح بلاد شرق اسيا .. الصين والهند والحتت دى ..
وقبل ما انتقل للمرحلة اللى بعد كدا عايز اذكر اية مهمة جدا فى الكتاب المقدس .. الاية بتقول ( لكي يأتى عليكم كل دم زكي سفك على الارض من دم هابيل الصديق الى دم زكريا ) .. مين زكريا ؟ جوز خالة ستنا مريم ام المسيح .. يعنى اول دم زكي كان سيدنا هابيل .. ودا مش مشكلة .. اخر دم زكي سفك على الارض كان دم سيدنا زكريا اللى من دور جد سيدنا المسيح .. طب وبالنسبة لدم سيدنا المسيح .. ايه نظامه ؟ هنا عندنا احتمال من الاتنين .. اما ان دم سيدنا المسيح نجس مش دم زكي .. ودا لا نقبله كمسلمين .. حاشا لله ان يبعث نبيا نجسا .. او انه متقتلش اصلا 
( وما قتلوه وما صلبوه ولكن شبه لهم ) هاشتاج #إلبس_يا_وحش
نرجع تاني لكلامنا .. بعد ما اكتشف سيدنا ادم وامنا حواء موت سيدنا هابيل حزنوا حزنا شديدا .. حزن بشع .. وكانت فى الوقت دا امنا حواء حامل .. استمر حزنهم لحد ما ربنا وهبهم ابنهم الثالث ( شيث ) .. و اسم شيث يعنى ( هبة الله ) .. كنوع من التعزية علشان يخرجهم من حالة الحزن العميق اللى كانوا بيعيشوها .. كان مصدر فرحة ليهم من اول ولادته .. نشأ على الطاعة واجتهد اوى فى العبادة و ورث النبوة من ابوه ادم .. وبعض المخطوطات التاريخية بتقول انه بنى المسجد الاقصى مع ابيه ادم ..
ربنا أعلم سيدنا ادم بإن عمره هيبقى 1040 سنة .. وبعدين اراه ذريته .. فشاف فيهم نبي أزهر .. جميل اوى .. قال مين دا يارب ؟ قال هذا ابنك النبى داوود .. قال كم يعش ؟ ربنا قال 60 عام .. قال : أفلا تزده يارب ؟ قال الله : لا إلا أن أزده من عمرك .. فوافق سيدنا ادم وتبرع ب 40 سنة من عمره لصالح سيدنا داوود .. وفعلا بعد كدا سيدنا داوود هيعيش 100 سنة ..
سيدنا ادم نسى الحكاية دى .. كان فات عليها 1000 سنة لإنها حصلت فى بداية خلقه .. فجأة لقى ملك الموت ادامه .. انت جاي ليه دلوقتي يا ملك الموت ؟ عمرك انتهى يا ادم انا جاى اقبض روحك .. لا منتهاش يا ملك الموت انا عمرى 1000 سنة و فاضللى 40 سنة كمان .. انت نسيت انك اتبرعت بيهم لابنك داوود يا ادم .. اه تذكرت يا ملك الموت .. اشهد أن لا إله الا الله .. اقبض روحي .. فقبضها ملك الموت ..
يااااااه .. يا الله .. مات السيد المعلم .. مات الاب المربي .. مات الموجه .. مات ادم ..
كانت فاجعة بالنسبة لاولاده .. لكن كانوا فى الاول لسة مؤمنين جدا بالله ومختلفوش على نبوة اخوهم شيث .. سيدنا شيث ..
كمل شيث مسيرة والده ادم .. لكن نرجع تاني لأصل الحدوتة .. ( قال انى جاعل فى الأرض خليفة ) .. الانسان مطالب بتعمير الارض .. فكان كل واحد بياخد زوجته واولاده ويروحوا فى حتة معينة .. وساعدهم فى دا طول القامة .. يعنى مثلا سيدنا ادم كان طوله 60 ذراع .. يعنى تقريبا 30 متر .. بارتفاع عمارة عشر أدوار .. يعنى نهر النيل بالنسبالة مجرد بانيو ..
نكتفى المرة دى و المرة الجاية هنتكلم عن اعظم حضارة فى التاريخ .. الحضارة الفرعونية المسلمة .. ايوة المسلمة .. فى الحلقة الجاية هتعرف ليه قلت كدا وتعرف ان لولا جدودنا كان زمان البشر عايشين فى كهوف لحد دلوقتي ..
