لعلك شفت فيديو لصاحب الصورة قبل كدا وهو بيتف او بينفخ بشكل غريب في وشوش المرضى .. وفجأة المشلول بيجري .. والمجنون بيعقل .. والأعمى بيبصر ..
.
الكابتن دا هندي .. والده كان شيخ متصوف .. لكن طموحه كان أعلى من انه يكون شيخ طريقة فادعى انه نبي مرسل .. ومسمى نفسه (( خاتم النبوة )) .. وطبعا ساعده على الترويج لديانته الجديدة إن فيه ديانات مخترعة مسبقا اتبنت على هدم الفهم الصحيح المعروف لوصف القرآن لسيدنا محمد صلى الله عليه وآله وسلم (( ولكن رسول الله وخاتم النبيين )) ..
قالوا خاتم النبيين مش معناها خاتمتهم .. معناها الخاتم اللى بيتلبس في الصباع .. يعني زينة النبيين و زخرفهم ..
.
من الديانات دي ديانة (( البابية )) ..
ودي ديانة ظهرت من 200 سنة تقريبا في ايران والهند واتبنت على احد معتقدات الشيعة الاثنى عشرية المرتبطة بسيدنا الإمام المهدي ..
هناك معتقدين ان الإمام المهدي حي يرزق من القرن التالت الهجري .. بس مستخبي ومبيظهرش خالص ومش هيظهر إلا لما يحين معاد خروجه ليملأ الدنيا قسطا وعدلا ويوحد صفوف المسلمين .. ومفيش غير واحد بس هو اللى يعرف مكانه ويقدر يتواصل معاه ويكون (( باب )) المسلمين له اللى يعرفوا من خلاله تشريعاته و اوامره..
.
جالك واحد اسمه علي الشيرازي قالك انا الباب .. والتف حواليه عدد كبير جدا من الاتباع .. لحد ما هبت منه أكتر وقالهم انه الموعود (( الإمام المهدي )) .. وقتها خسر عدد كبير جدا من الاتباع .. اللى هو مش للدرجادي ياعم!!
.
جه من بعده واحد اسمه حسين الملقب بـ ( البهاء ) .. في الاول قدم نفسه على انه خليفة الباب بعد موته .. وبعدين كبرت في دماغه فعمل دين جديد اسمه ( البهائية ) .. وقال على نفسه نبي ..
.
.
العامل المشترك بين كل الديانات المخترعة من النوعية دي انها تم دعمها من قبل أنظمة سياسية لتحقيق مكاسب ليها ..
فدعوة الباب اتزرعت في ايران من قبل الانجليز لهدف الانقلاب على الشاه والسيطرة على ايران من قبل نظام حاكم مطيع .. وبالفعل حاولوا التخلص من الشاه لكن محاولتهم فشلت والباب اترمى في السجن ..
اما البهاء فكان بيمارس نفس الدور في الدولة العثمانية وبرضو بتحريض من المملكة المتحدة .. واستمر لفترة لحد ما ساسة العثمانيين كشفوه ..
دا غير فتاويهم بتحريم الحِهاد .. وبالتوجه نحو القدس كقبلة و وجود ضريح الباب في حيفا هناك .. حثهم على هدم الكعبة .. واعلانهم عن الحق التاريخي للصعاينة في أرضنا .. وعباس عبد الهادي اللى كان ماسك امرهم في منتصف القرن اللى فات عمل علاقات مع حزب تركيا الفتاة اللى قضى على الخلافة وشارك في محافل ماسونية كتير جدا علنا ..
.
.
خليني اخدك 20 سنة لورا .. في مصر .. كانت حصلت موجة عنيفة من الترويج للبهائية .. وعدد كبير اعتنق الديانة دي وبدأوا الدعوة ليها جهرا ..
فورا أمن الدولة بدأوا يحاصروهم لكن انجلترا ضغطت على مبارك لتحريرهم وبالفعل رضخ مبارك للضغوطات ومارسوا دعوتهم جهرا دون قيود .. في حين ان مبارك اكتفى -من خلال جهاز أمن الدولة – بتكليف الدعاة خاصة السلفيين و رؤوس الأزاهرة بشن حملة دعوية مضادة للتحذير منهم وتبيان عقائدهم .. بالتوازي مع حملة اعلامية ..
.
حتى أنا نفسي دخلت في صدام مع أحدهم في نهاية عهد مبارك ..
الممرضة اللى كانت في مدرستي لما كنت في الثانوي .. جوزها مات فاتجوزت اخوه .. دكتور بهائي .. وتحولت للبهائية ..
حصلت مشادة بيني وبينها .. وبعدين بيني وبينه .. انتهت باشتباك بالأيدي ..
بعدها بأسبوعين كنت رايح ضمن القيادات الشبابية الجامعية لمقابلة جمال مبارك والمغربي وزير الاسكان .. فضباط من امن الدولة قعدوا معانا .. واحد منهم اخدني على جنب وقاللى ان الدكتور البهائي اشتكاك في امن الدولة وفي القنصلية والقنصلية بعتتلهم !!
قلتله سايبينهم ليه طيب ؟! قال اي كلام كدا ففهمت انه بيتهرب من الاجابة ..
.
.
في المرحلة دي الشعب كله كان واعي جدا بعقائد البهائية واصبحت منبوذة لأبعد الحدود .. حتى ان الاحداث دي تزامنت مع عزل حودة عباس ابو مازن لاسماعيل هنية اللى كان بيرأس حكومة ائتلافية .. فالجماعة في القطاع -ربنا ينصرهم يارب- معجبهاش عزله وتعيين رئيس حكومة جديد تابع لفتح .. هوووب عملوا انقلاب واسسوا حكومة للقطاع ..ودارت حرب كبيرة بينهم وبين ابو مازن وتدخلت امريكا لمساعدته برفع الحظر عن السلطة لمدة 15 شهر ..
طب ايه علاقة الكلام دا بنبذ البهائية في مصر ؟!
.
العلاقة ان الاخوان المسلمين في مصر عملوا حملة كبيرة لاشاعة ان ابو مازن بهائي .. بعدها بكام شهر طلع ضابط من الموساد قال نفس الكلام .. فطلع ابو مازن على طول سنة 2008 يحج ويتصور سيلفي مع الكعبة علشان يقولهم انا مسلم مش بهائي ..
.
وبغض النظر عن ديانته .. معرفش هم صادقين ولا كدابين .. وكدا كدا مش هتفرق كتير باللي بيعمله .. لكن الشاهد اني اوصلك قد ايه في الوقت دا كانت البهائية محط نظر كل الناس .. حديث الشارع ..
.
.
والحقيقة ان مش بس الأديان اللى بيتم اختراعها من قبل الامريكان والانجليز وغيرهم ..
بعض الأنظمة في مجتماعتنا اخترعت مدارس فكرية مشوهة .. بترتدي قميص السنة .. والبوكسر والفانلة ماركة (( لا إله إلا الحاكم )) ..وبكدا خدمت ملوك وامراء وحافظت على كراسيهم لعقود .. واللى بيتجنن في دماغه ويعقب على افعال الملك – قدس الله سره – فهو (عندهم) مفارق لأهل السنة والجماعة..
.
وانتشرت ذيولهم في كل دول المنطقة حتى مصر ..
فبقيت تشوف احد المشاخخ بلحيته التي يدلس بها على الناس .. يقولك المقاومة بتخرج عن الحاكم!! ويقولك جاهدوهم بالسنن .. وييجي لسوريا يتسأل عن احمد الشرع يقولك لأ مش ولي أمر شرعي .. ازاي ياجدع؟! طب اعتبره حاكم متغلب !! يقولك لأ أصل حكومة بشار مطلبتش منه يبقى ولي امر ودول اهل الحل والعقد !!
الأشكال دي لو انت مش تقيل او مسنود متتكلمش عنهم ولا معاهم .. لإن الواحد منهم معلق كتافاته تحت لحيته ..
.