مش هنستهلك وقت كتير فى الكلام عن شيث النبي .. ابن ادم .. هنرجعله كدا كدا بعد 20 حلقة لما نيجي نتكلم عن ظهور منشأ عبادة النجوم .. كل اللى عايزين نعرفه دلوقتى انه عاش 912 سنة .. وانجب طفل عبقري اسمه ( أنوش ) .. الاسم اللى اتحرف بعد كدا فى اللغة العربية لـ ( أنس ) .. زى ما فيه اسماء كتير اتغيرت ديفيد لداوود و موشيه لموسي و جوزيف ليوسف .. إلخ ..
سيدنا أنوش دا بقى كان مشكلة .. كان ذكي بشكل غريب .. بالاضافة الى الصفات اللى بنقولها كل شوية فى الرعيل الاول من ابناء ادم .. مجتهدين فى العبادة و مؤمنين جدا بالله .. حتى ان شيث اداله النبوة من بعده .. خد بالك ان النبوة فى الوقت دا كانت بتورث .. كل نبى بيورثها لشخص يختاره .. المهم انه كان ذكي جدا ومجتهد اوى فى العبادة .. والجديد بقى انه كان أول عالم فلك فى تاريخ البشرية .. كان يعرف الفرق بين الكوكب و الكويكب و التابع و النجم و المجرة و و و .. إلخ .. حتى كان يعرف مسارات الكواكب تخيل !! .. طب عرف منين الكلام دا ؟؟ ربنا اللى علمه .. وهبله علم الفلك كباكيدج .. كله على بعضه مرة واحدة ..
استني كدا يا احمد .. انت مبتتكلمش عن قابيل ونسله ليه ؟ مش المفروض عايشين ؟
اه عايشين فعلا .. احنا قولنا ان قابيل بعد ما قتل هابيل أخد زوجته و اولاده وطفش .. هرب من ادم قبل ما يعرف الكارثة اللى عملها .. وكمان لو نفتكر .. ربنا لعنه و الارض لعنته .. فبعد ما كان فلاح دلوقتى مبقاش قادر يزرع الارض لإن الارض رافضة تديله خيرها .. لعنته بقى .. فكان بيتنقل من مكان لمكان .. كل ما يروح حتة ياكل اى نبات ينفع يتاكل .. لدرجة انهم كانوا بعد ما يخلصوا على الخضار والفاكهة كانوا بيضطروا ياكلوا حشائش و ورق شجر .. وخلاص لما المكان اللى هم فيه يجيب اخره وميبقاش فيه اى حاجة ينتقلوا لمكان تانى .. دا اتسبب فى حالة من السخط بين ابنائه .. كل شوية واحد منهم يتنرفز على ابوه ويقوله انت السبب فى كل اللى بيحصلنا كان زماننا مع اولاد عملنا دلوقتي مرفهين ..
فى يوم من الايام .. الموضوع تطور اوى بينه وبين احد ابنائه .. كان اسمه ( لِمِك ) .. لمك دا كان اعمى .. يعنى بدل الهم همين .. هم العمى وهم الجوع .. لدرجة انه كان بيربط حجر كبير على بطنه علشان يخفف آلام الجوع .. بدأ الحوار بينهم بإتهام لمك لأبوه او جده قابيل بإنه سبب شقائه .. وكلمة من هنا على كلمة من هنا على ولية واقفة بينهم تسخّن وتشعلل .. قابيل مسك لمك من هدومه .. لمك استغل ان قابيل ادامه .. يعنى عارف مكانه من غير ما يشوفه .. و فك الحجر اللى رابطه على بطنه وطااااااااااخ فى راس قابيل .. قتله .. سبحان الله .. قابيل اتقتل بنفس الكيفية اللى قتل بيها اخوه هابيل !!

نرجع تاني للنبي أنوش .. انجب ( قينان ) وهو كان لسة يا دوب فى سن الطفولة ( 90 سنة ) .. ورث قينان النبوة وبعدين مات وعمره 905 سنة .. تحمل قينان أعباء النبوة .. انجب مهللئيل ( مهلائيل ) .. وكان عمره وقتها 70 سنة .. وقبل ما يموت ورث النبوة لمهللئيل .. وبعدين مات وهو عنده 910 سنة .. نيجي بقى لمهللئيل .. دا حكايته حكاية ..

علشان اعيشك الحالة .. هنرجع ورا شويتين .. نشأة الجن .. لما كلمتك عن نشأة الجن سبت الموضوع مفتوح ومقولتش كان امتى بالظبط .. بس انا هحكيلك حدوتة دلوقتى هتكون مفيدة لحكاية مهلائيل .. الحدوتة بدأت قبل خلق ادم ب 2000 سنة .. خلق الله ( سوميا ) أبو الجن زى ما ادم ابونا .. وبعدين قاله ( تمنّى ) .. شوف نفسك فى ايه .. قال لربنا ( أن نَرى ولا نُرى .. وأن نغيب فى الثرا .. وان نظل شبابا فى الورى ) .. يعنى نشوف بعض .. بس محدش يشوفنا .. واننا ننتقل فى اى مكان بكل سهولة ونختبىء بسهولة .. ونفضل طول عمرنا شباب .. وفعلا ربنا حققله امانيه ودى بقت صفات الجن المميزة له .. بعدها عاش الجن مئات السنين فى رفاهية شديدة .. لحد ما انحرفوا وافسدوا فى الارض وسفكوا الدماء وربنا بعتلهم جيش من الملائكة زى ما حكينا فى الحلقة الاولي .. واللى تبقى منهم فى الارض مشردين فى اعالى الجبال و الجزر البعيدة جدا والكهوف المظلمة .. متخيلين الحالة اللى بقوا عليها بعد النعيم اللى كانوا فيه ؟؟!! دول عدوا بمراحل الحالة النفسية السيئة اللى كان فيها نسل قابيل ..
استغل ابليس الحالة النفسية دى علشان يوحدهم وينصب نفسه ملك عليهم .. بعد طرد ابليس من الجنة .. راح فى منطقة بعيدة فى اعالى البحار .. وعمل لنفسه عرش رهيب على الماء .. عرش فخم جدا .. وعمله على الماء لإن عرش ربنا على الماء .. بجاحة منقطعة النظير .. وجاب صديقته القديمة .. الحية اللى قبلت انه يستخبى فى بقها علشان يقدر يدخل الجنة بعد طرده منها ويوسوس لحواء .. وجاب نسلها معاه .. ملايين الحيات .. ويمكن دا السبب اللى بيخلى كتير من علماء اليهود يقولوا ان مثلث برمودا هو مكان عرش ابليس .. خاصة وان جنبه بحر سرجاسو .. بحر مليان بالتعابين .. مليان تعابين بشعة ..

اتجوز ابليس وانجب 5 شياطين .. ولإن ابليس كان ذكي .. مش عايش الحياة بعشوائية .. عارف هو عايز ايه وبيسعي ليه .. وظف ابنائه .. كل ابن اشتغل وزير حاجة معينة لمملكته اللى بيجهز لإنشائها .. منهم وزير خارجية .. الوزير دا بقى لف على الجن فى العالم كله .. فى الجزر والكهوف والجبال .. رايح يدعوهم لزيارة عرش ابليس .. فيروحوا لإبليس يشوفوا العرش الضخم الفخم فيشعر بالهيبة وبعظمة صاحب المكان .. يستقبله ابليس ويقوله احنا لازم نتوحد ونحارب اولاد ادم وناخد منهم كل النعيم اللى عايشين فيه .. احنا مخلوقين من نار وهم مخلوقين من طين معفن فإحنا احق منهم بخيرات الارض .. وبعد فترة مش كبيرة قدر فعلا يوحد الجن ويقيم مملكة الجن الثانية .. وهو ملكها ..

هل كدا هو جاهر لدخول حرب مع البشر ؟ لا .. لإن اعداد الجن اللى هربوا قليلة .. فكان الحل انه يضم له مخلوقات تعادى البشر وتحاربهم بجانب جيش ابليس .. واحد يقوللى طب ما الحية و نسلها موجودين .. اقوله لما بنتكلم عن انسان طوله 30 متر فالحية دى بالنسباله كانت دودة ..فكان شرط تانى فى الكائنات دى انها تكون قوية جدا .. مين بتنطبق عليهم المواصفات دى ؟؟ الغيلان ( جمع غول ) .. الغول دا كان حيوان شبيه بالانسان وشكله بشع .. بيسكن فى الغابات والجبال .. ضخم جدا جدا .. بس فيه مشكلة تانية .. هيقنعوا الغول ازاى انه يقف معاهم فى حربهم ضد البشر ؟؟

ابليس عمل اجتماع مجلس وزراء .. طلع ابنه التانى وزير الغضب والطلاق وقاله انا عندى فكرة يا ابو الأباليس .. احنا ولاد جنية .. يعنى نقدر نتشكل بالشكل اللى احنا عايزينه .. ايه رأيك نتشكل بشكل البشر .. وبعدين نروح نخطف أكل الغيلان ونجري .. بعد ما يجوعوا اوى نرجع لشكلنا اللى بنظهر بيه للمخلوقات التانية ونرجعلهم الاكل دا .. فيحبونا ويكرهوا البشر .. ونستمر فى كدا لحد ما نكلمهم ونقولهم اننا مستعدين نحارب البشر علشانهم بس يحاربوا معانا .. وساعتها هيوافقوا ويفكرونا احنا اللى بنحارب علشانهم .. إبليس عجبته الفكرة دى واداله مكافأة كويسة ..

حصل الكلام دا فعلا ونجحوا فى مخططهم .. دلوقتى جيش ابليس بقى مكون من مردة ( المارد نوع قوي جدا من الجن ) والجن ( النوع العادي ) و الغيلان .. الكلام دا كله بلغ مين ؟؟ بلغ سيدنا مهلائيل النبي .. ولإنه نبى .. شخصية قيادية ناجحة .. مش درويش وقالك مش لازم نتعب نفسنا وربنا هينصرنا هينصرنا زى ما بيصدر مننا احنا المسلمين اليومين دول .. قالك كدا مش نافع .. احنا نجمع شمل البشر تاني ونعملهم حصنين يحتموا فيهم من الجن .. فعمل حصن بابل وعمل حصن السوس الاقصي .. وبعدين أسس أول جيش عرفه التاريخ البشري على الاطلاق ..
دارت معركة كبيرة بين جيش الانس وجيش ابليس .. ولما بكلمك عن جيش الانس فأنا بكلمك عن جيش مؤمن تماما بالله و ملتزم تماما بتعاليم الله .. جيش بيحركه نبي و بتدفعه عقيدته و ثورته للانتقام لجده ادم اللى انطرد من الجنة بسبب الاعداء دول .. فاستعانوا بالله وكذلك اخذوا بالاسباب .. بالنسبة للجن والمردة كان امرهم سهل .. يادوب تستعيذ بالله منهم تلاقيهم جابوا جاز وهربوا .. اما المعركة الحقيقية فدارت بين الغيلان و جيش البشر .. وانتهت بقتل جميع الغيلان اللى فى العالم .. علشان كدا متلاقيش اى غول موجود حاليا .. لكن تلاقيه فى الثقافات المختلفة .. حتى فى ثقافتنا العربية .. عارف لما حد يحب ينفى حاجة بشدة فيقول ( الكلام دا من رابع المستحيلات ) ؟؟ اهو الغول دا بقى احد المستحيلات الثلاثة .. مستحيل حد يشوفه تاني ..

وبكدا انتهت حدوتة النهاردة .. بتشريد الجن مرة تانية .. المرة الجاية بقى هنقول فقرة صغيرة وبعدين نحكي حدوتة الصعايدة الاوائل .. اللى من غيرهم مكنش دلوقتى هيبقى فيه كمبيوتر تقعد عليه وتقرأ الحواديت دى