.
كنت فى محاضرة عامة .. والمحاضرة العامة بتتعمل فى قاعة المؤتمرات وبيحضرها طلبة من كل الدفعات والتخصصات لدرجة ان الـ 600 كرسي اللى فى القاعة مبيكفوش وفيه طلبة بيقعدوا فى الارض ..
فى وسط الكلام جت سيرة دكر البوجي .. دى اداة كدا شبه بونطة الشنيور بنعمل بيها قلاووظ داخلي فى الحديد مثلا ..
طلع طالب من كهرباء يقوللى مش فاهم .. قلت اعمل سيرش على جوجل عن ( دكر بوجي ) واوريهوله .. وكدا كدا بشرح علي كمبيوتر القاعة ..
المشكلة مكانتش فى نتايج البحث (بوجي طلع خلبوص) .. المشكلة انى لما ضغطت على مربع البحث ظهرلي الحاجات اللى تم البحث عنها مسبقا على الكمبيوتر دا ..
.
فني القاعة طلع كان بيقفل على نفسه القاعة وبيشغلها سينما .. وياريتها سينما نضيفة .. مش هقدر اوضح اكتر من كدا 🙁
.
.
مرة تانية كنت بتكلم فى الشيت ميتال .. وبعدين ذكرت ماكينة اسمها ( خلّاعة صاج ) يعني بتخلع جزء من الصاج .. فجأة بنت قالت مش فاهمة .. دخلت جوجل اعمل سيرش عن ( مكنة خلاعة ) .. لك ان تتخيل نتيجة السيرش اللى فيه ( مكنة ) و ( خلاعة ) هيبقى عامل ازاى!!
.
.
مرجع تصميم اجزاء الماكينات المفضل بالنسبالى مؤلفه هندي و اسمه Khurmi .. نطقك للاسم غلط .. اسمه ( كارمي ) .. واحنا عموما بنسمي المراجع باسماء مؤلفيها .. فيه طالب كان بيسألني سؤال فقلتله هتلاقى اجابته فى اى مرجع ديزاين قاللى ( انا معايا خرمي اجيبهولك ) .. كان الموضوع ممكن يعدي بسلام لولا انى دخلت فى هستيريا ضحك لا ارادي اتنقلت للطلبة ..
.
.
انطردت مرة من محاضرة ديزاين بسبب كلمتين الدكتور كان بينطقهم غلط .. Pitch كان بينطقها bitch و Slot كان بينطقها Slut .. لا وييجي عن الـ key ويقول اسمه بالعربي .. خابور .. بيقولهم بطريقة عسل اوى 😂 .. حاولت اكتم الضحك على قد ما اقدر .. وشى كان شبه حباية الاوطة .. فجأة الدكتور قاللى ( احمد .. براااااااااا ) وهنا انفجرت قنبلة ضحك لحد ما خرجت برا المدرج و وقعت على الارض من الضحك ..