3 خطوات لاختراع اشاعة او نشر هبده من العيار التقيل مع تطبيق عملي

احتراما لوقتك البوست هياخد منك دقيقتين .. وهيعرفك كيف يفكر ولاد الهرمة

الخطوات :
.
1- ابدأ كلامك بتعميق نظرية المؤامرة واننا مضحوك علينا ومحدش فاهم حاجة وكله بينصب .
2- هات كام مصطلح علمي .. او اى اختصارات مش مفهومة.. حدث تاريخي .. إلخ .. ولو الهبدة تقيلة اوى ممكن تقولها على لسان شخصية وهمية بس تكون بمسمي اجنبي .
3- العب على آمال واحلام الغلابة .. و عاطفة العوام عن طريق خلق مظلمة بحيث يتعاطفوا معاك ..
.
.
تطبيق عملي : هنألف هبدة مع بعض .. وتخيل ان لو حد حطها فى بوست هتلم لايك وشير قد ايه .. يلا نبدأ

.

البوست دا كتبته بعد تفكير كتير لانه خطر على حياتي بس هقول اللى عندى ورزقى ورزق عيالى على الله ..
انا دكتور ابراهيم مجاهد اتخرجت من صيدلة سنة 95 واشتغلت فى اكتر من شركة تصنيع ادوية وسافرت المانيا واشتغلت فى شركة اسمها Ring Pharma وبعد سنتين من الجد والاجتهاد اترقيت اكتر من مرة لحد ما وصلت انى اشتغل فى معمل Tx-4 وهنا بدأت الحكاية .
كل المواد الخام اللى بتيجي كانت بييجي عليها لوجو شركة Phyzer الامريكية لكن المنتجات بتخرج من عندنا باسم شركة رينج ولما سألت فهمت ان عملية تصنيع العقاقير فى الولايات المتحدة خاضعة لرقابة تامة من الحكومة علشان كدا عملوا شركة وهمية فى المانيا بحيث يعملوا اللى عايزينه ومحدش يدور وراهم .
.
اشتغلت فى ابحاث السرطان واكتشفت ان الادوية اللى بتصنعها الشركة مش اكتر من وهم وبيحطوا فيه مادة فعالة بسيطة جدا اسمها Cs6بيستخرجوها من قشر البرتقال والعجيب ان فصيلة البرتقال الوحيدة اللى ينفع نستخلص منها المادة دى اسمه العلمي Trament Ora و هفاجئك لما تعرف ان دا هو نفسه البرتقال ابو سرة اللى عندنا فى مصر !
ولما سألت طب ليه مبنحطش المادة الفعالة دى بكميات كبيرة زميلي قاللى انهم لو حطوها بكميات كبيرة الناس هتخف بسرعة وبالتالى مبيعات الشركة هتقل كتير واحنا زى اى شركة ادوية يهمها ان الناس لا تخف ولا تموت !!
.
بعد 6 شهور بس من عملي انفصلت لان الاسئلة دى وصلت للادارة وللاسف اتلفقتلى قضية تحرش فى المانيا على ايد محاميي الشركة وهربت من المانيا على السويد ومنها لتركيا وبعدين مصر انا ومراتي واولادي.
.
ولما رجعت مصر اتهنت فى المطار اشد اهانة واتفتشت انا ومراتي تفتيش ذاتي وبنتي رقية فضلت 8 ساعات متواصلة تعيط مع انها طفلة وعندها 5 سنين بس فهمت ان باباها ومامتها بيتعاملوا كعبيد فى بلدهم اللى المفروض تقف فى ضهرهم .. بس واضح ان الشركة طلعت واصلة لدرجة انها بتتحكم فى دول .. مافيا بقى واحنا غلابة .
.
هقول السر اللى هيكون سبب فى موتي بس فى نفس الوقت سبب فى حياة ناس كتير
هتجيب قشر برتقال فريش مفاتش على تقشيره 24 ساعة و تنقعه فى مية بخل علشان يعزز تخليق انزيمات الـ SI12 المسئولة عن تخليق مادة Cs6 .. وبعدين هتعرضه لحرارة 60 مئوية لمدة 12 ساعة ودى ممكن تستعين بحد عنده ماكينات تفريخ البيض اللى بتتحكم فى الحرارة والرطوبة والتقليب ..
بعد انتهاء الـ 12 ساعة هتقشر الطبقة البيضة بسكينة او قشارة خضارة وتحاول تعصرها هيطلع منها زيت لونه ابيض زى اللبن .. دى مادة الـ Cs6 اللى الجرام منها بـ 120 الف دولار لكن محدش بيعرف يصنعه غير مافيا الدوا.
.
بنتى امانة فى رقبة اى حد هيشوف البوست دا وهيكون سبب فى شفائه او شفاء عزيز عليه
انا كدا كدا ميت ومش عايز حد غيري يموت ولا يتعذب بالمرض الخبيث
وادعولى ربنا يتقبل شهادتى

.

تخيل بقى لو كنت نشرت بوست بالشكل دا كان هياخد كام لايك وكام شير ؟!! بالرغم ان الفولورز عندى معظمهم من الصفوة ( بالكلام عن عقلياتهم ) .. لكن كتير منهم هيحس ان الكلام حقيقي لوهلة وبعدين يفتكر اننا مفبركينه مع بعض ..