البعد الاخلاقى لتسريح العمال مع اعطائهم مستحقاتهم كاملة

مفيش فرق بين عمال المصنع وموظفي السجل المدني .. بالعكس موظفي المصنع هياخدوا حقوقهم وفقا للقانون .. اما موظفي السجل المدني فاغلبهم موظفين بعقود من سنين وشغالين بملاليم على امل التثبيت .. فالقانون بيقولك الدولة من حقها متجددش العقود وملهمش مكافأة نهاية خدمة ولا نسبة عن كل سنة اشتغلوها .. ولا مرتب شهرين لو تم الموضوع بشكل مفاجىء .. في حين ان كل الامتيازات دى متاحة لعمال المصنع بالاضافة الى ان رواتبهم ضعف مرتبات موظفي السجل ..
.
غير اللى تجاوزوا سن 45 سنة و هيطلعوا معاش مبكر ..
.
.
الغريب ان معظم اللى كانوا شايفين ان تسريح عمال المصنع امر غير اخلاقي وافقوا بشدة على تسريح عمال السجل المدني !!
.
الغريب كمان ان فيه ناس ادعت ان تسريح العمال ( مع اعطائهم كامل حقوقهم ) امر مخالف للشرع .. و وصل الحال بالبعض انه يقول ان مفيش عالم شرعي من اول الثورة الصناعية الاولى ( بيفهم في الكلام دا وتقدر تاخد منه حكم منضبط ) !! ..
.
رأيي الشخصي ان تسريح عمال المصنع امر مفيهوش ما ينافي الاخلاق .. والسبب ان المصنع لو مستعنش بخط الانتاج المؤتمت المصنع اللى جنبه هيعمل كدا وتكلفة المنتج عنده هتقل عن المصنع اللى رفض تسريح عماله .. وبعد فترة المصنع هيقف .. او حتي هيشوف منتج مستورد قيمته اقل من المنتج اللى بيصنعه محليا .. وفي كلا الحالتين المصنع مبيعاته هتقل و يحقق خساير و يقفل .. وساعتها العمال دول مش هياخدوا حقوقهم اللى اتكلمنا عنه لعجز صاحب المصنع عن السداد و القانون هنا مطاط اوي وهيعديها .. ناهيك ان عدد المستفيدين من تخفيض سعر المنتج و رفع جودته اعلى بكتير من عدد الموظفين المتضررين ..
.
اما بخصوص تسريح موظفي السجل المدني ..
فشايف ان اللى هيتحولوا ادارات تانية مفيش عندهم مشكلة .. اللى هيعملوا معاش مبكر دا امر – شرعا – غير جائز لمخالفتهم ميثاق العمل .. التشريعات المتفق عليها مسبقا .. والدولة هنا طرف تاني فى التشريعات دى مينفعش تتعامل معاها كسلطة الهية .. وبالنسبة لاصحاب العقود المؤقتة فتسريحهم مفيهوش ما يخالف التعاقد ولا يخالف القانون .. وعدد المستفيدين فى الحالة دى برضو هيكون اكبر بكتير من عدد المتضررين .. الشعب مقابل عدد الموظفين ..
.
.
ولو انت مش مقتنع بالكلام دا وشايف انه امر غير اخلاقي .. فعايزك تستخدم نفس معاييرك دى للحكم على اتوبيسات النقل العام .. اللى قطعا اثرت بالسلب على اصحاب ( الحنطور ) .. هل ينفع نقول ان استخدام اتوبيسات النقل العام امر غير اخلاقي ؟!