العلاقة بين البشرة الدهنية والحديد الزهر

احتراما لوقتك البوست هياخد منك دقيقتين

.
البشرة الدهنية بتتميز بوجود مسام .. جيوب .. بتحتفظ جواها بالزيوت .. بمجرد ما تتعرض للشمس او الحرارة بتتفتح الجيوب دى و تفرز الزيوت اللى فيها ..
علشان كدا ممكن تشوف بنت فى الشارع شبه البلياتشو .. بسبب انها استخدمت اويل بيزد فاونديشن و كوزماتيكس .. في حين انها مفروض تستخدم حاجة اويل فرى .. لان الزيت اللى فى بشرتها مع الزيت فى مستحضرات التجميل اللى بتستخدمها مع حرارة الشمس بتسيح كل الليلة دى و فجأة تلاقى الجوكر واقف جنبك !!
.
والعملية دى بتحصل عكسيا .. بمعني ان بمجرد ما صاحب البشرة الدهنية يدخل فى مكان فيه تكييف .. بعد شوية بتلاقى المسام دى اتقفلت تاني ..
علشان كدا بنقول اللى بيعمل ماسك تقشير مثلا بعد ما يخلص الماسك يمشى بقطعة تلج على وشه .. علشان يقفل المسام تاني بعد ما بينضفها وميسيبهاش مفتوحة فتلم قاذورات تختلط بالزيت جواها ..
.
.
طيب تعالى نبص بقى للحديد الزهر Cast Iron
هتلاقيه بيتميز بخاصية التزييت التلقائى .. Self Lubrication Behavior ..
طب دي جت منين ؟ جت لعدة اسباب اهمهم حويصلات الجرافيت الموجودة على السطح واللى بتكون زلقة .. و بسبب ان الحديد الزهر بتلاقي عليه مسام بالظبط زى مسام البشرة الدهنية ..

فلما يحصل احتكاك الحرارة بترتفع .. المسام تفتح .. تحطلها زيت .. الزيت يقلل الاحتكاك .. الحرارة تقل .. المسام دي تقفل وتاخد الزيت معاها جوة .. يحصل احتكاك تاني .. الحرارة تزيد .. المسام تفتح وتخرج الزيت اللى جواها .. وهكذا ..
الكلام دا بيختلف من نوع زهر للتاني ..

..
مش واثق ان الهاشتاج دا مناسب للكلام المكتوب بصراحة بس قشدة