في أواخر أيام مبارك كنت مهتم بالعمل المجتمعي وتم اختياري كمسئول البرنامج الإنمائي للأمم المتحدة ضمن 9 مناطق جغرافية في مصر .. البرنامج كان بتمويل من المعونة الأمريكية وبإشراف من الهلال الأحمر وجمعية الشبان المسيحية ..

تم اختياري بعد فصل إللى قبلي .. لأنه نظم فعالية رياضية لمدن وقرى محافظة القليوبية اتكلفت أكتر من مليون جنيه .. والمفروض إنه بينسق مع مراكز الشباب وكل قرية يطلع منها أتوبيس بأطفال وشباب ويلعبوا شوية وتتوزع عليهم بدلات وجوايز ..

حصل تفتيش مفاجىء .. المفروض يروحوا يلاقوا مثلا شباب بيلعبوا كورة .. لقوا الكورة وملقوش الشباب ..

الميزانية كلها اتحطت في جيب مسئول البرنامج واللى حواليه ..

والله أعلم كام إيفنت إتعمل قبله وفلوسه دخلت نفس الجيوب ..

دا النموذج الأول وخليني أقولك معظم المؤسسات الخيرية شغالة بنفس النمط .. الفرق في تغيير المسميات .. المانح هم المتصدقين مش المعونة الأمريكية .. والمستفيد هم الغلابة مش الأطفال والشباب .. والحرامي هو القائم على الجمعية وبيلم فلوس .. يدي قروش للمستحقين ويحط في جيبه ملايين ..

ودايما لما تشوف أي مؤتمر أو فعالية كبيرة (( في العالم كله )) .. لازم تفهم إن خلف الكواليس فيه ميزانية مخصصة له .. وصناع قرار بيسندوا مهام التنظيم والاستضافة و الطيران و النقل وغيرهم لشركات أهلية … والإسناد دا بيتم من خلال خوارزمية (إنت حتة وأنا حتة) .. إللى هو مثلا محتاجين ناخد 100 غرفة في فندق لمدة أسبوع .. تكلفتهم الطبيعية مليون جنيه .. طب أنا هممرلك المصلحة دي بخمسة مليون بس ليا منهم إتنين .. وهكذا !!

النموذج التاني هو نموذج رولكس ..

رولكس على الورق شركة غير هادفة للربح .. إزاي يا جدع ؟!

قالك صاحب الشركة عمل مؤسسة خيرية على روح مراته وبعد كام سنة مات ومكنش له ورثة فالشركة بقت ملك المؤسسة الخيرية ..

طيب أرباح الشركة كام وبتروح فين ؟!

أرباح الشركة غير معلن عنها لكن تقديرها ب 9 وشوية مليار دولار سنويًا ..

ومتقوليش شركة ألمانية وسويسرية بقى و بيسحلوهم ضرايب لأنها مبتدفعش ضرايب ..

طب الفلوس دي بتروح فين ؟!

قالك يا باشا بيدفعوا منها مرتبات وعمولات الموظفين .. وبيصرفوا منها على الأبحاث الخاصة بالساعات .. وبيتبقى كام مليون كدا بيرموه للجمعيات الخيرية !!

تخيل كدا أبحاث الساعات ممكن تتكلف كام ؟! مليون .. إتنين .. عشرين مليون ؟! حط معاهم الكام مليون بتاع الجمعيات الخيرية .. هيتفضل الجزء الأكبر من الـ 9 مليار دولار .. بتندفع منها رواتب الصغار والباقي يتقسم على الكبار ..

ومش من حق أي جهة مطالبتهم لا بضرايب ولا إنهم يفصحوا عن أي معلومات مالية خاصة بيهم .. لإنهم على الورق (منظمة غير هادفة للربح) ..

والنموذج التاني دا نموذج معلمين منتشر جدًا في الدول الأوروبية إللي بتشفط نص الأرباح في صورة ضرايب ..

حط القاعدة دي بين عينيك

بيزنس يعني فلووووث .. مفيش حاجة اسمها مؤسسة غير هادفة للربح .. إنت بس إللي مش شايف المصلحة