في البزنس .. لو قدمت للعملاء حاجة (عادية) هيطلعوا بيك السماء لإن العادي بالنسبالهم بقى (مميز) بسبب استنصاح منافسيك عليهم والغش اللى ملا السوق..

بلبن مثلا ..

عادي جدًا وشغله مفيهوش افتكاسات .. بس بيستخدم لبن وخامات بجودة إللي بنستخدمها في البيوت .. العادي يعني .. بس لإن الناس اتعودت على لبن مخلط ومخفف وخامات تعبانة فحبوه .. و أنا منهم ..

تبارك فارم ..

كان محل جزارة صغير قدام هندسة إسكندرية .. بيعمل طواجن ومصنعات لحوم .. كسر الدنيا مع إن الطواجن بتاعته بيزك جدًا.. ليه؟ لإن لحمته نضيفة وخاماته نضيفة .. ودلوقتي اللهم بارك مكسر الدنيا .. لما بنزل مصر لازم اكل منه ..

فرج أبو خالد ..

مش بتاع الكبدة المفضل بالنسبالي كطعم .. بس بحب آكل من عنده وكتيييير جدًا بياكلوا من عنده علشان عارفين إن الكبدة بلدي .. خامات نضيفة ومش مهم سعره الغالي ..

بن المهندس ..

عرفت إن حد من حبايبنا عمل مشروع بن أونلاين .. وإنه مبيغشش في الحبوب وأسعاره منطقية وكمان بيحمصها ويطحنها ويعبيها فريش .. فخليت مهندس تبعي يطلب بن أرابيكا كولومبي سادة ومحوج .. وتوليفة روبوستا رخيصة .. ومع إن التحميص جالي أغمق من الدرجة المفضلة ليا لكن اعتمدته خلاص .. عجبني جدًا حتى مع اختلاف الذوق لمجرد إنه بيقدملي بن نضيف بدون غش .. مش اطلب حبوب أرابيكا يجيلي روبوستا محمصة بالفول السوداني !!

دي الوصفة – غير السحرية –

إللي هتختصر نص الطريق لنجاح البيزنس بتاعك .. متغشش الناس ومتستنصحش عليهم .. قدملهم العادي إللي مفروض يتقدم هيشوفوك سوبر هيرو ..

جودتك هتسوق ليك وإنت قاعد باشا .. كل الأمثلة إللي ذكرتها ميعرفوش إني بطلب منهم أصلاً .. لإني إما ببقى برا مصر وحد بيطلبلي .. أو بستخدم لقب العيلة فالاسم بيكون مبهم ..

والأهم .. فلوسك هتبقى حلال ..