.

من أعجب الشخصيات في التاريخ وأكثرها جدلا ..

.

احنا منعرفش كان مجرد عبد صالح ولا نبي ولا رسول ولا حتى ملاك مش من البشر .. ونقل اثر ضعيف عن سيدنا عمر وزيه عن سيدى على سمعوا فيه صحابي بينادي اخر باسم (ذى القرنين) .. فقالوله ( مه .. أما كفاكم أن تتسموا بأسماء الأنبياء فتسميتم بأسماء الملائكة !! ) ..

.

منعرفش حتى هو اتسمى ( ذي القرنين ) ليه ؟!

من العلماء اللى قالوا لانه ملك ما بين قرني الشمس .. المشرق والمغرب يعني ..

واللى قال لانه كان عنده قرنين صغيرين في راسه ..

واللى قال لانه كان عنده ضفيرتين من مقدمة الشعر مسحوبين للخلف ..

واللى قال لانه ملك الفرس والروم مع بعض ..

.

وفي رواية عن الامام علي بيحكي حكاية عجيبة .. انه كان عنده قرنين فعلا .. وتوجه الى قومه بالنصيحة .. فضربوه على قرن فمات .. فأحياه الله .. فراح يدعوهم لله تاني .. فضربوه على القرن التاني .. فمات .. وهكذا سمي ذي القرنين ..

.

و واضح انه كان – وفقا لمعظم الأقوال – من أصل عربي لان اسمه مختلف عليه ما بين عبد الله بن الضحاك بن معد .. ومصعب بن عبد الله بن قنان .. والصعب بن ذى مرائد ومرزبان بن مرزبة .. وفيه اشعار لأهل حمير بيفتخروا فيها بإنه كان جدهم ..

.

وخليني اخدك لأبعد من كدا واقولك ان بعض العلماء قالوا انه هو نفسه الاسكندر الاكبر .. ومنهم اللى قالك عندنا اتنين اسكندر هو واحد منهم وان ابوه كان اول القياصرة ..

.

منهم اللى قال ان وزيره كان ارسطو .. ومنهم اللى قال ايش جاب لجاب .. عبد صالح لفيلسوف !! وزيره كان الخضر وكان يضعه على مقدمه جيشه .. والرواية دى كتير انجذب ليها خاصة مع الروايات اللى بتقول ان الخضر لسة عايش لحد النهاردة واتكلمت في الموضوع دا باستفاضة قبل كدا ..

.

كذلك فيه رواية عن سيدنا معاوية بتقول ملك الارض اربعة .. سليمان و ذى القرنين ورجل من اهل حلوان ورابع .. وان كنت للأمانة مش متقبل متنها اوي لان سيدنا سليمان لم يملك الا مملكة اسر!ئيل الموحدة ولما انقسمت في عهد رحبعام ابنه كانت مملكتين شمالية وجنوبية معروفين حدودهم ..

.

علشان مطولش عليك هكتفي بحدوتة صغيرة توضحلك مدى حكمته ..

لما عرف ان اجله اقترب كان خايف على امه جدا من الوجع عليه .. فأوصاها تطبخ لحم وثريد وتجمع نساء المدينة وتقولهم كلهم ياكلوا الا الثكالى .. الامهات اللى فقدوا اولاد ليهم يعني ..

.

فلما مات امه عملت كدا فعلا .. فمفيش واحدة مدت ايديها في الطبق ادامها .. فاكتشفت انها مش لوحدها بس اللى فقدت ابنها .. ودا خفف كتير عنها ..