سؤال حلو جدا ..

.

المركز المالي للقطاع المصرفي حسب اخر ارقام قرأتها كان يزيد عن 19 تريليون جنيه .. الفلوس دي بيتم تدويرها في حلقة ائتمانية محكمة والسوق المصري اصبح (( عبد )) في سوق عبيد الائتمان كغيره من الاسواق ..

.

طيب فجأة كدا هنقول يا شباب هنخلي فايدة البنوك صفر .. ايه هيحصل ؟!

اول مشكلة هتقابلها هي صدمة القرار .. فيه ناس ليها فلوس عندك .. هتاكلها عليهم ؟! فيه ناس ليك عندهم فلوس .. هتاخد منهم الاصل بس ؟!

.

بعد تجاوز المرحلة دي هتقابل ازمة تانية في التمويل .. مفروض كدا كل قرض بيخرج من عندك كبنك هو قرض حسن زيرو فوايد .. اخرك اوي اوي تحط مصاريف ادارية 1% ولا حاجة علشان تصرف على البنك .. في الحالة دي كل اللى مكنش بيفكر في القرض هيطلب قرض .. هتتعامل ازاي مع الزيادة الرهـ.ـيبة دي ؟! هتقوللي هترفع سقف الشروط هقولك طب ما فيه طبقة هتنطحن تحت .. كدا انت بتقول هتسلف الاغنياء وتفرم الفقراء !!

.

طيب حلينا المشكلة دي .. واضفنا 1% مصاريف ادارية علشان نشغل البنوك وندي مرتبات وكدا .. البنوك الخاصة ايه هيقعدها في مصر بعد ما دا يحصل ؟! شيل يا باشا 11 تريليون جنيه من ودايع الناس رجعها لجيوبهم .. مبروك خسرنا معظم القطاع المصرفي !!

.

طب خلينا نقول الحكومة استعانت بام خديجة المغربية وقدرت تسد الفجوة دي .. هتدبر دولار منين ؟! ومش بكلمك عن الاموال الساخـ.ـنة .. بكلمك عن الحسابات الدولارية للمصريين .. ماهم مش هيلاقوا فايدة من ايداع الدولار .. ساعتها هندبر دولار منين للاقساط الربع سنوية اللى علينا ؟!

.

دبرنا الدولار .. حلو ؟!

شبح الخوف من التضخم هيخلي الناس تجمد فلوسها في صورة دهب .. دولار .. عقارات .. كل واحد ودماغه بقى .. ثقافة السوق هتتحول للاكتناز مش التحريك ولا حتى الادخار الربوي .. ساعتها لو كان عندنا 2 كيلو ركود هيبقوا 2 طن ..

.

.

الكلام دا كله وانا بكلمك عن اللى هيحصل من منظور داخلي .. متكلمتش عن العلاقات الخارجية للجهاز المصرفي ..

.

طيب هل انا قصدي انه مينفعش نتخلى عن الربا ؟!

الاجابة بكل وضوح : اه .. مينفعش نتخلى عن الربا بشكل فوري ..

.

امال نتخلى عنه ازاي ؟!

الاجابة بكل وضوح : لازم خطة انسحاب مجدولة .. ممكن تحتاج اكتر من عشرين سنة .. خطة لخفض الفايدة تدريجيا مع تعويض الاثار المترتبة على الخفض من مصادر تانية .. شوف مصادر للدولار .. حرك السوق .. اخلق اقتصاد مغري للاستثمار مش الادخار .. وطبعا الكلام دا مش بالسهل ..

.

بس دى حرب مع الله و رسوله .. هنفضل عشرين سنة جديدة في الحرب دي ؟!

الاجابة بكل وضوح : اه حرب .. لكن ساعتها مش هنبقى بنحارب الله و رسوله .. ساعتها خطة الانسحاب دي هتاخد حكم أكل الميـ.ـتة .. مضطرين ليها .. واحنا دين واقعية مش دروشة ..

.

قصدك عادي الناس تحط فلوسها في البنوك ؟!

لأ طبعا .. انا بقول للناس متحطوش فلوسكم في البنوك وانا عارف ان اللى هيستجيب اقل من 1% .. خليك انت في نفسك .. محدش هيشيل شيلتك غيرك وانت مش حمل الدخول في حرب زي دي ولا حمل انك تأكل ولادك من حرام ..