كتمان علم الهندسة

.
فى اخر كام سنة ظهر نمطين من المتعلمين :-
الاول : تلاقيه باعتلك رسالة بيقولك ( انا عايز اعرف كل حاجة عن محرك ام 88 واشمعني دا اللى شركة داسو حطته فى طيارتها .. وعايزك تقوللى كل جزء فيه وطريقة تصنيعه و سبب اختيار الماتيريال له .. واعمال الصيانة والتطوير و الاختبارات الاتلافية والغير اتلافية و اسم الاوفس بوي اللى كان بيوزع شاي على الصنايعية اللى بيعملوه )!!
التاني : يسألك سؤال تافه .. ولما تقوله اتعب نفسك واسأل جوجل .. ينهال عليك بحسبي الله ونعم الوكيل فى كل كاتم علم .. اللى زيكم هو اللى ضيع مننا الاندلس .. عميتشين ابو دي بلد.
.
.
النمطين دول انا شخصيا مبردش عليهم .. واحد غبي محتاج يتعلم ( ازاى يتعلم ) .. والتاني بيتعامل معاك كخدامة !! ..
.
من ناحية تانية .. انا مبخرجش كل العلم اللى عندى .. يمكن انتم مبتحسوش بالنقطة دى ودا من فضل ربنا .. لكن انا على سبيل المثال مفيش دبانة بتدخل مقر التصنيع الخاص بيا بسبب التجهيزات اللى فيه اللى طورتها بنفسي .. مبطلعش حد على جداول ومعاملات ومعادلات التصميم اللى بتتكرر معايا فى خطوط الانتاج والماكينات والروبوتات .. الا بعض الجداول بديها للى بعلمهم تصميم ودى اقل من 10% من الحاجات اللى طورتها خلال سنين ..
.
انا لو معملتش كدا هخسر والسوق هيخسر .. ودا بالنظر للموضوع بعين الصقر .. السوق هيتضرر والمهنة هتروح فى داهية ..
لو كل كيان خرج ابحاثه اللى بتميزه فى السوق وبتديله ميزة تنافسية الرؤوس كلها هتتساوي .. وهتلاقى السوق فجأة سيطر عليه مجموعة من الكسالى والاغبياء اللى معندهمش استعداد يطوروا من شغلهم .. ما كدا كدا التطوير اللى هيتعب فيه غيرهم هيوصلهم !!
.
انا كأحمد تعبت اضعاف اضعاف تعبي فى تصميم المنتجات التقليدية علشان اصمم طريقة التصنيع والتجهيزات اللى تخليني قادر اطلع منتج بجودة اعلى من السوق واصرف عليه تكلفة تصنيع و عمالة و وقت اقل 4 مرات من اعظم المنافسين .. عايز تفهمني انى هقدر اكمل فى نشر العلم لو خرجت الكلام دا لحد ولقيت نفسى تاني يوم مليش مكان فى السوق ومش لاقى ادفع مرتبات والتزامات ولا اصرف حتي على بيتي؟!!
.
انا ضربتلك مثال على نفسي علشان واثق اني – بفضل الله – مفيش اتنين بيختلفوا عليا فى نقطة نشر العلم ( نسأل الله الاخلاص والتوفيق فيما هو قادم ) .. لكن فيه علم من مصلحتنا نشره .. وعلم لو نشرناه هنرجع لورا ..
.
شرعا حكم الكلام دا مختلف شوية ..
العلوم الحياتية ليها احكام مختلفة عن العلوم الشرعية .. العلم الشرعي ( فى الغالب ) يحرم كتمانه .. وان كان احيانا الحكم بيختلف زى ما سيدنا ابو هريرة كتم احاديث الفتنة لحد ما انتهت والا كان تم التشكيك فيه وضاعت معظم السنة ..
.
في الهندسة كاتم العلم غير آثم الا لو كتمانة هيتسبب فى الاخفاق فى تحقيق الكفايات .. كون الهندسة فرض كفاية .. او ان كتمانه يجري على ايد مشتغل به .. زى الدكتور والمعيد اللى بيكتموا علمهم عن الطلبة فى نطاق المواد اللى بيدرسوها .. فلوسهم حرام .
.
نشر العلم هيعود عليك بالبركة وقسما بالله هتتعجب من عطاء الله لك .. لكننا مش دراويش ..