3 شهور بتفصلنا عن هجرة النبي ..
خلاص طفح الكيل .. مكة مبقتش مكان مناسب للدعوة .. فالنبي امر المسلمين بالهجرة الى يثرب ..
و خليني افكرك ان يثرب كان فيها اصلا مسلمين .. بيعة العقبة الاولى والتانية .. وخليني اقولك كمان ان من المسلمين اللى هاجر من سنة فاتت لانه خلاص مبقاش متحمل وجوده في مكة وتعذيب المشركين له ..
فيبدأ المسلمين يتحركوا من مكة للمدينة فرادى وجماعات .. متخفين .. لو قريش عرفت هتبقى مطحنة .. اقلها خالص خالص هيغيروا عليهم ويرجعوهم ويسلبوا اموالهم ..
الطبيعي اني مثلا لو عايز انقل من اسكندرية .. للعياذ بالله القاهرة .. هبيع بيتي .. هنقل مقر الشركة .. هبيع كارنيه دخول المنتزه والمعمورة ..
لكن هم معملوش كدا .. هم سابوا بيوتهم واموالهم وبضايعهم وراهم علشان قريش متشكش انهم هاجروا .. دينهم وحياتهم اغلى من كل دا ..
.
واللطيف في الموضوع مقوف سيدنا عمر من الهجرة .. كل الناس بتهاجر بالليل خفية وسايبين كل حاجة وراهم الا هو .. هو اساسا مكنش محتاج يهاجر خوفا على نفسه من قريش .. لكنه هاجر دعما للنبي صلى الله عليه واله وامتثالا لأمره ..
يحط سيفه في جنبه .. قصبته على ضهره مليانة أسهم .. والقوس في ايده .. ويطلع على الكعبة في عز النهار .. يطوف بيها ويصلي ركعتين ويجمع الناس ويقولهم شاهت الوجوه، لا يُرغم الله إلا هذه المعاطس، من أراد أن تثكله أمه وييتم ولده أو يُرمل زوجته فليلقني وراء هذا الوادي .. انا رايح يثرب اللى مش باقي على حياته يحصلني .. بحبه جدا سيدنا عمر ..
.
في وسط المعمعة دي بقى خطة السرية عند بعض المهاجرين انكشفت .. فجابوهم قريش .. زي مثلا سيدنا صهيب الرومي .. مسكوه قريش وقالوله انت جيتلنا صعلوك ودلوقتي بقيت مليونير وعايز تخرج بفلوسك من مكة ؟! صعلوك يعني فقير .. زى ما في الحديث الصحيح لما سيدنا معاوية تقدم لستنا فاطمة بنت قيس والنبي قالها ترفضه لانه صعلوك لا مال له .. فيقولهم فلوسي اهي اشبعوا بيها .. النبي يعرف فيقول ربح صهيب .. ربح صهيب ..
.
كدا بقى مكة مبقاش فيها حد مهاجرش من المسلمين الا و كان عبد معرفش يفلت من صاحبه .. او ضعيف لا يقوى على السفر 450 كم او على تكاليف السفر .. وسيدنا النبي .. القائد اللى مكنش ينفع يهاجر هو ويسيب كل المسلمين دول وراه ينطحنوا .. لانه بمجرد هجرته كل حاجة هتنكشف .. وفضل معاه سيدنا ابو بكر وسيدي على .. وقلة زي ستنا أسماء ..
.
تحصل شوية علامات تقلق مشركي قريش اكتر .. المسلمين اختفوا من مكة .. واكيد هيطلع وراهم سيدنا محمد .. غير ان سيدنا محمد بدأ يرجع الامانات اللى كان بيودعها اهل مكة عنده .. دي مش فلوسه هيسيبها ويمشى ودا الصادق الامين .. مينفعش يفرط في الامانات .. فخافوا انه يهاجر هو كمان ويعمل بؤرة جديدة للدعوة ويحقق انتشار ويرجع مكة عزيز ..
لكن اللى طمنهم ان سيدي علي مهاجرش .. سيدي علي كان زي ما تقول كدا ظل النبي .. اتطمنوا انه لسة مهاجرش لكنهم يقينا عارفين انه على وشك الهجرة ..
.
فيجتمعوا في دار الندوة ويقترح عليهم اللمبي ياخدوا من كل رجل قبيلة ويروحوا يخلصوا على النبي بالليل .. جبريل يعرف النبي ويؤمره مينامش مكانه .. وباقي القصة عارفينها ..
في الوقت دا اجتهد سيدنا ابو بكر في تسييل كل الاموال اللي يقدر عليها وكانوا 5 او 6 الاف درهم .. بنتكلم مثلا في 400 الف جنيه .. وخرج بالنبي من باب خلفي في بيته وطلعوا على غار ثور ..
للوهلة الاولى ممكن تفتكر ان غار ثور كان في نص الطريق .. اطلاقا .. دا بينه وبين مكة زى ما بين رمسيس والعباسية .. 4 كم مثلا ..
ولما المشركين يكتشفوا ان سيدي على اللى في السرير يتجننوا .. ويحطوا مكافآت على راس النبي وصلت لـ 100 جمل .. حوالى 5 مليون جنيه .. دا ولا الـ Wild West بتاع الامريكان ..
.
علشان تبقى مستوعب اكتر معايا .. تعالى اشرحلك خريطة الحجاز .. مكة في النص .. على اليمين صحراء .. على الشمال البحر .. تحت الطائف وفوووووق المدينة ..
بالمنطق كدا .. النبي هيروح فين ؟! لا ينفع يروح الصحراء ولا البحر .. ولا ينفع يروح الطائف تاني بعد اللى حصل .. يبقى اكيد هيطلع فوق ناحية المدينة ..
فاللي يحصل انهم ينزلوا تحت في اتجاه الجنوب او الطائف مش فوق .. ويقعدوا شوية على ما ييجي الدليل .. وقريش عمالة تبحث عنه في الشمال وترسل سرايا وفرسان .. وبعدين ياخدوا يوتيرن ويمشوا ناحية البحر ويرجعوا يتوجهوا للشمال .. لفوا حوالين مكة ..
.
خلاص سيدي النبي على وشك الوصول .. سيدي علي كان فضل في مكة 3 ايام مبيعملش حاجة غير انه بيرد الودائع والامانات لانها كانت كتيرة جدا ..
.
.
كل يوم اهل المدينة بمسلميهم ومشركيهم يطلعوا على اعالي يثرب ويستنوا النبي .. فلما الشمس تشتد اوي يرجعوا .. كل يوم على الحال دا منتظرينه بفارغ الصبر ..
لحد ما في يوم يشوف واحد من يهـ.ـود المدينة النبي وابو بكر من بعيد لابسين ابيض في ابيض .. فينادي في اهل المدينة .. يا اهل يثرب هذا جدكم قد قدم ..
.
في مشهد مهيب .. يجروا كل المسلمين على بيوتهم .. يشيلوا اسلحتهم ويطلعوا بأعداد مهيبة مزودين بالأسلحة يستقبلوا النبي مش بس لتشريفه .. استقبال عسكري .. دا كأنهم عايزين يوصلوا رسالة لاهل يثرب وللعالم كله اننا فداء رسول الله ..
.
.
علشان نبقى ملمين اكتر بالهجرة .. خليني اقولك ترتيب الاحداث بالتاريخ الميلادي ..
13/9 .. خرجوا من مكة وراح غار ثور .
16/9 .. سابوا غار ثور وحضر الدليل و لفوا حوالين مكة قاصدين يثرب.
23/9 .. وصلوا قباء وبنوا اول مسجد في الاسلام وقعدوا 4 ايام.
27/9 .. وصلوا يثرب.
.
.
الموضوع منتهاش .. احنا عندنا دولة بيتم تأسيسها في مدينة الرسول .. فكان الامر الالهي لكل المسلمين بالهجرة للمدينة .. تكليف شرعي مش اقتراح زى ما حصل في هجرة الحبشة مثلا .. يعني اللى كان يقدر يهاجر ومهاجرش يأثم ..
.
وهنا برضو فيه معلومة مغلوطة بيننا .. ان التقويم الهجري بدأ من عند عمر بن الخطاب ..
لكن الحقيقة انه بدأ بمجرد الوصول ليثرب .. النبي محمد صلى الله عليه وآله اول من استخدم التقويم الهجري .. فكانت مراسلاته كلها مكتوب فيها ( في السنة الاولى من الهجرة .. في السنة السابعة .. وهكذا ) .. كذلك العقود والبيوع .. طيب هل كان قبل كدا العرب معندهمش تقويم ؟! لأ كان عندهم تقويم عمره 53 سنة .. عام الفيل .. علشان كدا لما تفتح كتب السيرة تلاقي ان النبي ولد في عام الفيل .. ستنا خديجة ولدت قبل عام الفيل بنحو 15 عام .. سيدنا ابي بكر ولد بعد عام الفيل بسنتين ونص .. كان اصغر من النبي بسنتين ونص .. وهكذا .. فكان دا التقويم المعتمد .. غير تقويم اهل الكتاب .. المسيحيين مثلا كانوا بيعدوا من بعد ميلاد سيدنا المسيح .. وعلى كل حال التقويم مكنش دقيق اوي لانهم مكانوش بيدونوا كتير ..
.
طب ليه النبي بدأ تقويم جديد وهو عنده تقويم مشهور جدا وكويس ؟!
علشان يخلق هوية خاصة بالمسلمين .. اللغة هوية .. التقويم هوية .. اللبس هوية .. حتي شكلك كدا .. لحيتك اللى الجمهور قالوا حلقها حرام وحجاب المرأة الواجب بالاجماع .. هوية ..
تحريم القزع .. حلاقة السرسجية .. هوية .. ونروح لأبعد من كدا ونقول .. النضافة الشخصية جزء من هوية المسلم .. التطيب ولبس الثياب النضيفة واكرام الشعر والاعتناء به ودهنه بالدهن ( الكريمات حاليا ) .. والكلام دا واقع .. احيانا بتدخل وسط مجموعة تعرف المسلم من غير المسلم بالريحة بس .. انا في سفري بفرق بين الهندي والباكستاني بالريحة والنضافة ..
.
وعلى كل حال .. سيدنا عمر هو اللى حدد بداية السنة الهجرية لما حصلت مشكلة و والى العراق بعتله قاله احنا بتوصلنا تعليماتك ومكتوب عليها شعبان ومنعرفش شهر شعبان دا بتاع اي سنة .. فبدأ مرة تانية يعيد النظر في التقويم وحصلت اختلافات نخليها من مولد النبي ( اللى هو نفسه تقويم الفيل ) ولا البعثة ولا الهجرة .. واتفقوا على الهجرة زى ما كانت عادي .. وبعدين قالوا نخلي اول شهر هو المحرم لانه منصرف الناس من الحج .
.
.
علشان مطولش عليك هكتفي باهم حدثين حصلوا بعد دخول المدينة ..
بناء المسجد في مكان كان ملك لولدين رفضوا ياخدوا من النبي تمنه وهو رفض ياخد الارض الا بعد ما يديهم حقها ..
والمؤاخاة بين المهاجرين والانصار ..
المهاجرين جايين على الحديدة .. سابين بيوتهم وفلوسهم وبضايعهم ومحلاتهم وراهم .. فلازم ياخدوا زقة كدا .. ولازم نخرج روح العصبية الجاهلية ما بينهم .. خلاص الكل بقوا مسلمين مفيش حاجة اسمها انا مكي انا افضل منك ولا انا يثربي انا اعز منك !! مفيش حاجة اسمها انا مصري سبعتلاف سنة حضارة وانت بدوي من الجزيرة كنت بترعى معيز في الوقت اللى كنا بنعمل سدود .. بغض النظر ان المعلومة دي غلط اصلا وان الهكسوس مثلا كانوا عرب على الراجح .. ومش كدا وبس .. دا الرخاء اللى كان في مصر وقت سيدنا يوسف كان على ايد العرب اللى بيحكموا مصر .. سيدنا يوسف كان عزيز مصر تحت ملك عربي مش تحت فرعون مصري .. عندك الاسرة ال 14 و 15 و 16 من الاسر اللى حكمت مصر كانوا عرب .. فانا صحيح معتز بمصر لكن برضو معتز بأصلي العربي وديني بيقوللي لا فضل لعربي على اعجمي الا بالتقوى .. دا الفيصل ..
.
من القصص الملهمة للشباب في الاحداث دي قصة سيدنا عبد الرحمن بن عوف ..
كان مليونير في مكة .. هاجر المدينة بقى ابيض ..
النبي اخى بينه وبين سعد بن الربيع .. فيقوم سعد يقوله خد نص فلوسي .. يرفض ويشكره ويقوله دلني على السوق..
فيجيب شوية لبن يعملهم جبنة .. يطلع على السوق يقعد بطشت فيه جبنة .. لا انكسف ولا حس باحراج ولا قال دي شغلانة حريم والكلام الفاضي دا ..
هوووووب يوم ورا يوم يتجوز ويشتري عبيد وتكثر امواله وصدقاته .. لدرجة انه تصدق في غزوة واحدة من الغزوات ب 40 الف دينار .. الدينار وزنه 4 وربع جرام دهب عيار 22 .. بحسبة بسيطة الدينار الواحد ب 10200 جنيه مصري .. يعني اجمالي المبلغ اللى تصدق بيه كان 408 مليون جنيه ..
متستغربش .. دا لما مات وجهم يوزعوا التركة كانوا بيقسموا الدهب بتاعه بالفؤوس .. شيل وعبي في مقاطف واشولة !!
شوف ثري قد ايه ؟! وبالرغم من دا منسيش دينه .. دا راجل من علماء الصحابة .. كان بيفتي في عهد النبي .. تخيل كدا رجل يحصل على سلطة اصدار فتاوي في عهد النبي .. علمه وتدينه كانوا عاملين ازاي !!
.
.
نقف عند كدا النهاردة وبكرة ان شاء الله نبدأ نتكلم في الغزوات واحداث ما بعد الهجرة .. احنا لحد دلوقتي عمر النبي لسة 53 سنة ..
