كيف تحول المصريون إلى مفاجيع في 40 سنة؟!

من 40 سنة كان سلوكنا مختلف و ثقافتنا مختلفة فيما يخص كميات وانواع الحاجات اللى بناكلها ..
.
لو بنتكلم عن الكمية .. فبشكل او بآخر توجهت الشركات اللى بتبيع اكل لحملات تسويقية ممنهجة .. هدفها انك تملى الكرش بأكبر كمية ممكنة من منتجاتهم وتبقى غير راض عن الكميات اللى كنت بتاكلها قبل كدا ..
.
الموضوع بدأ بماك .. لما نزل بالساندويتش الجديد دبل ماك .. وبعدين نزل بساندويتش شكله حلو في الصورة لكن عايز سيد قشطة علشان يعرف يحطه في بقه .. دبل بيج ماك .. 3 شرايح من العيش بينهم 4 شرايح برجر !!
.
خطة ماك التسويقية اتسندت على افلام بتصور امريكا انها جنة الله على ارضه .. فالشباب بدأوا في اتباع سلوكيات الرجل الابيض في كل حاجة من اول اللبس لحد الاكل والشرب ..
مثلا .. زمان كنا بنشرب الشاي في كبايات صغيرة .. دلوقتي معظم الناس بتشربه في مج قد كباية الشاي بتاعة زمان 3 مرات !!
.
بيبسي دخلت على الخط وكبرت حجم ازازتها اللي متغيرش من سبعتلاف سنة .. وبعدين نزلت بحجم اكبر وحملة تسويقية ضخمة تحت مسمى ( الصاروخ ) .. فتلقائيا .. ازازة البيبسي والكولا الصغيرين اتركنوا والناس كلها بقت تشرب صواريخ !!
.
شركات الكورن سناكس والشيبس دخلت على الخط .. انا فاكر كنت بشتري 2 كيس ( كاراتيه ) بشلن .. 5 قروش .. بعدها نزلوا بكيس اكبر بشلن .. ليز وشيبسي عملوا لاول مرة كيس تمنه ربع جنيه .. اكبر من ابو 15 قرش .. بعد شوية نزل كيس بنص جنيه !! مع ان الكيس الصغير العادى بتاع البدايات كنا بنستخدمه في (( الغديوة )) ويكفي .. الغديوة دي كان طقس لينا في ابتدائي .. بنلم اصحابنا في المدرسة في الفسحة ونحط اكلنا كله مع بعضه ونشير بقى .. هو كيس شيبسي يتيم كل واحد كان بياخدله منه شريحة ولا اتنين وخلص الحوار !! حاليا الشيبسي بيتاكل بالكبشة .. مش واحدة واحدة حتى !!
.
الببيتزا .. مكنتش بحب بيتزا غير من مطعم في اسكندرية يعرفه العواجيز اسمه ( شي جابي ) .. وكنا متعودين ناكل منه الفترة اللى بنقضيها في اسكندرية كل سنة .. في التسعينات اظن .. بدأت بيتزا هت حركة رايقة .. انها فتحت الابيتايزرز كلها ريفيل مجانا .. بتاخد طبق .. تروح لتلاجة المقبلات واقلب اللى انت عايزه .. خلصت ؟! ارجع اقلب تاني .. ومن غير ما احس انا شخصيا بقيت اروح هنا واكل بنهم شديد جدا زى كل الناس لحد ما بطني تحدفني بفردة جزمة ..
.
وكعادتنا كمصريين .. عايز تسوق لأي حاجة اربطها بـ ( الفحولة ) .. فمثلا .. كبدة الفلاح في اسكندرية .. خلاصة خطته التسويقية والبروبجندا بتاعته .. انك تروح انت وصاحبك تطلبوا خمسة وسمعين ساندويتش .. وتزلط كل ساندويتش على مرة واحدة .. كدا بقى انت بقيت ( دكر ) جدا !!
.
.
نشر الثقافة دي مستمر لحد النهاردة ..
من كام سنة مثلا ظهرت حركة تسويقية .. نقلت ثقافة ( العزيمة الخليجية ) للمطاعم المصرية .. الصواني ..
الاستراتيجية التسويقية دي بدأ بمطعم اسمه بدوية في سيتي ستار في مدينة نصر .. كنت مدمنه من عشرين سنة تقريبا .. بيقدم مندي ومشاوي .. فبتقدر تاخد ( صحن ) فيه نص فرخة مثلا يكفي شخص واحد او اتنين .. او ( صينية ) فيها فرختين او فرخة ومشاوي .. تكفي 4 افراد ..
دلوقتي الموضوع اتطور .. تروح تشتري صينية عليها سبعتلاف نوع مختلف .. 3 كيلو رز .. كفة ممبار حمام كباب سدق شيش طاووق .. إلخ ..
.
.
التغير في ثقافة الاكل منتجش عنها تغير في سلوكنا الاستهلاكي بس .. دي انتجت جيل اضعف جسديا وذهنيا من سابقه .. كروش مدلدلة في كل حتة .. صحة في النازل وامراض في الطالع خاصة ان معظم المنتجات دي غير صحية .. وحتى لو صحية فتناول كميات كبيرة منها بيبوظ الدنيا ..
.
احنا اتلعب في اعدادات مجتمعنا واحنا بنظلط يا معلم !!