احتراما لوقتك البوست تجربة شخصية وطويل

.
الموضوع دا مش من المواضيع اللى بحب اتكلم فيها لسببين .. الاول ان دايما الكلام بتلاقيه مليان قلة ادب وتطاول من الطرفين والتاني انى بالفعل حاولت اني اعمل حاجة ضمن لجنة من كبار المهندسين ومقدرتش اتحمل عشوائتهم فانسحبت ..
.
بالله عليك .. لو ليا معزة عندك بلاش تكتب حاجة فيها تطاول على اى طرف فى الكومنتات .. وبلاش تفتعل خناقات بينك وبين الطلبة مستحيل توصلنا لحاجة غير انكم تقوموا زعلانين من بعض ..
.
لكن الليلادي هحكيلكم حدوتة يمكن اول مرة احكيها .. ومش هذكر اي اسماء لا للمكان ولا للناس اللى فيه ..
من 5 سنين تقريبا .. حصلتلى اصابة في ايدي ( محدش يعرف عنها حاجة غير المقربين ) وكنت قررت اقعد فى البيت 6 شهور .. لكن يشاء الله انى اتخلي عن الفكرة دى و اشتغلت مع معهد خاص ( مجاملة لاحد اساتذتي الاعزاء ) .. ودى المرة الاولى والاخيرة بالمناسبة .. بعدها مشتغلتش فى خاص غير فى اكبر جامعة فى مصر واللى كانت بتاخد من 95.2% وقتها بالاضافة لشرط اجتياز الطالب امتحان التوفل والايلتس ..
.
ندخل فى الموضوع ..
في اول يوم رحت هناك لقيت طلبة كتير يعرفوني .. قلتلهم فرجوني على معهدكم .. وروني المعامل والورش .. قالولى مفيش معامل بس فيه ورشة .. نزلناها ..
لقينا مخرطة (خردة ) ومكنة لحام .. قالولي انها مش شغالة ومحطوطة منظرة .. بصيت عليها وطيخ طاخ طوخ .. شغلتها .. المخرطة كانت شغالة بس المعهد ( مفيهوش حد بيعرف يشغل مخرطة ) !! ..
.
اللى يعرفني يعرف ان طريقتين فى التدريس مختلفة .. انا عايز اعمل من اللى بدرسله مهندس .. عايزه يحط رجله فى السوق قبل ما يتخرج .. فكنت بعمل حاجتين .. يوم السبت كان اجازتي المشتركة مع الطلبة .. فكنت باخد كل يوم سبت مجموعة منهم واوديهم السبتية .. الجمهورية .. الريحاني .. اكتوبر .. إلخ .. بحيث يتعرفوا على السوق اكتر .. وبنقضى يوم لذيذ لطيف متعب يتخلله غداء عمل غالبا بيكون كبدة بانيه ^^ ..
الحاجة التانية انى قلتلهم قسموا نفسكم مجموعات .. المجموعة متزدش عن 10 .. واحلموا .. شوفوا اى حاجة عايزين تصنعوها وهنشتغل مع بعض لحد ما نصنعها كمنتج قادر ينافس فى السوق .. وبالفعل منهم اللى عمل دلتا برنتر .. منهم اللى عمل ماكينة بيع قهوة تحطلها الفلوس تخرجلك قهوة .. منهم اللى عمل راوتر .. إلخ ..
.
والدنيا اتحولت من الركود لقنبلة نشاط اكتسحت المعهد .. كنت موقف شغلي الخاص ومعتمد على مدخراتي وبحتسب الوقت دا لله .. جالي امين المعهد وقاللى ( حلو الشغل اللى بتعمله .. بس انت بتاخد فلوس عليه فمفروض يبقى باسم المعهد مش اسمك ) .. قلتله ( الملاليم بتوعكم ميلزمونيش وبقبضهم على حضور 4 ايام فيهم 7 محاضرات .. غير كدا ملكش عندي حاجة ) .. ودى كانت صدمته الاولى ..
.
امين المعهد دا بقى كان الكل فى الكل .. صاحب السلطة العليا على المكان .. واللى تولي ادارة المعهد بحدوتة ظريفة جدا .. كان ماسك رئيس عمال .. جالهم فجأة تفتيش من الوزارة وسألوا فين امين المعهد .. مكنش عندهم امين معهد .. فقالوله روح البس حاجة نضيفة وتعالى اعمل فيها امين معهد .. ومن وقتها بقى هو الامين 😂 ..
.
دا واحد مريض نفسى .. عنده بتاع 45-50 سنة وبيقول معاه بكالريوس هندسة ميكاترونكس .. ولما قالوله يا حمار مكنش فيه من 25 سنة ميكاترونكس فى مصر قالهم انا اتصالات بس كنت ناسي 😂.. بيتعامل بقلة ادب مع كل اللى فى المعهد من اول الامن لحد العميد .. صاحب المعهد ( رئيس شعبة فى النقابة يا عسل انت ياللى بتزعل مني لما اقولك مستحيل النقابة هتحارب المعاهد الخاصة ) مديله صلاحيات مطلقة ..
بقسملك بالله يا مؤمن انهم كانوا 4 دكاترة بس اللى شخصيتهم قوية ومبيسمحوش له يقل ادبه عليهم او ( يستعبدهم ) منهم 2 من بنها ..
.
في مرة فى امتحان الثيرمو لقي الطلبة داخلين بجداول البخار .. حب يمارس ساديته عليهم فدخل قالهم كل الورق دا يترمي فى الزبالة برا اللجنة واللى هشوف معاه ورقة هيتعمله محضر غش .. فضلوا يفهموه ان المادة مبتتحلش الا بيه وان اى امتحان ثيرمو فى الدنيا بيكون الطالب داخله بالمخطط دا .. يقولهم انا اسف وانا حمار ومبفهمش وجاهل ؟ لا .. اصر على موقفه .. لكن ربنا ستر و واحد من الدكاترة الاربعة دخل اللجنة ولما عرف اللى حصل طرده وقال للطلبة ليكم نص ساعة زيادة علشان الوقت اللى ضاع دا ..
.
اللى درستله قبل كدا يعرف ان علاقتى بالطلبة علاقة صداقة واخوة مؤطرة بإطار الاحترام وكوني استاذهم وهم طلابي .. ففي مرة حكولى انه دخل فى مرة لدكتور بيدرسلهم فى المدرج و زعق فيه وقاله ( انت معادك كام ؟ ) قاله (9) .. قاله ( والساعة دلوقتي كام ؟) قاله ( 9ونص ) .. قاله ( ولما هي 9 جاي 9 ونص لسة ؟؟ احنا مش فاتحينها تكية هنا واياك تكررها تاني ) .. قاله ( حاضر يا استاذ فلان ) ..
سألت الطلبة .. عملتوا ايه ؟ .. قالوا مفيش .. خرج و كملنا المحاضرة ..
قلتلهم – والعشم موجود بيننا للسبب اللي قولته فى اول الفقرة – انتو مش رجالة .. لو رجالة مكنتوش سيبتم استاذكم يتعمل فيه كدا حتى لو كارهينه .. دا كان جزء من دورى التربوي بالمناسبة ..
.
بعدها باسبوعين تقريبا اتصل بيا يوم الخميس عشرتاشر مرة .. مردتش .. يوم الجمعة مردتش .. السبت مردتش .. يوم الحد رايح المدرج قابلني فى الطرقة فى وسط الطلبة وسألني ( انا مش اتصلت بيك خميس وجمعة وسبت ؟! ) قلتله اه .. قاللى ومردتش ليه ؟ قلتله مش فاضى .. زععق وقال ( لو سمحت لما اتصل بيك تبقى ترد عليا ) .. فى وسط الطلبة والعمال والمعيدين والدكاترة اللى معديين رفعت صوتي اعلي من صوته وقربت منه كتهديد وقلتله ( دا عند امك ) .. وقتها الطلبة كانوا واخدين وضعية حمدي الوزير ومستنيينه يرد او اديهم اشارة بس فيهتكوا عرضه .. بس للاسف هو خاف و منطقش ولا كلمة وانسحب ..
.
مرة تانية جالي المكتب وطلب مني اروح شئون العاملين علشان ياخدوا بصمتي علشان الحضور والانصراف .. قلتله انا لا بصم ولا بمضى ولا يتاخدلي حضور وانصراف .. الكلام دا يتعمل معاك لانك ادارى لكن انا عضو هيئة تدريس ..
.
برضو اللى درستله يعرف عنى انى مبحطش درجات على الغياب وباخد الغياب بس علشان لو حد حصله حاجة لا قدر الله من الطلبة يقدر ياخد تأمين وتعويض من المعهد وهو اصلا دافع تأمين ضمن المصاريف .. ويعرف ان قوانين مختلفة شوية .. يعني عايز تدخل بشاى او قهوة اشطة .. جالك تليفون اخرج رد بدون استئذان بس اعمله فايبريتيد .. لقيت نفسك مصدع اخرج بدون اذن شم هوا واشرب قهوة علشان تفوق للمحاضرة اللى بعدى . كدا ..
اخينا وصله الكلام دا فكلم العميد .. العميد طلبني وقاللى مينفعش كدا ولازم تاخد غياب وانت مدلع الطلبة ولازم حزم .. قلتله عدي عليا فى اى وقت لو لقيت طالب بيتكلم يبقى ليك الكلام .. ولو لقيت المدرج فاضى والغياب كتير انا هستقيل لان دا معناه انى مبعرفش اشرح والاولى تشوفوا حد بيفهم يشرحلهم .. لكن الحقيقة ان الطلبة احيانا كانوا بيقعدوا على الارض لان مفيش مكان و فيه طلبة بتحضر اكتر من مرة وطلبة بتحضر من فرق تانية علشان يتعلموا .. دخل اخينا فى وسط الحوار وطلب كشوفات الغياب .. طلعتها و قطعتها ادامه وادام العميد ..
.
في وسط ( سوق العبيد ) دا .. كانت فيه حاجة مشرفة جدا .. دفعة رابعة .. اللى كل كائن حي فى المعهد شتملي فيهم .. والسبب انهم مبيسكتوش عن حقوقهم .. طالبوا بمعامل و ورش .. طلبوا دكاترة بجد .. طلبوا دراسة بجد .. ولما رفعوا المصاريف فجأة وطلبوا فلوس اضافية ( بدون ايصال ) عملوا اعتصام .. وساعتها مدير امن المعهد ( الضابط الفاسد المعزول من الداخلية ) استعان بزمايله فى الخدمة وخطفوا ناس منهم ودوهم امن الدولة وخرجوهم بعد كام يوم ..
.
في الجقيقة انا بستغل البوست الخنيق دا علشان اقولهم وحشتوني يا رجالة .. وانكم اكدتولى فكرتي عنكم لما سمعت اللى حصل .. انكم فعلا رجالة ..
.
فى الوقت دا كنت مخصص تليفون للطلبة .. لو احتاجوني فى اى وقت بيلاقوني .. تخيل يا مؤمن ان بنت تيجي تشتكيلي من معيد بيقولها تعالى البيت اعرفك على ماما واشرحلك مادتي .. وهي مش عارفة تعمل ايه .. رافضة تروح وفى نفس الوقت خايفة يسقطها .. تخيل لما معيد يقوللى خلي بالك من المعيد فلان لانه عصفورة لصصاحب المعهد ( مرة تانية بقولك .. رئيس شعبة فى النقابة ) و لامن الدولة .. ولما معيدة تقوللى انها بتتعرض للتحرش اللفظي من موظف فى المعهد وخايفة تاخد اجراء لانه مجرم وبيبيع مخدرات فى المعهد ومسببلها رعب ..
.
حاولت اصلح قدر الامكان.. مكنتش قادر استوعب حاجات كتير هناك .. يعني ايه المعيد ياخد 1650 جنيه والدكتور 3000 لو معين مش منتدب ؟!! يعني ايه بيدير المعهد واحد بدبلوم صنايع ( دا مش تقليل من اصحاب الدبلومات الفنية .. هم على راسنا لكن لكل مقام مقال ) .. يعني ايه العميد علشان ياخد اجراء لازم يستأذنه ؟!
.
يا اخي اقسملك بالله المناهج مكانتش كاملة .. كنت بدرس مادة مع دكتور جالي المكتب وسألني ليك فيها ؟ قلتله ياعم دي تخصصي .. اداني كتاب المادة وطلب رأيي فيه .. قلتله الكتاب دا يتاخد فى محاضرتين هظبطلك انا منهج كويس علشان الطلبة تستفيد. وقد كان .
.
ولما تأكدت ان خلاص مفيش فايدة نزلت مكتب الامين وفتحت الباب بدون استئذان وقلتله شوف حد يشيل المواد بتاعتي انا هقعد اسبوع بس علشان الولاد ميتضرروش تكون انت اتصرفت .. وسبته وخرجت .. خرج ورايا ونص الموظفين اتجمعوا برا على الصوت … قاللى عايز تسيب المعهد ليه ؟ انا راجل اكاديمي .. يرأسني راجل اكاديمي مش واحد بدبلوم .. قاللى مانت عندك العميد هو مديرك .. قلتله خلي الطرطور بتاعك ينفعك .. خرج مدير الامن ( الضابط الفاسد ) من مكتبه اللى جنب مكتب الامين على الصوت وحاول يهديني وقاللى ( لو سمحت تعالى نتكلم ) .. قلتله بس يلا ادخل جوة .. وسبتهم ومشيت ..
.
الموظفين كانوا متفرجين ومحدش اتكلم نص كلمة .. لكن عايز اقولك انى كنت حاسس انهم كلهم كانوا عايزين ياخدوني بالحضن والله .. وتاني يوم رحت المعهد لقيت بتاع الامن بيسلم عليا بالبوس والاحضان وكأني اخوه اللى راجع من سفر 10 سنين !!
.
انا بالمناسبة معنديش نية – على الاقل فى المستقبل القرب – انى ارجع للتدريس .. ولو فكرت ارجع فى يوم مش هشتغل فى خاص ولا هروح الامريكية .. هشتغل فى حكومي وهحتسب عملي لله انا فى غني عن المرتبات التعبانة دي وبفضل الله عندى شركتي الخاصة وربنا كارمني من عظيم فضله ..
.
دا مثال لدكاكين كتير .. وقطعا فيه اماكن مفيهاش الهبل دا .. ومظنش انه من العدل ابدا اننا نساوي بين معهد العاشر مثلا ومعهد زي دا ..
.
مرة تانية بقولكم .. لله ..ولو ليا خاطر عندكم بلاش تتطاولوا على بعض فى الكومنتات .. والله قلة الادب دى ما هتحل اى مشكلة ومش هناخد من وراها غير الزغل .. والله الخناقات دى هتتكتب فى ميزان سيئاتكم ..