مفيش حاجة اسمها طب نبوي

.
لما النبي – صلى الله عليه واله وسلم – يقول مثلا ( إن أمثل ما تداويتم به الحجامة ) .. لازم نفهم ان الحديث بيتكلم عن حال الطب وقتها .. طب بدائى بخيارات محدودة والحجامة كانت افضلها ..
.
ونستوعب ان استخدامك الحجامة مع طفلك اللى عنده حمى وسخونية مع استغنائك عن الطبيب هو عين الدروشة ويكتب فى صحيفة سيئاتك ..
.
كذلك حديث ( فى الحبة السوداء شفاء من كل داء ) .. الحديث صحيح لكنه بيحتمل اكتر من تفسير .. ولو كان تفسيره كظاهره ( مكنش حد غلب ) .. واحد ابوه جاله كانسر .. هات شوية حبة سودا يابني !! ومعنى الحديث الراجع ان الحبة السوداء ( جزء ) من مسببات الشفاء للامراض التى تقبل التداوى بها .. وساعتها رجال الطب كانوا بيقسموا الامراض لامراض باردة وحارة !! وحتي اختلفوا فى تحديد ماهية الحبة السوداء دى .. متفقوش تطلع ايه !!
.
ولما النبي – صلى الله عليه واله وسلم – يحثنا على السواك .. فدا مش معناه انه افضل من المعجون .. دى اللى يفصل فيها اهل الطب .. لكن قطعا كان افضل الحلول وقتها ..
.
الكلام دا عن الطب النبوي .. اما بالكلام عن التشريعات فدي مش بس صالحة لكل زمان ومكان .. دا مفيش زمان ولا مكان ممكن يصلحوا بدونها .. وبالكلام عن الاخبار عن الغيبيات فلا نملك الا التسليم ..
.
.
تعديل : محدش يفهم من الكلام دا انى بقول الاحاديث دى باطلة او ان الحجامة والحبة السوداء ملهمش جدوى .. إلا لو كان غبي او متحامل ..
لان الكلام واضح جدا .. اه مفيدين وكانوا افضل خيارات من 1400 سنة لكن دلوقتي مش هم افضل حاجة ..