العلاقة بين قضبان القطر و البطاطس المحمرة

احتراما لوقتك البوست هياخد منك دقيقتين

.
قضبان السكك الحديدية ليها وظيفتين رئيستين ( دليل بيقيد الحركة فى كل الاتجاهات باستثناء اتجاه امتدادها – بتشيل وزن القطر لانك لو سبته متحمل على الارض الاحتكاك هيبقى بشع وهيغرس ) ..
.
لما حبينا نعمل قضبان للقطر قابلتنا مشكلة .. هل نعمله ناشف ( صلد ) بحيث ميحصلوش تآكل نتيجة الاحتكاك الدائم بينه وبين عجلات القطار .. ولا نعمله طري بحيث يستوعب حمل القطار ومينكسرش فجأة زى الازاز ..
.
الفرق بين المادتين زى الفرق بين مسمار الصلب ومسمار الحديد المطاوع .. المسمار الصلب بتدق عليه يخترق الحيطة لكن لو اتغاشمت عليه هيتقطم مش هينتني .. اما المسمار المطاوع فلو خبطت عليه بزيادة هينتني .. واثناء الطرق بيحصله انحناء بسيط انت مبتاخدش بالك منك وبيرجع تاني لاصله ..
.
لقينا اننا مينفعش نعمله صلد اوى والا هيبقى هش وسهل ينكسر .. ولا ينفع نعمله طري اوى لانه هيتاكل بسهولة وكل شوية هنحتاج نغيره ..
.
فقررنا نعمله زى البطاطس .. مقرمش من برا ( صلد علشان ميتآكلش بسرعة بفعل الاحتكاك) وطري من جوة ( لين .. علشان يستوعب الاحمال من غير ما ينكسر ) .. و الكلام دا بيتعمل من خلال المعالجة الحرارية ( التصليد السطحي ) .. او ( التقسية السطحية ) ..
.
وعموما طريقة تصنيع قضيب القطر باختصار بتكون عبارة عن المراحل الاتية بالتدريج :-
1- تسخين ابتدائي.
2- درفلة.
3- معالجة حرارية.
4- تبريد واستعدال.
5- فحص.

واحيانا بعض المصنعين بيبدلوا ترتيب المرحلة التالتة والرابعة .. فيعملوا المعالجة الحرارية الاول وبعدين يستعدلوه ..
.
طيب تشترى البطاطس المناسبة للتحمير ازاى ؟!
هات البطاطس الفاتحة اللى قشرتها خفيفة ولونها ابيض (فيه نوع احمر حلو برضو ) وتمسكها فى ايدك تحس ان ميتها قليلة .. طب انت اشتريت خلاص ومش عارف اللى اشتريتها ايه ؟ هتحطها فى مية .. لو طفت تبقى تحمير .. لو مطفتش تبقى طبيخ .. ولما تيجي تقطعها بالسكينة هتحس بخرفشة .. وهتلاقى نوعين من البطاطس واحدة نضيفة جدا والتانية عليها بقايا طين .. هات التانية لانها مزروعة فى ارض طينية مش صحراوية .. وممكن لو عايزها مقرمشة اوى تقليها على مرتين بحيث تقليها نص قلية وتطفي النار لحد ما تبرد وبعدين تولع النار تاني .. او تسلقها نص سلقة وبعدين تقليها ..