اشتغالة بوابات التعقيم

احترامًا لوقتك المقال هياخد منك دقيقة

.
مش هكلمك هنا عن جدوى بوابات التعقيم الطبية .. الاطباء هم اللى يتكلموا فى النقطة دى ..
هكلمك عن اسعارها المبالغ فيها واللى بتوصل ل 20 و 30 الف جنيه .. وهقولك هي بتتكون من ايه وازاى تعملها ببساطة حتى لو انت مش مهندس !!
.
البوابة فكرتها انها عبارة عن كابينة لما حد بيدخلها بتعمل ضباب من سائل معقم بشكل اوتوماتيك .. طيب دا بيحصل ازاى ؟
.
1- الفوجر
دى القطعة المسؤولة عن تخليق الضباب او الرذاذ .. ودى تمنها 10:20 جنيه ومستخدم بكثرة فى مزارع الدواجن والمشروم .. ببساطة بتدخلها مية بضغط الحنفية تحولها لضباب .. هتلاقيها عند بتوع مستلزمات المزارع.
.
2- سلونيد Solenoid Valve
ودا حاجة كدا بتقوم بوظيفة الحنفية .. بتفتح وتقفل المية لكن مش بشكل يدوي .. باشارة كهربية .. تديله كهرباء يفتح المية .. تفصل الكهرباء يفصل المية .. ودا هتلاقيه عند محلات قطع غيار الاجهزة الكهربية لانه هو نفسه المستخدم فى الغسالات الاوتوماتيك وهتلاقيه بسعر 40:50 جنيه لو كان ايطالي ..
.
3- بروكسيمتي سنسور
السنسور دا عبارة عن قطعة صغيرة بتحس باى حاجة تيجي ادامها من خلال انعكاس الضوء اللى بتصدره .. تمنه 60:90 جنيه ومتوفر فى محلات الالكترونيات اللى جنب كليات الهندسة وموجود فى نجيب الريحاني فى العتبة .. ود دوره انه لما حد يدخل الكابينة يحس بوجوده فيبعت الاشارة الكهربية اللى هتشغل السولينويد فيمرر سائل التعقيم للفوجرات فتعمل الضباب .. ولما اللى فى الكابينة يخرج يفصل الكهرباء فالسولينويد يقفل وميبقاش فيه ضباب .
.
.