.
هقولك على سر من اسرار الادارة ..
المستثمر لما يلاقي شركته بتحقق ارباح منخفضة او خساير وحابب يظبط الميزان بيكون طريق من اتنين :-
.
1- يزود المبيعات
عن طريق رفع جودة المنتج .. اعادة هيكلة شبكة التوزيع .. الاستعانة بموزع خارجي .. فتح اسواق جديدة .. تعديل الخطط التسويقية .. تعديل ستراتيجي التسعير .. اضافة او حذف منتجات على ليستته .. إلخ.
.
2- يقلل نفقات
يشوف مورد ارخص للخامات .. يوفر في تكلفة الانتاج .. يوفر في مصاريف التشغيل .. ينقل لمكان اصغر .. يستبدل المكن بمكن انتاجيته اعلى .. يستغني عن بعض مراحل التصنيع المكلفة جدا ويعملها اوت سورس .. يستفيد بالتسهيلات اللى بتقدمها وزارة الصناعة في المناطق الجديدة .. يخفض المرتبات .. يسرح العمال .. إلخ
.
.
المستثمر اللى بيفهم هيحلل المشكلة فيعرف الاسباب ويقسم المشكلة الكبيرة لمشاكل صغيرة ويبدأ يحط كل الادوات اللى ذكرتها على الترابيزة ويوظف المناسب منها لحل المشاكل دي ..
.
المستثمر القلقاسة مبيشوفش ادامه غير بند تقليل النفقات .. وتحديدا اخر نقطتين فيه .. خفض الرواتب وتسريح العمالة ..
.
لو ابتليت انك تشتغل مع قلقاسة فانصحك تدور على مكان تاني لسببين .. انك هتكتسب جهل مركب فيما يخص الادارة او بمعني اخر هتتعلم ادارة غلط .. وانك ممكن تطير في لحظة .. انت قاعد لان دورك لسة مجاش.
