الدرونز كمشروع تخرج

.
عملت البوست دا بسبب الاسئلة اللى بتجيلي كل سنة بخصوص الدرونز .. او بيطلبوا مساعدة فى الحصول على تصريح القوات المسلحة للعمل عليها .. البوست تكنيكال بحت مفيش داعي نشتت الحوار فى مناقشة قانون تجريم امتلاك وتصنيع الطائرات المسيرة ..
.

• الكواد كوبتر مجرد لعبة ملهاش لزمة و عيب اصلا تبقى مشروع تخرج لمهندسين.
• لو هنتكلم عن الدرونز زى اللى فى الصورة فدي مشروع بحثي ضخم محتاج فريق من الصفوة فى تخصصات مختلفة ومحتاج شغل سنين وميزانية جبارة.
• عندك تحدي فى المحرك المستخدم فيها ..ممكن تستخدم محرك كهربي .. وممكن تستخدم محرك نفاث .. او تجمع بينهم ..
• المحرك النفاث صعب الحصول عليه جدا خاصة لو كانت كفاءته عالية .. ومتحاولش تصنعه بنفسك لان فى الاساس مشروع تخرج منفصل واخرج تصنع محرك بدائي.
• المحرك الكهربي هو الاكثر شيوعا لكن محتاج واحد بكفاءة عالية جدا و صوته منخفض و هتقابلك معاه مشكلة تصميم العنفات ودى اصلا ممكن تتعمل مشروع لوحدها.
• البطاريات تحدي تاني .. انت محتاج بطاريات استثنائية وزنها خفيف و سعتها كبيرة جدا .. فيه شركات عالمية بتصنعهم وكمان بالجيومترية اللى انت عايزها .. لكن مش هتقدر تحصل عليها الا من خلال الجيش ..
• تصميم الهيكل معضلة تانية محتاجة مهندسين ماتيريال يشتغلوا عليها .. عادة بتكون كومبوزيتس وتحديدا CFRP .. ويمكن دى من الحاجات اللى قطعنا فيها شوط حلو فى مصر ..
• الطيارة المسيرة عبارة عن روبوت .. فانت محتاج تعمل Navigation System في منتهي الدقة ويكون جلوبال و دايناميك ..
• نظام الملاحة دا محتاج مجموعة كبيرة من الادوات .. ابسطها 2D-LS بحيث يعمل خريطة ثلاثية الابعاد للبيئة فى محيطها مع مجموعة من الكاميرات فائقة الدقة و منظومة للتصوير الحراري والطوبوجرافي .. تقدر كمدني تحصل على بعض الادوات دى بس لو انت نجيب ساويرس فى نفسك ..
• الشاترز معضلة اضافية .. و محتاج تأكسيز كل نوع من الصواريخ اللى هتحملها على الطيارة بحيث تربطها بالكنترول .. بعض الانواع بيبقى سهل التعامل معاها مادامت مفيهاش حساسات حرارية او ليزر .. والبعض بيحتاج انه يكونتاكت مع الطيارة لحد ما يصيب الهدف خاصة لو كان هدف ديناميكي ..
  .
  .
  اعتقد كفاية النقاط دى وان كانت تقريبا تلت التحديات الحقيقية لمشروع زى دا ..
  شيل فكرة الدرون دي من دماغك .. شيل فكرة انك ممكن تساعد فى ريسرش فى الجيش وانت فى الكلية من دماغك .. شيل فكرة انك تاخد دعم مادى بالحجم دا من اى جهة من دماغك .. شيل فكرة انك تاخد تصريح لمشروع بالحجم دا و تتوفرلك كل الامكانيات وتتوفرلك صواريخ و مقذوفات وتقعد ادامها بمفك وافوميتر ..
  .
  خليك واقعي واعمل حاجة تجيب فيها امتياز وتتعلم منها .. وانت و رزقك بقى يمكن تتوزع فى وحدة بحوث طيران لما تدخل الجيش وساعتها اوعدك ان احلامك كلها هتتحقق والكورة هتبقى فى ملعبك ..
  .
  .
  تعديل :
  عايزك تفهم كمهندس نقطة مهمة جدا
  ( مفيش حاجة سهلة بفلوس كتير ) ..