وصلنا المرة اللى فاتت لسيدنا أخنوخ ( إدريس ) اللى هو نفسه سيدنا إلياس على الراجح من اقوال علماء المسلمين .. و اللى هو هرمس الهرامسة عند اليونانيين و و و إلخ .. واتكلمنا عن شكل الدولة زمان ودا هيفيدنا جدا فيما بعد بإذن الله خاصة واننا حابين نربط كل حاجة ببعضها .. الدول وسياسات الحكم و اقوال علماء التاريخ والاثار و الاديان ..

قولنا كمان ان سيدنا ادريس اول واحد يجاهد فى سبيل الله .. جاهد نسل قابيل المجرمين اللى بيعملوا كل حاجة غلط فى حياتهم .. وجاهد فيما بعد نسل شيث واخوانه اللى نقضوا العهد وراحوا بلاد اهل قابيل من اجل المتع والشهوات .. كذلك بدأت تظهر حضارات جديدة بإختراع الكتابة .. الحكاية بدأت عند الحضارة الفرعونية .. وانتقلت العلوم من مصر للدول التانية من خلال التجارة والابتعاث ..

دى مقدمة موجزة بتفكركم احنا وقفنا فين .. هندخل بقى فى الجديد ..

سيدنا ادريس كان انسان عظيم جدا .. ونبى مقرب بشدة من ربنا .. فكانت له نبوءات متعددة عجيبة اوى .. لكنها كلها تحققت .. زى مثلا ان السماء هتفعل فعل الارض وزيادة .. الارض لحد حفيد ابن سيدنا ادريس مكنش فيها مطر .. وكانت المزروعات بتتروى ذاتيا .. الارض كانت بتطلع مية من مناطق معينة اسمها ( ينابيع الغمر ) .. المية دى بتنتشر فى الهواء على شكل ضباب .. و تتكثف على اجسام النباتات وتنزل للجذور ترويها .. فيما بعد الموضوع دا اتغير .. المية بقت تنزل من السماء .. المطر بشكله الحالي .. كمان تنبأ بهلاك البشر من خلال طوفان عظيم جدا هيجتاح الارض .. ودى بقى كانت النبوءة الاهم على الاطلاق فى حياته ..

بعد النبوءة دى مباشرة رزق بطفل .. سماه ( متشولح ) او ( متوشالح ) .. اسم مكركب شوية .. طويل حبتين .. بس معناه رهيب .. متوشالح معناها ( حينما يموت سنرسله ) .. يعنى بعد ما يموت متوشالح ربنا هيرسل الطوفان ويقضى على البشر ..

انتهت الحروب بين ادريس ونسل قابيل .. لكن كان المجتمع المسلم بدأ ينتشر فيه الفساد .. بل وظهرت عبادة الاصنام للمرة الاولى زى ما ذكرنا فى الحلقة اللى فاتت .. وهنا بقى احنا داخلين على عصر جديد .. عصر سىء جدا اشبه بالعصور السابقة اللى مر بيها الجن لما تحول من عباد اتقياء مفيهومش ولا واحد مبيوحدش ربنا وبيقيم شعائره إلى قليل من العباد كثير من الفساق والكفرة ودا اللى علشانه ربنا فرض عقوبات على البشر المسلمين .. امرهم بعدم اكل اللحوم .. كبر متوشالح .. ورث النبوة عن والده ادريس .. بدأت التشريعات الربانية تدون كقوانين مكتوبة .. انتشرت المعابد المقامة لعبادة الرب الواحد الاحد فى كل مكان .. مصر والعراق و الشام والحجاز .. لكن علي الجانب الاخر الموضوع كان مختلف ..

كل يوم بيمر كان حال ابناء قابيل بيزيد سوءا .. الموضوع تخطى مرحلة الزنا و السرقة والنهب والكلام دا .. ابناء قابيل اتقسموا لعصبيات مختلفة .. كل واحد من ابناء قابيل اخد اولاده واحفاده واحفادهم واستقلوا بنفسهم وعملوا حاجة اشبه بالقبيلة .. وليل نهار بقى في خناقات مع بعض .. فكل قبيلة كانت بتبتكر طرق جديدة تتغلب بيها على القبيلة التانية .. بدل ما كانوا بيستخدموا الحجر بقوا يستخدموا الشوم .. وبعد ما بقوا بيستخدموا الشوم بقوا يستخدموا السكاكين .. وبعد ما بقوا بيستخدموا السكاكين بقوا يستخدموا يستخدموا راجمات الحجارة ( حاجات اشبه بالمنجنيق ) .. وفى نفس الوقت مش ناسيين تارهم مع ابناء شيث بعد ما سيدنا ادريس حط عليهم وشردهم اكتر ماهم متشردين ..

كبر سيدنا متشولح وبقى شاب فى مقتبل العمر (186 ) سنة .. اتجوز وانجب سيدنا ( لامك ) .. خد بالك ( لامك ) مش ( لمك ) .. راجع الحلقات القديمة علشان تفتكر مين ( لمك ) .. بعد تقريبا 180 سنة كمان كان سيدنا متشولح صحته بقت فى انحدار .. بنتكلم عن انسان عمره حوالي تجاوز 350 سنة .. مش سن كبير مقارنة بأعمارهم فى الوقت دا لكن برضو مش سن صغير .. فأوكل النبوة لإبنه لامك وهجر الناس واخد معاه القليل من حبوب الجنة و القليل من الثياب و الصحف اللى نزلت على ادم وشيث و كتبها ادريس لاول مرة بعد اختراعه الكتابة .. وسكن فى كهف المعرفة .. كهف كبير مظلم فيه ثقب فى قمته بيدخل منه الضوء بشكل بديع مريح للعين .. وكان فيه احد ( ينابيع الغمر ) اللى اتكلمنا عليها من شوية .. فكان عنده هواء نقى و ماء نضيف و طعام متجدد بسبب ( حبوب الجنة ) .. وعاش مئات السنين يعبد ربنا فيه بعيدا عن البشر وخطاياهم ..

ايه بقى حكاية حبوب الجنة دى ؟ الحكاية بدأت من عند طرد سيدنا ادم من الجنة .. اخد معاه بعض الحبوب لنباتات واشجار فى الجنة .. الحبوب دى بمجرد ما تحطها فى الارض تنموا وتزهر وتثمر .. وبعض علماء اليهود بيقولوا ان لما سيدنا ادم نزل الارض كانت كلها صحراء .. مفيهاش نباتات اطلاقا .. وان كل حاجة حولينا دلوقتى منشأها كان الحبوب اللى اخدها سيدنا ادم من الجنة و زرعها لما نزل الارض .. لكن الكلام دا مش مقبول اوى بالنسبالي .. طب والحيوانات اللى كانت عايشة على الارض كانت عايشة ازاى ؟!! فالكلام مش منطقي .. وعموما انا ذكرت حدوتة حبوب الجنة دى علشان هنحتاجلها فى الحلقة الجاية او اللى بعدها ان شاء الله ..

تدهور الحال اكتر فى عهد سيدنا لامك ابن متشولح .. سيدنا ادريس جده كان فرض على الناس الصلاة والصوم والزكاة و حرم الخمور وحاجات تانية كتير .. والناس ايمانها بيضعف بمرور الوقت .. فبدأوا يفرطوا فى الصلاة .. وبعدين يفرطوا فى باقى الفروض .. وبعدين يعملوا بعض الشركيات .. ومنهم شريحة عريضة جدا كفرت بالله واتجهت لعبادة الاصنام والنجوم ( ركز فى حتة النجوم دى علشان هنرجعلها بعد كدا ) .. فأخد لامك المؤمنين وقرر يهجر أراضى الكفر ويروح مكان يعبد فيه ربنا على نضيف ..

استقر لامك فى منطقة بعيدة .. وخلاص بقى اهله اتعودوا انهم مياكلوش لحوم وعاشوا على الزراعة .. متشولح موجود في كهف المعرفة فوق قمة جبل فى مكان تاني .. نسل قابيل موجودين فى مكان تالت .. باقى ابناء شيث اللى كفروا حديثا مستوطنين اماكن غيرها فى بابل و مصر و الشام والحجاز ..

وتنتهى حدوتة النهاردة بزواج لامك وانجابه سيدنا نوح .. وعلشان نبقى منظمين كل اللى فات فى دماغنا هقولكم اسم سيدنا نوح بالكامل

نوح بن لامك بن متشولح بن اخنوخ بن يارد بن مهلائيل بن قينان بن أنوش بن شيث بن ادم