.

في يوم كان عمرو بن مالك ماشي هو وبنته الشابة وصحبة ابرزها زياد بن النضر في الصحراء وشاف مكان بيتدفق منه المية .. فبعتها تجيب شوية مية وترجع ..

.

البنت اتأخرت .. نادى عليها مردتش .. قلبوا الدنيا عليها لكن ملهاش اثر ..

.

مرت سنين طويلة .. ابوها عمرو أسلم وحسن اسلامه ..

مرت سنين تانية وجت خلافة عمر بن الخطاب .. وفي يوم بدون مقدمات ظهرت ادامه بشعر واظافر طوال جدا ..

.

مالك يابنتي وكنتي فين ؟

جماعة من الجن خطفوني ..

.

وهربتي منهم ازاي ؟

مهربتش .. الجماعة اتخذوني جارية .. واسلموا وجاهدوا في سبيل الله .. فنذر كبيرهم انه لو قدره الله على قبيلة من قبائل الجن المشرك هيطلق سراحي .. وقامت بينهم معركة انتصر فيها المسلمين ..

.

وقاللي انتي زي بنتي .. بيني وبينك أمارة .. لو احتاجتيني في اي وقت صيحي باسمي هجيلك ..

.

ابوها احتضنها وقص ضوافرها وظبط شعرها واغتسلت ولبست لبس كويس ورجعت بنت تاني زي بنات سنها .. فجوزها ..

.

جوزها في مرة كان معاها في السرير وحصل منها حاجة معجبتوش فعايرها وقالها يا مجنونة .. مانتي كنتي في كنفهم (يقصد انها جامعها الجن فغير ميولها) ..

.

وجعها كلامه اوي فصاحت .. صوتت .. نادت على الجني اللي كانت معاه .. وفجأة..

.

ينادي منادي من السماء .. ساوند سيستم مغطي المدينة كلها .. يا معشر بني حارث اجتمعوا ..

الناس اتجمعت على الصوت .. انت مين ياعم اللي بتتكلم ومش شايفينك ؟!

.

أنا راب الفتاة .. رعيتها في الجاهلية بحسبي وصنتها في الاسلام بديني .. والله ما مسست منها محرما .. وانها دعتني فسألتها فقالت زوجي عيرني بكم .. و والله لو كنت تقدمت إليه لفقأت عينه ..

.

فالناس هدوه وجوزها اعتذرله والدنيا هديت .. لكن ست عجوز ظهرت من بين الناس فجأة وقالتله خد يا ولا .. عايزاك ..

.

الجن قالها خير يا ماما ..

قالتله انا بنتي طلع بثر ( بروز صغيرة شبه القرنبيط ) بوظت شكلها .. عندك حل؟

.

قالها روحي عند الانهار هتلاقي ذباب طويل الاقدام .. خد. واحدة منه واجعليها في عهن (العهن اللي هو الصوف .. اوعى متكونش حافظ سورة القارعة .. كالعهن المنفوش) .. عهن مصبوغ بسبع الوان وحددها .. وبعدين وضحلها ازاي تستخدمه وفعلا البنت شفيت تماما ..

.

وتوتة توتة .. خلصت الحدوتة من (أخبار الأصمعي)..