ما خلصنا اليه في موضوع اجهزة التنفس الصناعي..

.
ممكن نوصل لنفس فعالية الاجهزة المتاحة في السوق بسعر اقل.. لكن مستحيل نوصل للنتيجة دي بتكلفة ١٠٠٠ ولا حتي ١٠٠٠٠ جنيه.. ببساطة الاجهزة مليانة Sensors بريزوليوشن مخيف جدا و Actuators بمعدلات استجابة خيالية و قدرة علي العمل بكامل كفائتها لفترات طويلة متصلة..

.
ومفيش عاقل يقول اننا هنصنع المكونات دي بنفسنا..
هقولك حاجة توضحلك الدنيا.. سنسور واحد من المستخدم في روبوت رسالتي جبناه من المانيا باكتر من ١٦٠ الف جنيه.. متخيل؟! (الكلام دا كان قبل التعويم بالمناسبة)
.
بالنسبة للشباب اللي قرروا يصنعوا الاجهزة دي.. رجاءا متصعبوهاش علي نفسكم فيما يخص ميكانيزم سحب وضغط الهوا..
ببساطة هاتوا موتور وبالون تنفس يدوي.. ركبوا علي اكس الموتور كامة.. او اسطوانة بس تثبت اكس الموتور بعيد شوية عن السنتر..
هتحصل بكل بساطة علي حركة الضغط الترددية علي البالون وكمان هتسهل التحكم فيه لان معدل الشهقات والزفرات هو ببساطة عدد لفات الموتور في الدقيقة ودي سهل تتحكم فيها جدا. ولو حابب تتحكم في كمية الهواء فما عليك الا انك تبعد الموتور او تقربه.. بس كدا!
.
انت كمهندس تصميم ميكانيكي مطلوب منك تحقق اعلي فعالية.. باعلي استقرار واعتمادية.. مع بساطة في التصميم تضمن سهولة التصنيع والصيانة. وكل دا بتكلفة اقل ما يمكن..
.
انا مبقولش الكلام دا علشان احبطكم.. انا بقولكم خلاصة فترة عمل شاقة ليا و٤ دكاترة استمرت اسبوعين تقريبا..
.
وبخصوص الشركة اللي نشرت تصاميم احد موديلاتها.. التصاميم الميكانيكية مترفعتش لسة ودي الاهم.. ناهيك انك لو راجعت مخططات الكنترول هتعرف انها عدد كبير من السنسورز ودي اتكلمنا عنها.. فلحد دلوقتي ملهاش لزمة.. ولو نشروا ملفاتهم كاملة ثق تماما ان الموضوع معقد جدا ومحتاج تيم كبير شاطر وصبور و مزود بامكانيات الشركة دي..
.
.
اقولك الخلاصة (وفقا لرأيي الشخصي في حدود معرفتي بالسوق والهندسة)
الحوار مش هيتحل غير بالهندسة العكسية.. وهياخد وقت كبير جدا لو اخدناه بجدية.. ومينفعش تيم يشتغل بدون طبيب فيه..
.
بالمناسبة.. واسف جدا في اللي هقوله دا بس مش بايدي..
انا اديت اوردر امبارح بوقف الشغل في اجهزة التنفس والروبوتات لحد ما يتعطل الحظر.. ولولا ان ملفاتها مليانة منشنات لحاجات تكنيكال بنعتبرها من اسرارنا كنت نشرتها علشان تكملوا عليها..
.
ربنا يزيح الغمة