ابناء قابيل قتلوا لامك ابو نوح .. نوح ورث النبوة واخد قومه وهرب فى مكان بعيد عن عيونهم .. عاش نوح واتجوز وانجب 4 اولاد سام وحام ويام ويافث .. سام وحام اتجوزوا .. لكن قبل زواجهم فيه قصة غريبة اوى بيعشقها سكان اوروبا وامريكا وقبلهم الصهاينة .. القصة كانت فى طفولة حام .. الابن التاني لنوح .. مكنش يام ولا يافث لسة اتولد .. كان نوح مخلف سام وبعده بفترة انجب حام ..

الحدوتة موجودة فى العهد القديم وبتقول ان سيدنا نوح كان بيستحمي فى مكان ما .. ربما يكون كهف .. وحام اللى كان طفل تسلل ونظر الى عورته وقاله ( هاهاهاها .. شوفت كل حااااااااجة ) .. انغاظ سيدنا نوح من اللى عمله العيل الصغير ودعى عليه باللعنة وعلى ابنه كنعان ونسله .. وحكم عليهم انهم يشتغلوا فى خدمة سام ويافث ونسليهما .. والقصة دى فكسانة لأكتر من سبب .. ازاى دعى نوح على كنعان ابن حام بالرغم ان فى الوقت دا حام كان لسة عيل صغير مش كبير ومكنش لسة اتجوز ولا خلف .. مجرد طفل ؟؟ طب اشمعنى كنعان وذنبه ايه فى الحوار دا ؟؟ عندك ابناء تانيين لحام زى مصرايم وكوش .. اشمعنى كنعان مش حد تاني ؟؟ طب هل غلطة عيل صغير تخلى ابوه ( النبي ) يدعي عليه باللعنة ليوم الدين و يشغله عبد عن اخواته ؟؟ بالاضافة الى ان الاوروبيين بيحوروا فى القصة لحسابهم والاسرائيليين بيحوروا فى القصة لحسابهم .. فتلاقى مثلا الاسرائيليين بيقولوا ان كنعان اللى اتلعن مع حام دا هو نفسه ( يام ) اخوه .. طب ليه غيروا القصة بالشكل دا ؟ علشان حام من نسله مصرايم .. ومصرايم ابو المصريين واحنا عارفين اللى بين المصريين والاسرائيليين من آلاف السنين .. ومع ذلك هم بهايم .. حرفوا القصة دى ونسيوا مواضع تانية فى الكتاب المقدس بتثني على المصريين .. مثلا هتلاقى الاية اللى بتقول ( مبارك شعبي مصر ) فى سفر إشعياء .. ومواضع تانية مش حابب اذكرها لان فيه بنات بتقرأ القصة .. احنا بالصلاة ع النبى جامدين اوى

كبر سام وحام واتجوزوا .. يام و يافث لسة كانوا صغيرين .. وبعدين نام سيدنا نوح فى احد الليالي وشاف اهم حلم فى تاريخ البشرية .. شاف الارض بتغرق .. الحياة بتتدمر .. البشر بيتم ابادتهم .. منظر مهيب جدا .. دمار دمار دمار .. وبعدين ربنا امره فى الحلم انه يبني سفينة كبيرة وياخدها على ظهرها انواع مختلفة من الحيوانات والطيور .. الحلم كان بيتكرر بشكل دائم .. ولإن نوح عارف نبوءة جد ابوه اخنوخ ( ادريس ) فهم الموضوع على طول .. وطلع اخبر قومه باللى شافه وقالهم نهاية البشر قربت وتوبوا الى الله قبل ما يقضى عليهم وتخلدوا فى النار و و و و .. لكن بدون جدوى .. ضحكوا عليه وسخروا منه .. وقالوله طب انت ربك امرك تعمل سفينة .. هتجيب خشبها منين واحنا فى منطقة جبلية مفيهاش غير حشائش ؟ سؤال كان منطقى عقلا .. لكن شرعا سؤال عقيم .. العقل البشرى امكانياته محدودة جدا .. فمتجيش على امر الهي وتحكم عقلك فيه وتقول انفذه ولا منفذوش !! انا وانت عقولنا اقل بكتير من انها تستوعب سبب وحكمة كل امر وكل نهي وكل سنة كونية شرعهم الله ..

اوبااااااااا.. سيدنا نوح فى مأزق .. صحيح هو هيبنى السفينة ازاى ؟؟ نام فحلم بحلم ربنا اخبره فيه بأبعاد السفينة .. السفينة طولها 150 متر وعرضها 75 متر و ارتفاعها 15 متر .. يعنى طولها كان بإرتفاع عمارة من 50 طابق علشان تتخيلها .. وبعدين المشكلة مش ابعادها الخارجية بس .. المشكلة فى عمارتها من الداخل .. انت محتاج تعملها من جوة زى فندق .. فيه مئات الغرف وربما الآلاف .. كل نوع من انواع الحيوانات والطيور فى غرفة خاصة بيه .. وتعمل مناطق للحيوانات المفترسة و مناطق للحيوانات العشبية و مناطق للزواحف ومناطق للطيور .. كمان محتاج تعمل طرقات علشان توصل بسهولة لكل غرفة فيهم علشان لما توديلهم الاكل والمية .. كذلك محتاج تعمل نظام تهوية محكم .. وتقسم السفينة لطوابق مش دور واحد .. محتاج تعمل خزانات مياه عزبة .. محتاج تعمل سقف للسفينة يتحمل سقوط الامطار الغزيرة بشكل مستمر .. محتاج تعمل حاجات كتير جدا .. انت بتتكلم عن بناء سفينة عملاقة .. اكبر سفينة على مر العصور القديمة ..فالموضوع كان صعب جدا سواء بناء السفينة بالاحكام دا فى وقت مكنش فيه مكن لحام ولا فنيين ولا مهندسين عباقرة .. او توفير الاخشاب اللازمة لبنائها ..

يروح يمين يروح شمال .. برضو محتار و تايه .. مش عارف يعمل ايه .. حياته اتحولت لجحيم .. معظم قومه بيسخروا منه .. زوجته و اولاده بس اللى كانوا بيتبنوا الفكرة ومكملين معاه .. لحد ما ضاق بيه الخناق فقرر يروح لجده ( متشولح ) .. اللى هجر الناس وطلع يعيش فى كهف المعرفة فوق قمة جبل عالى جدا بعيد عن البشر واستمر فى عبادة ربنا على مدار مئات السنين .. اتكلمنا عنه فى الحلقة الخامسة تقريبا .. طلعله .. مكنش يعرفه .. لقاه رجل عجوز جدا .. شعره ابيض وطويل ومنتفش .. عظامه بارزه من لحمه .. عيناه جاحظتان .. طالعين لبرا .. ماسك عكاز خشبي وقاعد فى وسط الكهف يصلى ويسبح .. اول ما دخل عليه نوح عرفه على طول .. متشولح عرف نوح بالخاتم اللى فى صباعه .. خاتم النبوة .. فعرف ان النبوءة اوشكت ان تتحول لحقيقة .. فنادى عليه وسأله عن اسمه فقاله انه نوح بن لامك .. عايز ايه ؟ ربنا كلفني بعمل سفينة لحفظ الاجناس التانية لانه قرر يقضى على الجنس البشرى .. وايه مشكلتك ؟؟ مشكلتى انى مش عارف اجيب خشب منين ولا عارف اعملها ازاى ..

وضع متشولح ايده فى جرابه واخرج بعض من صحف ادم وشيث ( حاجة كدا زى القرآن ) كان ملفوفة ففكها واخرج منها حبوب ( تقاوي ) .. شكلها غريب جدا .. اعطاها لنوح وقاله دى ميراث النبوة .. حبوب احضرها جدك ادم من الجنة .. اخدهم نوح من غير ما يعرف يعمل بيهم ايه .. فكرهم مجرد رموز دينية .. زى الحجر الاسود كدا .. مجرد حاجات مقدسة و ميراث ديني .. وهو راجع وقعت منه بذرة فى الارض وفجأة هووووووووووووب طلعت شجرة ضخمة جدا ارتفاعها عشرات الامتار .. كبرت لحظيا .. فى ثواني .. فرح جدا نوح بكدا .. ورجع طاير من الفرحة لاهل بيته ..

الحبوب دى كانت اشبه بحقنة أنسولين لمريض سكر .. اهل بيت نوح كانوا خلاص بدأوا يشكوا وايمانهم يضعف .. بمجرد ما رمى الحبوب دى ادامهم وكبرت وبقت اشجار اطمئنوا بعض الشىء .. كذلك قومه .. نفس الكلام .. لكن الموضوع مدامش كتير .. نوح لسة ادامه مشكلة .. ازاى هيقطع الخشب وازاى هيبني السفينة !! وبعدين نص البذور اللى رماها فى الارض طلعت نخل .. ودا خلى الناس تضحك عليه .. انت بتبنى سفينة ولا بتعمل عجوة ؟!!

بدأت مرحلة جديدة من حياة سيدنا نوح .. كان بينام فيشوف ايه اللى المفروض يعمله لما يصحي .. وازاى بقى هيقطع الخشب وايه ابعاده اللى يقطع بيها وازاى يجففه و ازاى يعقمه بحيث بعد كدا لما يكون فى المية متنتشرش عليه فطريات تاكله وتخرمه .. إلخ .. وبعد فترة ظهرت فايدة النخل اللى كانوا بيتريقوا عليه .. فايدته انه كان بياخد سعفه ويستخدمه لربط الاخشاب ببعضها .. اشتغل على بناء السفينة نوح واولاده .. زوجته وزوجات سام وحام كانوا بيقدمولهم الطعام و الشراب وبيغسلولهم ملابسهم ويحيكوها ويقوموا بالاعمال المنزلية .. واستمرت عملية بناء السفينة اكتر من 120 سنة !!

هكتفى بالجزء دا من الحدوتة المرادي وكنت ناوى اكلمكم فى نسل نوح علشان كل واحد يعرف يحدد جده مين لكن فضلت انى اخصصلها حلقة منفصلة بعد ما انتهى من حدوتة سيدنا نوح المكونة من 3 اجزاء ..