وقفنا عند هجرة الحبشة والاستضعاف اللى بقى فيه المسلمين وفجأة الدنيا تتقلب ..

حمزة أسلم يا قوم .. حمزة عم النبي صلى الله عليه واله

سيد من سادات قريش .. طول بعرض .. قوة مفرطة .. سيف في جنبه مبيفارقوش ..

3 ايام بالظبط ويؤمن عمر بن الخطاب .. يا الله ..

.

الدنيا تتغير جدا .. تعذيب قريش للمسلمين الجدد يقل بشكل كبير اوي ..

عدد ضخم من اهل مكة بدأوا يدخلوا الاسلام .. ما خلاص بقى حمزة وعمر اسلموا ..

شوف دا حتى عبد الله بن مسعود قالك ( ما زلنا أعزة منذ أسلم عمر ) ..

.

ونزيد على الكلام دا نقطتين ..

حادثة حصلت عند الكعبة .. الكفار كانوا بيخافوا يسمعوا القرآن علشان متلينش قلوبهم

فكانوا اول ما يسمعوا حد بيقرأ قرآن يسدوا ودانهم ويشوشوا عليه ..

فييجي النبي عند الكعبة و يقرأ سورة النجم كاملة..

والنجم إذا هوى .. ما ضل صاحبكم وما غوى .. وما ينطق عن الهوى .. ان هو الا وحي يوحى ..علمه شديد القوى ..

.

من أثر القرآن على قلوب المسلمين اللى كانوا موجودين في محيط الكعبة سجدوا لله ..

والعجيب بقى ان المشركين سجدوا معاهم ومحسوش بنفسهم .. اللى هو ايه دا .. انا سجدت يا جدعان !!

.

النقطة التانية هي حادث انشقاق القمر ..

الكفار تحدوا النبي صلى الله عليه واله .. اثبتلنا انك نبي ..

هوووووب ينشق القمر بحيث يظهر نصه اعلى قمة جبل والنص التاني اعلى قمة جبل تاني ..

ويمكن أثر المعجزة دي النفسي على النبي كان اكبر من اثرها على المشركين .. صحيح فيه اسلموا لكن المكسب الاكبر الشحنة الايجابية اللى تلقاها النبي

ربنا شق علشانه القمر يا جدعان !!

.

.

ييجي بعدها عام الحزب .. ابو طالب يموت .. امي خديجة تموت .. تخيل اكبر داعمين للنبي يموتوا .. اكتر اتنين كانوا سبب في اتقاء شر قريش يموتوا ..

احن اتنين على النبي يموتوا .. ومش هطول الكلام في الموضوع دا علشان مش طالبة نكد الليلادي بصراحة ..

لكن الشىء بالشىء يذكر اني زمان كنت بسرد السيرة و طلع شاب قالك لم يثبت عن النبي انه سماه بعام الحزن .. يادي النيلة ..

يابني يا حبيبي .. افتح اي كتاب سيرة في الدنيا .. لو لقيت اكتر من ربع الاحاديث اللى فيه صحيحة احلق شنبي ..

عادي جدا والله باجماع المسلمين ناخد بالاحاديث الضعيفة في السيرة والسنن والمغازي .. وكنت عامل لايف من ايام بشرح فيه الموضوع دا بتوسع ..

.

.

المهم

بعد عام الحزن الحال تبدل .. مش كنت بكلمك عن منعة عمر و حمزة وانهم كانوا بيحموا النبي والمسلمين ؟!

لكن ابو طالب كان اشد الحصون لسيدنا النبي ضدهم .. فبدأوا صولات وجولات من الغلاسة والتضييق و الترهيب و المضايقة بل واكتر من مرة حاولوا قتله ..

مثلا من المرويات انه لما كان بيمشي في السوق كانوا بيشيلوا تراب ويرموه على راسه الشريف .. فيرجع لامي فاطمة وكانت في سن تانية اعدادي تقريبا وتغسله ..

.

ضاق الحال .. لكن يستسلم النبي ؟! مستحيل

قالك اطلع على الطائف .. يمكن ربنا يهديهم للاسلام ..

وأخدها مشى من مكة للطائف .. مسافة زي بالظبط ما بين شبرا الخيمة وطنطا ..

.

لكن كما هو المتوقع .. الطائف كانت نسخة من مكة ..

دعوة النبي محمد هتقلب موازين القوى عندهم و كمان هتضر بتجارتهم ..

الطائف كان فيه اللات .. عارفين اللات والعزى ؟!

اللات دي كانت واحدة من اكبر الهة العرب .. العرب كانوا بيعبدوا ثالوث من 3 الهة .. واللات دي بالنسبالهم كانت بنت الله ..

عارف اللى بتفكر فيه بس متضحكش لتلبس قضية ازدراء اديان ..

.

اهي اللات دي بقى كانت في الطائف .. وكان ليها بيت بيضاهي الكعبة والعرب بيحجوا له .. وطبعا التجارة منتعشة بسببها ..

على عكس المعلومة الشائعة ان اللات كانت في مكة .. دا يادوب نسخة هاي كوبي بس مش اكتر .. لكن الاصلية كانت عند ثقيف في الطائف ..

.

.

خبطة ورا خبطة ورا خبطة .. يا الله

لكن ربنا يصبره بحادثة حصلت له وهو راجع ..

كان واقف بيصلي قبل مكة في جوف الليل وقرأ القرآن .. سمعه 7 من الجن فأسلموا وجريوا على قومهم يبلغوهم بالرسالة ..

ومرة تانية يؤمر النبي بدعوة الجن .. غالبا كنتيجة لتبليغ عشيرة الجن بالرسالة فعايزين يسمعوا بنفسهم منه ..

فيطلب النبي واحد من الصحابة ميكونش في قلبه مثقال ذرة من كبر يروح معاه .. فيتطوع سيدنا عبد الله بن مسعود ..

يمشى لخارج مكة و بعدين يرسمله خط على الارض ويقوله اياك تعديه .. لو عديته لا هشوفك ولا هتشوفني ليوم القيامة ..

ويبعد النبي شوية وبعدين تظهر غيامات سودا كدا .. ظلال غريبة .. تيجي من بعيد وتلتف حوله لدرجة ان سيدنا بن مسعود مبقاش شايفه ..

في الليلة دي امن عدد كبير جدا من الجن ..

.

وبالمناسبة .. نفهم من كلامنا هنا ان الجن كان فيهم صحابة .. مش الصحابي اللى لقى النبي بعد بعثته وامن بيه ؟! طب ماهو دا بينطبق على الجن ..

.

.

تمر الايام وربنا يهادي سيدنا محمد برحلة للتفريج عنه .. لسة الحزن مالي قلبه ..

فتيجي رحلة الاسراء والمعراج بكل تفاصيلها اللى سمعتوها ألف مرة .. الله على الجمال ..

دي مكانتش مجرد رحلة لتفريج الكرب .. دي رحلة شرعت فيها الصلاة اللى كان بيرتاح بيها قلب النبي .. ارحنا بها يابلال .. بيرتاح لانه اتصال مباشر بينه وبين ربه ..

وكانت رحلة لتثبيته واطلاعه على حاجات محدش غيره اطلع عليها ..

ورحلة لتأهيله للي جاي ..

.

خد بالك .. دا بعد سنة بالظبط هيؤمر بالهجرة للمدينة .. الموضوع مش سهل ومحتاج اعداد نفسي للنبي قبل الاخذ بالاسباب المادية ..

.

في الوقت دا ييجي دعم نفسي ومادي تاني للنبي ..

12 واحد من المدينة يقرروا يروحوا متخفين بين الحجيج ويقابلوا النبي

وسبحان الله يقابلوه في العقبة .. مش العقبة بتاعة الاردن ولا الخليج طبعا .. العقبة مكان جنب مكة .. نفس المكان اللى شاف فيه النبي اصعب يوم في حياته من سنتين ونزله جبريل ومعاه ملك الجبال ويقوله ان امرتني لأطبق عليهم الاخشبين .. هفرمهم بين جبلين من جبال مكة ..

اليوم دا كان اصعب من يوم احد نفسه ..

.

المهم يؤمنوا .. 12 واحد من الاوس والخزرج .. ويمكن منهم خمسة كانوا اسلموا مسبقا وجايين يجددوا ايمانهم و واخدين في ايديهم رفاق .. مؤمنين جدد ..

.

بعدها بسنة يحصل اجتماع اكبر واعظم .. بيعة العقبة الثانية .. 70 رجل و امرأتين ..

كلمة بيعة عموما معناها ببساطة ( انا من ايدك دي لايدك دي ) .. معناها اعلان للولاء وتسليم بالطاعة ..

بيعة العقبة التانية كانت بمثابة اجتماع كبير حطوا فيه اساس دولة المسلمين ..

.

.

كدا خلاص بقينا جاهزين للهجرة والانتقال من مرحلة الضعف لمرحلة القوة والبأس ..

.

طيب السؤال المعتاد علشان نرسم خريطة ذهنية للاحداث في دماغنا .. لحد هنا النبي كان عنده كام سنة ؟!

53 سنة ..

احنا حكينا النهاردة احداث 6 سنين من حياته صلى الله عليه واله ..

انت عايز تقوللي ان النبي كان عنده 50 سنة وراح مسافة من شبرا لطنطا ورجعها تاني مشى ؟!

اه يا معلم .. شوفت بقى عمل ايه علشان الاسلام يوصلك لحد عندك ؟! صل عليه بقى ..

.

هكتفي بالقدر دا المرادي وبكرة نتقابل في الحلقة الجديدة ان شاء الله