.
ورقة وقلم واكتبي ورايا يا ست الكل ..
هنعمل اوضة من الطين ارتفاعها 10 شاكو و وطولها وعرضها حوالي 3.5 شاكو .. يعني حجمها تقريبا 12 كوكو .. والشاكو دى وحدة قياس يابانية =30.3 سم .. اما الكوكو فهو وحدة لقياس الحجم بتساوي تقريبا 280 لتر ..
.
هنولع فيها النار لحد ما تخرج كل الرطوبة منها وتتحول جزئيا لفخار ..
.
بعدها بنجيب حطب الصنوبر ونولعه لحد ما نوصل لدرجة الحرارة المناسبة ( واللى مستحيل بأى حال من الاحوال توصل لدرجة انصهار الحديد ) .. وبعدين بنحط رمل الحديد ( صخور مشهورة فى اليابان ) ومعاه شوية فحم .. ليه ؟!
.
علشان بنصنع صلب .. ومفيش صلب بدون كربون ..
كل ما نسبة الكربون المخلوطة بالحديد بتزيد .. صلابة و صلادة الصلب الناتج عنهم بتزيد ..
.
.
طيب ماحنا قولنا ان درجة الحرارة عمرها ما هتوصل للانصهار !!
دا حقيقي .. لكن بتكون كافية جدا لخلط الحديد بالفحم .. متنساش انك بنتكلم عن (رمل) حديد .. مش كتل كبيرة..
.
العملية دي بتستمر اسبوع .. كل شوية يضيفوا رمل حديد وفحم .. وبعد الاسبوع ما يعدي بينطفي الفرن دا و يسيبوا الحديد يبرد .. بعدها بيهدموه وبيتبقى الحديد بعد اندماجه مع الكربون اللى فى الفحم وبيترسب على شكل طبقات فوق بعضها بيسموها (الكيرا) .. كل طبقة مكونة من فولاذ بتختلف درجة تشبعه بالكربون عن الطبقة اللى فوقه واللى تحته .
.
بيفصل الحداد طبقات الكيرا .. ينقى الصلب مرتفع الكربون ويركنه على جنب علشان تصنيع النص .. والصلب منخفض الكربون ويركنه على جنب علشان تصنيع قلب السيف .. لييييييييه ؟!
.
لسة قايلين نسبة الكربون العالية معناها صلادة وصلابة اكبر .. بس بتكون هشة لو اخدت صدمة مفاجأة هتنكسر .. فبنعمل السيف طري من جوة و مقرمش من برا ( فاكرين مقال قضبان القطر والبطاطس المحمرة ؟ ) ..
.
بييجي بعد كدا بقى دور كفار قريش .. فنيين تشكيل السيف .. بياخدوا الصلب منخفض الكربون الاول .. يفضلوا يطرقوا فيه يطرقوا فيه لحد ما يتحول لالواح او بمعني اصح ( خوص ) .. ويشكلوا منه قلب السيف ..
.
بعدها بيجيبوا الصلب مرتفع الكربون .. ويطرقوه .. اللى بيطرقه هنا خبير .. بيحس من الطرق ان كانت نسبة الكربون فيه اعلى من اللازم ولا مناسبة .. ولو اعلى من اللازم بياخد شوية صلب منخفض الكربون ويضيفه له ويطرقهم مع بعض بطريقة بيييييييض بس فعالة ..
.
الطريقة دى انه بيحط خوصتين فوق بعض ويطرق يطرق يطرق لحد ما يتحولوا لصفيح ( الواح سمكها بسيط ) .. وبعدين يتنيهم على بعض .. ويطرق يطرق يطرق لحد ما يتحولوا لصفيح تاني .. ويكرر العملية دى 16 مرة لحد ما الصلبين يندمجوا مع بعض وتتظبط نسبة الكربون ويحصل على خامة النصل المثالة .. وبعد كدا يبدأ الطرق التاني بهدف التشكيل ..
.
بعد ما بنوصل للصلب المثالى للنصل والطبقة الخارجية للسيف .. بيتغلف قلب السيف بيه وبيتم دمجهم عن طريق الطرق مرة تانية ..
.
طيب فى وسط الكلام دا عايزك تاخد بالك من نقطة مبيكزش معاها معظم مهندسين ميكانيكا .. هو ليه احنا بنشكل السيف بالطرق اصلا ؟! ليه مينفعش نصهره ونسبكه زى ما بيحصل فى افلام الجاهلية اللى كلها هري سواء فى التأريخ الديني او صناعة السيوف؟!
.
السبب ان المسبوكات بتكون هشة جدا مع احتمالية كبيرة لوجود البخبخة ( فقاعات الهواء داخل المسبوك ) .. لكن الطرق مفيهوش المشكلة دى .. بالعكس .. دا بيدينا متانة اكتر من المعدن بسبب الخاصية اللى بقول بيغفل عنها معظم المهندسين واللى اسمها (Strain Hardening) ..
كل ما المعدن يتعرض لاجهاد ينتج عنه استطالة بتزيد قوته و صلادته .. فتخيل بقى سيف بياخد اسابيع من الطرق !!
.
بعيدا عن كل الحوارات و وجع القلب دا .. دي صورة مطوة قرن غزال .. كانت بتتباع ب 120 جنيه فى العتبة بعد ثورة 25 يناير .. وبتجيب من الاخر لا سيف ساموراي بقى ولا بتنجان .. مش لازم فزلكة !!

تعديل :
انا عمري ما اشتريت مطوة فى حياتي وفقرة المطوة للهزار بما فيها سعرها .. ولا عمري حتي شلتها .. انا معايا حلوان 9 مم 😎