الشاب مكلف بايه من مصاريف الزواج شرعا ؟!
.
الاسلام ترك الامر دا للعرف ولحاله وحال البنت اللى حابب يتجوزها …
هديك مثالين ممكن يتهيألك انهم ضد بعض .. لكنهم مش كدا ..
.
لما راحت صحابية تهب نفسها لرسول الله – صلى الله عليه وآله وسلم – فرفضها قام احد الصحابة وقاله : إن لم يكن لك بها حاجة يا رسول الله فزوجنيها .. لما سأله النبى عن المهر قال مش معاه .. قاله التمس ولو خاتم من حديد .. خاتم بخمسة جنيه و وليها يوافق والاشهار متحقق وتبقى مراتك وتاخدها على بيتك .. دا الصحابي كمان مكنش معاه تمن الخاتم فعرض قميصه والنبى رفض لانه مش هينفع يخلعه ويمشى عريان ولا ينفع يبقى مهر وهو لابسه .. و زوجه ببعض من القرآن ..
.
القصة التانية لما ستنا فاطمة بنت قيس راحت تستشير النبي في ناس تقدموا لخطبتها منهم سيدنا معاوية .. رفض سيدنا معاوية .. ليه ؟! قالك : أما معاوية فصعـ.ـلوك ( فقير يعني ) لا مال له ..
.
طب نفهم ايه من القصتين ؟!
نفهم ان حديث الواهبة كان في بداية الهجرة .. المسلمين فقراء .. المجتمع بيمر بأزمة اقتصادية ولو كل واحدة استنت اللى يجيبلها فيلا تمليك على حدايق يثرب محدش هيتجوز .. وتأخر الزواج كـ.ـارثة لو اصاب اي مجتمع ..
.
اما حديث فاطمة بنت قيس فكان غالبا قبل فتح مكة مباشرة .. علشان تستوعب الفرق خليني اقولك سيدنا عبد الرحمن بن عوف مثلا وقت حديث الواهبة كان بيبيع جبنة في السوق .. وقت حديث فاطمة كان ملياردير ..
.
فانت علشان تعرف احنا مفروض نتعامل مع تجهيزات الزواج ازاي .. محتاج تسأل نفسك احنا دلوقتي في وقت ازمة ولا الدنيا حلوة وكل شاب بيحوش من مصروفه ويشترى شاليه في الساحل الشـ.ـرير ؟!
.
ربنا ييسرها على الاتنين ( الرجالة ) اللى بيتحملوا تكاليف الزواج .. العريس وابو العروسة .. بس نهدى شوية الله يهدينا ويهديكم ..