رجولة المصريين ضد الفاطميين

بالظلم والجور قد رضينا .. وليس بالكفر والحماقة
إن كنت أعطيت علم غيب.. فقل لنا صاحب البطاقة
بيتين الشعر دول كتبوهم المصريين على المنبر قبل صعود الخليفة الفاطمي ( العزيز بالله ) كنوع من المعارضة السلمية ..
.
الدولة الفاطمية مكانتش دولة اسلامية حتي لو ادعت دا .. كانت دولة ( كافرة ) دينها هو الدين الشيعي الاسماعيلي ( وان كنا مبنكفرش عموم الشيعة لكن دى فرقة من الفرق اللى بنجزم بكفرها وكذلك الازهر ) .. نفس الفرقة اللى انحدر منها القرامطة اللى اغاروا على مكة و قتلوا المتعلقين باستار الكعبة وتحدي كبيرهم الله و سرق الحجر الاسود وكسره ..
.
المصريين كانوا معظمين للسنة .. ودا كان السبب الرئيسي فى كرههم للفاطميين اللى بنوا المسجد الازهر ليكون جامعة لنشر التشيع .. بالاضافة الى فرض بعض قوانين الشيعة على عموم المصريين والمخالفة للكتاب والسنة .. وبالاضافة للسبب دا ففيه اسباب اقتصادية تانية زى الغاء العملات القديمة وصك عملات جديدة عليها المعز ودا اضر بالمصريين عموما ..
.
اول الثورات بدأت من بور سعيد .. وقفوا وقفة رجالة ضد الفاطميين واستغلوا اغارة القرامطة على الفاطميين فتجهزوا عسكريا للاغارة علي جند الدولة العبيدية ( الفاطمية ) لكن تم وأد ثورتهم .. وتكررت مرة تانية و قتلت فى مهدها ..
.
بعدها قامت عدة ثورات بجوار القاهرة واللى انتشر فيها مثل بنستخدمه لحد النهاردة ( امشي جنب الحيط يحتار عدوك فيك ) .. سبب المثل دا ان المصريين كانوا محظورين من دخول القاهرة .. وكانت حكرا على الفاطميين .. وكانت مسورة بحوائط بمحيطها واى مصري كان بيقرب منها الجند كانوا بيثبتوه .. انت رايح فين ؟ فيرد عليهم ( انا ماشى جنب الحيط ) فيسيبوه ..
.
اما البطل الاساسي فى سلسلة الصراعات اللى دارت بين المصريين و الفاطميين هم الصعايدة ..
اسيوط مثلا انفرد احد كبار عائلاتها اسمه ( حمدان الاسيوطي ) بحكمها وكون امارة خاصة بيه ونكست رايات الفاطميين فيها وضم له عدة مدن تانية .. لكن بمجرد علم خليفة الفاطميين ارسل له جيش بقيادة ( بن الزبير ) واخمد ثورته و قتله ..
.
اسوان كمان عملت محاولة انقلاب عظيمة مستغلين موت الخليفة وبعد المسافة بينهم وبين مركز ادارة الدولة ( القاهرة ) .. وكمان انشغال الخليفة الجديد بحروب الشام .. ثورة اسوان كانت تحت قيادة ( حمزة بن ثعلة ) اللى استشهد علي ايد جيش من الفاطميين تحرك من القاهرة لاخماد ثورته ..
.
بالاضافة الى 4 او 5 ثورات اخرى خرجت من الصعيد .. كانت المحاولة الانجح في تصورى الشخصي هي محاولة احد كبار عائلة ( بني حسين ) فى الصعيد .. واللى تصدي ليها جيش الجنوب الفاطمي و فشل فى احتوائها .. وبعد عدة معارك لصالح الصعايدة ارسل الفاطميين جيش ضخم جدا قضى على الثورة ..
.
انا ادعي انك مستحيل تلاقى فترة فى تاريخ مصر كله من اول ما سكنها سيدنا ادريس او حتي مصرايم بن حام لحد النهاردة اوسخ واصعب من فترة الاحتلال الفاطمي لمصر ..