دجالين الجن

.
كنت فى محاضرة روبوتكس السنة اللى فاتت و الكلام اخدنا للكلام فى العقيدة .. وذكرت ان الخوف المفرط من الجن مناف للتوحيد و وضحت حدود الخوف اللي تبقى علي عقيدتك سليمة ..
.
احد الطلبة اظهر اهتمام استثنائي بالكلام دا ودار بيني وبينه حوار طويل .. ولما لقيته هيطول اكتر قلتله خلينا نخلص المحاضرة وبعدها نتكلم علشان وقت زمايلك ..
.
فوجئت ان عنده رهبة مرضية من الجن .. وانه مكنش كدا زمان لكن اخته حصلتلها مشكلة فوالدتها استعانت بـ ( دجال ) .. ولما راحلته سألها عن علامات طلعت موجودة عندها فقالها انتى كدا ممسوسة .. وهو كمان دخل فى الحوار لانه عنده نفس العلامات .. وبقالهم سنتين متابعين معاه .. بيديلهم حاجات يشربوها ويقرأ عليهم حاجات وبياخد كل زيارة مبلغ ..
.
سألته 3 اسئلة .. ايه العلامات ؟ والراجل دا بيقرأ ايه ؟ وفيه تحسن ولا لا ؟!
.
العلامات كانت انهم فى وقت التبول بيحصلهم رعشة .. وانهم احيانا بيحلموا انهم بيقعوا من مكان عالي وميلاقوش ارض ويصحوا مفزوعين ..
.
والراجل بيقرأ خليط بين القرآن وكلام مش مفهوم ..
.
وفيه تحسن من ناحية الرعشة اللى بتحصلهم فى التويليت ..
.
فقلتله حوار الرعشة بيحصل لمعظم الناس وغالبا سببه ان تدفق البول بيضغط على عصب معين فبيسببها .. والحلم برضو بييجي لناس كتير ودى طريقة مخك بيصحيك بيها لتدارك مشكلة صحية هتحصلك لو كملت نوم ..
وغالبا العشبة اللى اداهالك ليها اثر طبي بيأثر على تدفق البول ..
.
قلتله اللى انت بتعمله دا حرام .. والراجل دا دجال وبيتغذي على خوفك .. واخدت منه وعد ميروحلوش تاني وتابعت معاه ..
.
مش هينفع احكي تفاصيل اللى حصل عنده فى البيت بعد كدا (لانه لم يأذن لي) لكن عايزكم تعرفوا ان الدجال دا كان بيتحرش باخته وبتخاف تتكلم .. وكان بيستنزفهم ماديا .. ولما البشمهندس دا تمرد عليهم وقالهم مش رايح اقنعهم انه مش ابنهم وانه جني ساكن فى جسد ابنهم وان ابنهم مات !!
.
انا مؤمن بالجن .. ومؤمن بالمس .. مؤمن بالحسد والعين.. مؤمن بالسحر ..
لكن بتعامل فى حياتي وكأني كافر بيهم .. وكأنهم مش موجودين .. عمري ما علقت حاجة على شماعة الجن ولا السحر ولا الحسد .. باستثناء مرة واحدة فى حياتي كلها وكان الموضوع واضح جدا ..
.
مشكلة مجتمعنا انه بيبقى فيه 1 مصاب بالمس .. و99 عايشين الوهم ..
غير الدجالين اللى بيقلبوا مصالحهم من ورا الـ 99 ..