مقال مختص بالشباب فقط
احترامًا لوقتك المقال هياخد منك دقيقتين

مفيش مبرر في الدنيا يخليك تلجأ للهرمونات لتسريع النمو العضلي عندك .. إنت لو بتتمرن فلازم تكون نيتك لله .. المؤمن القوي خير واحب الى الله من المؤمن الضعيف .. جسمك دا زاد ليك في الدنيا .. أداة بترضي بيها ربنا .. أداة إنت مؤتمن عليها .. مش ملكك .. وإلا كان هيبقى مبارح ليك تنهي حياتك ببساطة كدة ..

فإنت لو دا إللى في دماغك فعلاً .. تظبط جسمك .. صحتك .. شكلك يبقى منمق ولطيف كجزء من اهتمامك بشكلك وفقا لتعاليم دينك .. اشطة .. ساعتها هتتمرن باعتدال ومش محتاج أصلا تمشى في السكة دي ..

هتاخد هرمونات .. مستحيل تعرف تأثيرها على صحتك الجنسية .. التأثير الأظهر والأكثر انتشارًا:

ضعف الرغبة .. إنت اصلا مبتبقاش عايز !!

جسمك ممكن يبقى مشحون هرمونات .. وصحته كويسة .. وعقلك متظبط وعارف إمتى تهدي وإمتى تسرع وبيكنترول العملية بشكل محصلش .. لكن بعد الهرمونات .. غالبًا هتوصل لحالة انعدام الرغبة ..

قلة إللى بتأثر معاهم الهرمونات بالإيجاب .. بس دول كمان معرضين لقطع الكهرباء في نص الفيلم .. إللى هو عاااااش يا كووووتش أداء عالي وهووووووب فجأة كدا بدون مقدمات .. مفيش انتصاب !! متخيل الفصلان ؟! متخيل منظرك قدام مراتك ؟! متخيل إنك رفعتها لفوق وفجأة هوووووب صمعليقووو تنام جنبها زى البطريق ؟!!

الشباب والرجالة إللى لسة بصحتهم ومرموش نفسهم في حضن الإباحية والعادة .. إللي بيصحوا كل يوم الصبح من النوم بانتصاب .. الكلام دا مش هيحصل تاني بعد الهرمون ..

ضيف للكلام دا الصحة الإنجابية .. ويقينا معظم اللى اخدوا هرمونات لفترة لو عملوا تحليل سائل منوي قبل وبعد هيلاقوا اختلاف صعب جدا .. بعد ما كان برنس بينتج لحد 200 مليون زعبور في المللي .. هيلاقي نفسه بينتج نص مليون بالعافية ..

غير الآثار النفسية بعد توقيف الهرمونات .. هتروح الجيم تلاقي نفسك نفسيًا مش قادر .. زى إللى كان عنده عربية تسلا وفجأة بقى يسوق عجلة .. مش هتقدر تسترجل في التمرين ولا التغذية ولا هتبقى مبسوط وإنت بتبص في المراية بعد التمرين و مضخة الدم في عضلاتك ..

وهتقعد تعيط لو صدرك اترهل .. ودا أثر شائع جدًا .. لو في أول الطريق ممكن يتحل بأدوية ولو طولت في الهرمونات فمفيش حل غير الجراحة أو تلمه ببرا ..

إنت لو سنجل فإنت بتنخر قبل ما تدخل دنيا .. ولو متجوز فلازم تفهم إن زوجتك ليها استحقاقات عليك ولازم تكفيها .. الموضوع مش رفاهية ولا عطف منك ومينفعش تقصر فيه فضلاً عن إنك تسلبها حقها دا علشان سيادتك عضلاتك تكبر بسرعة .. والله هتتسأل قدام ربنا ..

تحديث

جاتني مكالمة من الدكتور إللي كان بيعالجني من سنة وشوية من الإصابة ..

واحد من أشهر دكاترة إصابات الملاعب في مصر وماسك أكبر نوادي إسكندرية غير مركزه الكبير اللهم بارك ..

كان بيتطمن عليا عادي و كلمني عن مقال الهرمونات والصحة الجنسية ..

قاللي مفيش أسبوع بيعدي إلا لما يروحله إتنين تلاتة عندهم مشاكل جنسية بسبب كورسات الهرمونات .. وإن الموضوع أبعد بكتير من إللي أنا قولته .. معظم الشباب بتنكمش عندهم الخصية وكتير منهم بيروحوله بضمور في الخصية وبيحولهم لدكاترة في مركزه ومبيعرفوش يعملولهم حاجة ..

وقال إن الموضوع زاد قوي في آخر كام سنة مع انتشار أنواع مجهولة المصدر وفيه موردين مشهورين للمكملات والهرمونات بيشتروا أنواع تعبانة وبيعيدوا تعبئتها في عبوات الأنواع الغالية المعروفة.

قاللي كمان إن تفسيره لموت جو ليندنر من أسبوع وهو لسة يادوب 30 سنة .. هو سلوكه في الهرمونات والمكملات .. حتى هو نفسه قبل وفاته بيومين نشر إنه مش هيقدر يستمر على نفس معدلات التستوستيرون وهيضطر لتقليلها .. وفي كل فيديوهاته بيضرب مكملات بري ورك آوت بكميات غريبة .. ودي مليانة كافين بتضرب ضغط الدم لفوق ودا إللي فجر الشريان .. وغالبًا الشريان إللى انفجر كان في المخ فمات بسببه على طول ..

للمرة المليون يا شباب ..

جسمك مش ملكك .. إنت مؤتمن عليه .. الطريق دا أخف أضراره انك نفسيا هتبقى مش متظبط وجنسيا بطة بلدي

ونهايته ممكن تبقى الموت عادي خالص .. ومفيش رياضة في الدنيا بيموت فيها شباب في سن صغير بنفس معدلات الرياضة دي ..