الواسطة فى شغل مهندسين ميكانيكا ( إنتاج – ميكاترونكس – باور )

.
خلونا نقسم شغل المهندسين لـ 3 اقسام :-
1- شغل حكومي.
2- قطاعات شاذة.
3- قطاع خاص.
.
.
1- الشغل الحكومي ..
ودا مش موجود دلوقتي .. نادرا لما تلاقى وظايف متاحة فى القطاع العام .. المصانع الحربية مثلا. .. ودا نسبة كبيرة فعلا بتشتغل فيه بواسطة .. لكن انا بشفق عليهم .. المهندس فى المصنع الحربى اللى بقاله 20 سنة شغال بيقبض اقل من مهندس القطاع الخاص اللى بقاله فى السوق 5 سنين بس!!
.
2- قطاعات شاذة ..
ودي قطاعات الوظايف فيها نادرة .. زى البترول مثلا .. ودى فعلا الوسايط ( فى الاماكن الكويسة فيها ) هى الوسيلة الاكثر فعالية .. لكن معظم الشغل فى البترول بيكون بدون واسطة .. شغل فى شركات خدمات وصيانة زى بترومينت مثلا .. مرتبات زي الزفت وكل سنة المهندسين فيها بيشتكوا ان دخل عامل البوفيه اعلى من دخل المهندس .
.
3- القطاع الخاص ودا السواد الاعظم فى السوق .. يعني خلينا نقول من بين كل 100 وظيفة .. بيكون 98 منهم قطاع خاص .. وسط الـ 98 وظيفة دول يمكن اتنين او تلاتة بس الل بوسايط والباقى بالكفاءات .. مفيش واحد مجنون صاحب مصنع هيجيب واحد يخسره .. بالعكس هيدور على اعلى الكفاءات اللى تجيبله اكبر قدر ممكن من الفلوس ..
.
.
فالكلام عن الوسايط .. وان مفيش شغل غير بواسطة .. والكلام الفارغ دا .. جريمة ..
ابشع جريمة ممكن تعملها فى حق طالب او حديث التخرج انك تنتزع منه الامل .. لو طالب عمره ما هيقدر يذاكر ويهتم بدراسته .. ولو خريج فقدانه للامل هيخليه قاعد في بيته وبيشتم فى كل حاجة وبيكرر نفس الكلام اللى كان سبب فى فشله ..
.
.
الحقيقة ان كل اللى بيتكلموا عن الوسايط هم مجرد فشلة .. السوق لفظهم لانهم غير كفء لتولى مسئولية اى مكان يروحوه .. وماشيين بمبدأ ( ودت العاهرة لو كل النساء زواني ) ..