.
بناء شخصية الطفل بيبدأ من الشهور الاولى له .. على عكس ما هو شائع بيننا ان الكلام دا بيتم مع بداية التحاقه بالدراسة ..
علشان كدا الاطفال بيتباينوا فيما بينهم حتى وهم لسة بيرضعوا .. الاطفال بيكونوا بعمر شهور وتلاقى ام الولد منهم بتقول على ابنها عنيد .. عيوطة .. زنان .. فلاتى زى ابوه ( مع ان ابوه محترم .. كل الرجالة اصلا محترمين .. معروفة ) ..
كل الصفات دى نفسية سلوكية مكتسبة .. مش فسيولوجية ولا ليها علاقة بجينات وراثية او غيره ..
.
كل مشكلة من دول ليها آلية لحلها .. لكن كلامنا النهاردة عن الادوات اللى ممكن تساعدنا فى تعزيز شخصية الطفل و فى نفس الوقت تعزيز احساسه بالمسئولية .. لانك لو قويت شخصيته بدون ما تزرع فيه الضوابط هينقلب السحر على الساحر و هيطلع عيل ابن كلب ..
.
امثلة التصرفات اللى ممكن تساعد على كدا :
1- لما تروح سوبر ماركت اديه الفلوس وخليه يحاسب الكاشير ..
2- لو له اخ صغير اطلب منه رعايته فى موقف معين .. وطلبك يكون من قبيل انه هو الكبير ..
3- لما يوصل لسن 10 سنين ممكن تسيبله ميزانية اسبوع .. لو مثلا البيت بيصرف 1000 جنيه فى الاسبوع .. اديله 1000 جنيه وقوله انت اللى هتمشى البيت الاسبوع الجاي .. وتقعد معاه وتحدد المصاريف الثابتة و الدورية .. يعني مامته مثلا بتاخد 200 جنيه مصروف فى الاسبوع .. 200 جنيه كمان نصيب الاسبوع من فواتير الكهرباء والمية والغاز و النت والتليفون .. بابا بياخد 250 جنيه مواصلات .. يبقى كدا فاضلهم 350 جنيه .. خد مصروفك و ادى اخواتك مصروفهم و شوف بقى الخضار واللحمة و البقالة و الدروس و و و ..
4- لو كان عندك اكتر من ولد فى نفس المرحلة العمرية يفضل انك تعمل التجربة دى معاهم وتخليهم كلهم كدا مشتركين فى المسئولية ودا هيعزز تعاونهم مع بعض ..
5- استخدام كلمة ( شباب ) بدل ( عيال ) مهمة جدا .. جدا .. الطفل بيفرح بيها اوى و بيتصرف على اساسها.
6- بطل تستخدم ألفاظ متخلفة مع ابنك .. مفيش حاجة اسمها ( امبو ) .. ولا حاجة اسمها ( هم النم ) .. طفلك لو رضيع وعودته على الكلام دا هيتأخر فى الكلام .. ولو كبير ودللته بالشكل دا هيطلع متخلف وزمايله فى المدرسة هيتنمروا عليه تنمر السنين .
7- اتكلم مع مامته فى مواضيع مهمة .. اقتصاد .. سياسة .. دين .. والكلام يكون ادامه وتشركه فيه بشكل غير مباشر و تسمع رأيه للاخر ومتقللش منه .. الحالة الوحيدة اللى تمسك نفسك عن الكلام فى السياسة ادامه انك تكون بتسمع احمد موسي .. البلد مش ناقصة متخلفين يا حبي ..
8- خد ابنك معاك المسجد .. روح بدرى و خليه يصلى جنبك فى الصف الاول .. ولو بطة بلدي حاولت ترجعه ورا بحجة انه عيل اديله بضهر ايدك على وشها زى الخدامين .. وبعد كدا علمه انك لو مش معاه يصر على مكانه فى الصف الاول و ينكر على البيضة اللى عايز يرجعه انه جه متأخر وعايز ياخد مكان مش مكانه .
9- اكثر من حواديت السيرة والتاريخ الاسلامي اللى فيها قام الاطفال فى سنه ببطولات عظيمة .. واستخدم السنة الدراسية للتعبير عن المرحلة العمرية .. يعني مثلا تقوله الحسن والحسين كانوا فى سنة كذا لما حبوا يعلموا واحدكبير الوضوء من غير ما يحرجوه فعملوا تمثيلية ادامه كأنهم بيعلموا بعض ..
10- شجعه على ممارسة الرياضات الجماعية زى كرة القدم والطايرة واليد .. وعلمه رياضة عنيفة … كونج فو .. كاراتيه .. تايكوندو .. سوبر ماريو ..
.

ربوا_عيالكم