المواد المركبة

.
المواد المركبة احد اعظم الاختراعات للمصريين القدماء .. فكرتها ببساطة انك بتجمع بين مادتين للحصول على مميزات فائقة مقارنة بمميزات كل واحدة فيهم منفصلة ..
الطوب اللبن مثلا اللى كان بيتكون من طين و قش رز .. الطين بيتحمل الاجهادات والقش بيحافظ على جيومترية وشكل قالب الطوب ..
.
نفس الكلام دا هتلاقيه فى عجلة الريس اللى سببت جدل كبير وقتها .. ليه العجلة دى غالية ؟!
الاجابة ببساطة لانها مصنوعة من الالياف الكربونية .. وهنا جمعنا بين تقنيتين .. التقنية الاولى هي غزل الكربون ( الفحم ) وتحويله لالياف ( شعر ) .. والتقنية التانية هى تضمينه فى مادة مركبة مع احد البوليمرات ..
دا بيخليها خفيفة جدا وقوية جدا .. وبالتالى فدرجة الامان فيها عالية وفي نفس الوقت مبتحتاجش مجهود فى ركوبها ..
.
علشان تستوعب موضوع الالياف وقد ايه بيفرق فى الخصائص الميكانيكية عايزك تفكر فى مدي قوة تحمل الزجاج للاجهادات .. هتلاقيه ضعيف جدا .. طيب هات الازاز دا وحوله لشعر ( ألياف ) .. زى الشعر اللى بتلاقيه فى كيبل الانترنت .. هتلاقيه قوى جدا ولو حاولت تقطعه بايدك هتتعور .. مع انه فى الاساس مجرد زجاج ..
.
المادة المركبة بتتكون عادة من مادتين :-

• مادة اساس
• مادة التقوية
  .
  مثلا الكربون فايبر او الياف الكربون .. الكربون بيكون مادة تقوية لانه هو اللى بيتحمل الاجهادات الميكانيكية .. والبوليمر اللى بيكسبه شكله بيكون مادة تأسيس او اساس ..
  .
  المواد المركبة هتلاقيها فى كل التطبيقات تقريبا .. التطبيقات العسكرية .. تطبيقات الفضاء .. الطب .. البناء والتشييد .. السيارات .. إلخ ..