الحضارة المصرية القديمة كانت هايلة .. لكن مش خيالية ..

.

هي مجرد حضارة لأول دولة عرفت الحكم المؤسسي في التاريخ .. ارتبط بنائها بسيدنا ادريس اللى كان بيسكن طيبة على الراجح .. تحديدا جبال الأقصر .. واللى اخترع الكتابة واخترع الحيـ.ـاكة وخلى الناس تتغطى بهدوم مش بجلود و ورق شجر .. واسس لدولة مدنية بمرجعية دينية .. وعلمه الله علوم الفلك والهندسة وغيرها من العلوم ..

.

لكن التوسع في وصفها بانها كان عندها علوم ومعارف اضعاف الحالية .. لدرجة ان البعض بيقول انها وصلت للقمر .. والبعض بيقول انها تواصلت مع كائنات فضائية .. وغيرهم بيقول انهم تغلبوا على الجاذبية .. إلخ .. كل دا من قبيل الدروشة ..

.

الحقيقة ان مجموع العلوم والمعارف اللى كانت في ازهى مراحل مصر القديمة لا تعادل منهج سنة واحدة في كلية علوم .. وخليني اسألك ..

لما هم كانوا متقدمين بشكل خـ.ـرافي كدا .. ازاي تم احتلال مصر لفترات كتيير اوي وعدت بعصر اضمحلال اول وتاني ..

ازاي اختراع بسيط زي العجلة الحربية كان تمامهم في التقنيات العسكرية وبالرغم من كدا تسبب في تحقيق انتصارات عظيمة ظ!

ازاي مصر القديمة مكونتش امبراطورية مترامية الاطراف وغزت الفرس واليونان والرومان ؟! ومتقوليش اصلهم كانوا كيوت .. الكتينة مكنش ليها مكان في العالم القديم عزيزي المشاهد ..

.

ازاي عاشوا ألفين سنة ميعرفوش طريقة لحفظ الغلال لحد ما علمهالهم سيدنا يوسف ؟! هتقوللي سيدنا يوسف ملوش ذكر في علم المصريات هقولك عندى كتاب ربنا اصدق من اي علم تاني ..

.

ازاي مشوفناش اسطول استثنائي .. في ازهى عصور مصر كان عندها اسطول شراعي غير مميكن .. في حين ان حضارات تانية سبقتها وجهزت سفنها بابسط ميكانيزم في الدنيا .. الكام والفولور !!

.

أي حاجة انت شايفها اعجاز فهي اعجاز فعلا لانهم اول من صنعوها .. العجلة الحربية مثلا .. لكنها مش تقنيات عالية جدا وخيالية زي مانت فاكر .. حتى لو مش لاقي اجابات لاسئلة متعلقة بموروثهم الحضاري .. غالبا المشكلة انك مش متخصص او مش عارف .. او محب لجو الخيال العلمي ..

.

توابيت السرابيوم مثلا .. ممكن نصنعها بتقنية مشابهة للباودر ميتالوروجي .. وبدون تعقيدات .. هندخل الباودر مكان التابوت الضيف من الابواب والسقف الضيقين ونحولهم لسوليد عادي ..

.

الاهرامات .. كل النظريات (( المنطقية )) حول بنائها كانت بتتكلم عن قوة عضلية لعدد كبير جدا من العمال وبعض الادوات والاستراتيجيات البسيطة .. محدش اتكلم عن ماكينات .. محدش اتكلمت عن وقت زمني صغير انجزوا فيه الصرح العظيم دا ..

.

التحنيط .. انت عايز ايه اكتر من ان زاهي حواس نفسه يقولك مفيش سر في التحنيط ولا حاجة ؟!

.

قناع توت عنخ امون اللي معمول من الدهب من قطعة واحدة بدون لحامات ..عادي جدا يتصنع بطريقة سباكة الطرد المركزي .. او بنفس الطريقة اللى بنصنع بيها قاعدة التويلت .. صب الدهب في قالب واعتمد على ان الجزء الملامس لحدود الاسطمبة هيتصلب اسرع وبعد شوية فرغ القالب من الدهب المسال .. هيطلع معاك قناع مفرغ عادي جدا ..

.

فيه نقطة اخيرة حابب اوضحها .. فيه فرق بين العلم اللى هو معرفة اصل الشيء .. والتكنولوجيا .. اللى هي تطبيق العلم نفسه ..

ممكن اي حد يمتلك التكنولوجيا ويطبق العلم بدون ما يكون عنده العلم دا .. ازاي ؟!

السيف الدمشقى .. سيف جيش صلاح الدين المصنوع من خامة اسمها الصلب الدمشقي صلبة جدا .. صلدة جدا .. حادة جدا .. ليها مواصفات ميكانيكية هايلة لدرجة ان السيف الدمشقى كان سهل جدا يكسر اي سيف يقابله ..

سر قوة السيف دا مادة الكربون نانو تيوبز اللى فيه .. طب هل اسلافنا كانوا يعرفوا يعنى ايه نانو ؟! علم النانو لسة مكتشفينه في القرن اللى فات ..

نفس الكلام في كنايس روما .. الازاز بتاعها محتفظ بألوانه بعد قرون طويلة بسبب استخدامهم الوان بتقنية النانو .. هل كانوا يعرفوا النانو ساينس ؟! طبعا لأ ..

.

ممكن اديك امثلة للصبح عن اختراعات تم التوصل اليها بالتجربة او بالصدفة بدون علم .. ومتمش اكتشاف العلم دا غير بعدها بألاف السنين ..

.

.

الخلاصة .. الحضارة المصرية القديمة كانت حضارة عظيمة جدا .. لكن مكانتش من كوكب تاني .. بل وازيدك من الشعر بيت واقولك انا شايف اننا كان ممكن يبقى عندنا ارث حضاري اضعاف الحالي وان قدماء المصريين تراخوا عن دا .. احنا عندنا بحرين و نهر لا ينضب و فوق دا الدهب عندنا زي التراب زى ما ثبت في رسالة قديمة من احد ملوك العراق اظن لمصر بيشحت منه دهب وبيقوله انه ذات قيمة عندهم وانه في مصر كما التراب من كثرته ..