مختصر السيرة
أخر الأخبار

مختصر السيرة 3

تمر الايام ويكمل سيدنا محمد 40 سنة

وتحصل حادثة الغار ونزول جبريل بالوحي .. اقرأ ..

لكن قبلها كانت فيه مقدمات

ارهاصات مثلا زى قصة الظل و زى شق صدره الشريف

والارهاصة زي المعجزة زي الكرامة .. كلهم امور خارقة للعادة لكن الفرق بتحصل لمين

الكرامة بتحصل لولي .. المعجزة بتحصل لنبي وغالبا بتكون مقترنة بتحدي .. الارهاصة بتحصل لنبي قبل بعثته ..

.

من المقدمات اللى حصلت مع النبي قبل بعثته الرؤيا الصادقة .. كل حاجة كان بيشوفها في المنام كانت بتحصل

كذلك تغير حاله فبقى يحب العزلة .. وبدأ يتعبد في غار حراء لفترات .. احيانا كان بيطيل بقائه لدرجة انه بينتهي زاده فيرجع لامنا خديجة تجهزله زاد جديد ويرجع تاني الغار

.

وحصلت الحادثة اللى كلنا عارفينها .. نزول جبريل بالوحي ..

وينطلق النبي لبيت خديجة مرعوب .. زملوني زملوني ..

وحكي لخديجة كل اللى حصل .. فتظهر حكمتها في تهدئة روعه الاول وبعدين الاستعانة باهل العلم لتشخيص العرض

كلا! أبشر فوالله لا يخزيك الله أبدا، إنك لتصل الرحم، وتصدق الحديث، وتحمل الكل، وتقري الضيف، وتعين على نوائب الحق

اتطمن .. هو انت عملت ايه يا محمد علشان ربنا يعاقبك بالشكل دا ؟ اكيد احنا مش فاهمين الموضوع

يلا نروح لورقة ابن نوفل ..

.

على عادة النبي انه لما ينزل من الجبل يروح يطوف بالكعبة الاول .. فقال يروح وبعدين يشوف ورقة بن نوفل ..

وسبحان الله يلاقي ورقة بن نوفل هناك ويحكيله ..

قاله دا الناموس اللى نزل على موسى .. ودي الرسالة .. وانت رسول الله

وبتمني اعيش لليوم اللى يخرجوك فيه من مكة ويحاربوك علشان احارب معاك

.

خد بالك .. ورقة وقتها كان معدي التسعين سنة .. وفقد بصره .. بس يقينه التام بنبوة سيدنا محمد خلته مستعد يبذل اغلى ما يملك لاخر يوم في عمره ..

ورقة بن نوفل من الصحابة لانه ادرك رسول الله في حياته وبعد بعثته وآمن به .. لكنه مات في البدايات خالص ملحقش يشوف حاجة ..والنبي قال عنه ( لا تسبوا ورقة فأني رأيت له جنة او جنتين ) ..

.

نرجع تاني لكلام ورقة .. النبي استغرب .. يخرجوني من مكة ؟! دنا محبوب جدا ومعروف بأمانتي وشرف نسبي ..

فقاله ورقة انت مفكر انك هتبعث بمثل هذا ويسيبوك ؟! كانوا سابوا اللي قبلك .. جهز نفسك لثقل حمل الدعوة .

.

انقطع الوحي لفترة ودا احزن سيدنا محمد جدا ..

فخرج سيدنا محمد لقمم جبال مكة .. وكل ما كان يبلغ اي قمة فيهم و يشوف هينزل عليه الوحي ولا لا .. ميلاقيش حاجة ..

فكأنما دا بيضعفه .. ويوشك النبي عى السقوط فيلحقه سيدنا جبريل ويقوله ( انك رسول الله حقا ) .. دي كانت بمثابة مكملات نفسية وشحنات طاقة ايجابية بترجع النبي محمد في قمة سعادته

.

وتبدأ مرحلة الدعوة السرية باخبار اقرب الاقربين ..

يسلم سيدنا ابو بكر .. سيدي على .. سيدنا زيد .. سيدنا بلال

طبعا بعد اسلام امنا خديجة

.

وبمعدل بطىء جدا وبشكل حذر جدا ينتشر الاسلام بسرية تامة .. وبعدين تبدا مرحلة الدعوة الجهرية .. وبرضو بالتدريج ..

.

اول مرحلة كانت مرحلة ( وانذر عشيرتك الأقربين ) ..

على طول راح سيدنا محمد لبني هاشم وجمعهم وكانوا 45 رجل منهم اعمامه و بعض اولادهم ..

ولسة النبي متكلمش ولا كلمة .. يطلع ابو لهب المحنك يقوله ( انجز معندناش خلق للكلام دا ) .. دا المعني الحرفي لرغي كتير قاله قبحه الله ..

فيقرر النبي ميتكلمش حفاظا على مقام النبوة ..

.

يكرر الموضوع مرة تانية ويجمع بني هاشم ويحضر ابو لهب وابو طالب

ويقولها لأول مرة بكل وضوح في جمع من الناس (( انا رسول الله اليكم خاصة والى الناس عامة ))

ابو طالب يرد فورا : احنا في ضهرك ومصدقينك وكمل في طريقك وهنكون ليك سند .. لكن نفسيا مش قادر اترك دين عبد المطلب !!

ابو لهب المحنك يقاطع ابو طالب ويقول : هذه والله السوأة .. خلصوا عليه قبل ما يخلص عليه حد غيرنا .. على طريقة نغسل عارنا بإيدينا .. قبحه الله ..

فيزأر ابو طالب ويقف لأخوه ويقوله : والله لنمنعه ما بقينا .. يبقى حد يقرب منه واحنا نشيله من على وش الارض ..

.

المرحلة التانية هي الدعوة الجهرية غير المباشرة ..

بدأ يتواجد حول الكعبة بشكل متكرر وينكر على الناس عبادتهم لاصنام لا بتنفع ولا تضر .. وعندنا دين ابراهيم ليه حدنا عنه ..

كان كلامه ما بين انكار وسخرية لم تتجاوز الادب .. سخرية على العقيدة وعلى معبوداتهم .. شوفت انت كدا ( شلت يدي .. انها سلييييييييمة ) .. اهي حاجة زي كدا ..

ودا عادي على فكرة .. ادع الى سبيل ربك بالحكمة والموعظة الحسنة مش معناها انك تكون كيوت .. معناها لكل مقام مقال .. احيانا بتحتاج لين واحيانا شدة واحيانا سخرية واحيانا شفقة ..

وعندك مثلا اللى عمله سيدنا ابراهيم في الاصنام خير مثال .. دا خلاهم اضحوكة الامم لما حط الفاس على كتف كبيرهم وقالهم اسألوه ..

.

هنا بقى بدأ اهل مكة يثوروا على النبي .. الراجل دا جاي يسب الهتنا ويسفه منها ودا معناه ان ابائنا كانوا معاتيه .. ومعناه اننا هنخسر الحجيج والفلوس اللى بتيجي من وراهم في القرابين و التجارة .. ومعناه انقلاب هيحصل في مكة وتغير في التركيبة السياسية .. ماهو مش معقول لو اعترفوا بمحمد كنبي هيفضل رجل عادي ويبقى سادة قريش ابو جهل وابو لهب !! اكيد هيكون هو السيد وكلمته مطاعة لانها كلمة الرب ..

طب نعمل ايه يا شوية كفار ؟! نروح لعمه علشان منقعش في الغلط .. وراحوا فعلا لأبو طالب يطلبوا منه ان ابن اخوه يكف عن دعوته .. وابو طالب جلفهم وقالهم انه عاش بينكم 40 سنة مكدبش ولا مرة في حياته ..

.

خلاص وصل الاحتقان لدرجة كبيرة جدا .. فجت المرحلة التالتة ..

الجهر المباشر بالدعوة .. طلع النبي على جبل الصفا .. او خلينا نقول صخرة الصفا لانها مش جبل ولا حاجة ..

ونادى على كل بطون قريش وعشائرها .. وألح في النداء لدرجة ان مفيش حد مراحش .. واللى مقدرش يروح بعت عبد من عبيده يشوف فيه ايه ..

.

وبعدين بفطنته يقيم عليهم الحجة ابتداءا ..

أرأيت لو اخبرتكم ان خيلا بالوادي تريد ان تغير عليكم .. أكنتم مصدقي ؟!

قالوا : طبعا

قال انا رسول الله اليكم ..

هوووووووب يطلع المحنك اللى كلنا عارفينه .. ابو لهب .. ويقوله ( تبا لك سائر اليوم .. ألهذا جمعتنا ؟! ) .. انت جايبنا علشان كدا ؟!

فنزلت آية ( تبت يدا أبي لهب وتب ) .. دا اساسا بني ادم مينفعش معاه غير الشبشب ..

.

.

خلاص وصلنا لمرحلة بقت ادلعوة كلها على المكشوف ..

كذلك قريش .. بدأت تضرب على المكشوف .. خاصة ان توسيع رقعة الدعوة الوجهر بها بدأ يوتي ثماره ..

ناس كتير اسلمت .. صحيح اغلبهم غلابة لكن الموضوع بقى يخوف ..

فبدأت قريش في حرب واسعة واضطهاد للمسلمين .. سيدنا محمد كان اقلهم لان ابو طالب كان بيحميه ..

فاقترح عليهم النبي ان اللى مش قادر يتحمل ممكن يهاجر الحبشة .. هناك ملك عادل.. ودينهم المسيحية ..

فخرجت هجرة الحبشة الاولى .. حوالى 10-12 راجل معاهم 2 او 4 من النساء .. اتحركوا لحد ساحل البحر الاحمر وهناك لقوا سفينتين ركبوهم بنص دينار ..

قريش بعتت وراهم فرسان علشان يخلصوا عليهم لكن ملحقوهمش ..

.

.

مين بقى اللى كان هاجر ؟

سيدنا عثمان ومراته .. ستنا رقية بنت النبي .. وتاني بنت يرزق بيها بعد ستنا زينب ..

طب كان عندها كام سنة وقتها ؟! تعالى نحسبها سوا ..

الهجرة دي حصلت سنة 5 من البعثة .. وهي اتولدت والنبي عنده 33 سنة .. يعني كان عندها 12 سنة وقتها

ومش بس كدا يا معلم .. دي اساسا اساسا كانت متجوزة عتبة ابن ابي لهب .. وبعدين لما جهر النبي بالدعوة ابوه قاله يطلقها فطلقها ..و بعدين اتجوزها عثمان

ودا برضو يأكد على النقطة اللى قولناها المرة اللى فاتت .. البنات في الزمن دا والبيئة دي غير دلوقتي خالص ..

.

المهم كان معاهم عبد الرحمن بن عوف وعبد الله بن مسعود و مصعب بن عمير وغيرهم ..

واول ما وصلوا الحبشة لقوا مصيبة مستنياهم ..

انقلاب عسكري ..

واحد قرر يعمل انقلاب عسكري على النجاشي ويمسك مكانه .. وطبعا مرعوبين لدرجة ان ام سلمة قالت انه كان اكتر يوم حزين في حياتهم .. مرعوبين لان الجديد دا لو سيطر على الحكم مش هيعمل معاهم زي النجاشي

دا مش بعيد يبعتهم لقريش او ياخدهم كعبيد ..

لكن في مشهد مهيب .. جيش النجاشي على ضفة النيل .. جيش الكابتن دا على الضفة التانية .. و يتحداه النجاشي زى ما جالوت تحدى بنى اسرائيل كدا .. اللى يقدر يخرجني يفرجني ..

فالواد اللى كان عامل الانقلاب دا كان شاب صغير وكان اهطل باين .. جاب امعاء معزة نفخها ولبسها على صدره زى العوامة كدا وعبر النيل ..

طبعا على ما وصل للنجاشي كان نفسه اتقطع .. مخدش في ايده غلوة وقضى النجاشي على محاولة الانقلاب ..

.

الحمد لله .. ربنا نجاهم ..

.

مقعدوش كتير و وصلتهم اخبار شبه بتاعة اليوم السابع كدا .. ان اهل مكة اسلموا .. احمدك يارب .. يلا نطلع على مكة ونرجع لبيوتنا واموالنا ..

رجعوا مكة لقوا ان الاخبار دي اشتغالات .. فمنهم اللى قال نقعد في مكة ومنهم اللى راح للنبي يستأذن هفي الهجرة مرة تانية للحبشة فأذن لهم ولغيرهم ..

.

وهنا بقى طلعت الهجرة التانية للحبشة وكان فيها حوالى 82 او 83 رجل باطفالهم ونسائهم .. حوالى 19 امرأة ..

وكبيرهم كان جعفر ابن عم النبي .. ودا كان خبير لغات .. فكان اميرهم في الهجرة دي لانه اعظمهم شأنا ولانه الاقدر على تحقيق تواصل مباشر مع الاحباش بلغتهم .. او علشان نكون ادق .. خرجوا في مجموعتين واحدة يرأسها جعفر والتانية يرأسها ابو موسى الاشعري.. وبعدين لما وصلوا لليمنوركبوا البحر عرفوا ان النبي امر بالهجرة الى يثرب فحاولوا يرجعوا لكن الريح كانت غربية شديدة بعتتهم الحبشة غصب عنهم ..

.

.

فترة الاستضعاف دي فيها حواديت كتيرة اوي بس انا بحاول اديك خطوط عريضة مع كام تفصيلة كدا تعيشك الجو اكتر

.

نكتفى بالقدر دا عن المرحلة دي والمرة الجاية هنشوف تغييرات كبيرة ان شاء الله ..

وعلشان برضو تبقى مركز اوي معايا .. خليني اقولك ان عمر النبي في الوقت دا كان 47 سنة ..

Ahmed Aboul Fotouh

المدير التنفيذي لشركة روبوتيك مصر للحلول الصناعية والتدريب؛ عمل سابقا كعضو هيئة تدريس بقسم هندسة الميكاترونكس بكلية الهندسة كما عمل ضمن وحدة بحوث الطيران بقاعدة أنشاص الجوية - القوات الجوية المصرية بإشراف من هيئة البحوث العسكرية بوزارة الدفاع. له العديد من المؤلفات بالانجليزية والعربية ومحاضر بأكبر المعارض الصناعية بالشرق الاوسط.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى