1- سنة مؤكدة .
2- بتدبح بعد صلاة العيد لحد رابع يوم العيد .. فى اى وقت خلال الفترة دى .
3- لما تيجي تضحي اعقد النية على ان الاضحية دى ليك ولأهل بيتك .. حتى لو خروف مش عجل .. ينفع.
4- ينفع كمان تضحي عن الميت تطوعا .. تشرك الميت معاك فى الاضحية .
5- لو كان الميت اوصى قبل ما يموت ان كل سنة يتم التضحية ببقرة او خروف من ماله .. فى الحالة دى التضحية واجب على الورثة ..
6- لو مش معاك فلوس كفاية تقدر تشترك فى اضحية كبيرة .. بقرة او جمل .. بيشترك فيها 7 افراد .. والسهم او الجزء اللى انت شاركت بيه من الاضحية دى برضو تعقد النية انه ليك ولاهل بيتك .
7- سن الاضحية على الاقل لازم يكون 6 شهور للضأن و سنة للمعيز و سنتين للبقر وخمس سنين للجمال .
8- مينفعش تكون الاضحية عورة او عارجة او هزيلة جدا او مريضة ..
9- لو انت اشتريت جدي مثلا قبل العيد بأسبوع بنية الاضحية .. مينفعش تبيعه خلاص .. مش كلام عيال هو .. الحالة الوحيدة اللى يباح ليك انك تدخله فى معاملة تجارية انك تجيب حاجة احسن منه .. جدي اكبر او خروف سمين او بقرة ..
10- مينفعش تبيع اى حاجة فيها .. وانك تدى للجزار الجلد على سبيل الاجرة دا بيسقط اجرها خالص .. مبتبقاش اضحية .. مجرد حيوان ودبحته وخلاص .. بس ينفع تتصدق بالجلد .. والجمعيات الخيرية اللى تقدر تتصدقلها بالجلد كتير اوى .. فإنت تدى الجزار اجرته فلوس و تاخد الجلد تديه لأى جمعية ثقة فيهم .
11- ممكن تاخد الاضحية كلها لنفسك وممكن تعطي منها الاقارب والفقراء ودا الافضل .. وكمان ممكن تعطي منها فقراء غير المسلمين تأليفا لقلوبهم .
12- المفروض انك لو نويت التضحية لا تحلق شعرك ولا تقص ضوافرك من اول يوم فى ذى الحجة زى المحرمين بالظبط .. وعموما لو عملت كدا فالاضحية صحيحة .. والكلام دا بالنسبة لصاحب الاضحية نفسه .. يعنى انت لو هتضحي عن نفسك واهل بيتك انت المطالب بكدا لكن هم لا .
13- السنة انك تدبح بعد العيد على طول وتكون اول واحد ياكل من الاضحية .. مع ان ادامك متسع خلال 4 ايام بحالهم .. لكن النبى كان بيدبح بعد الصلاة ( فصل لربك وانحر ) وبعدين يرجع على البيت ياكل من الاضحية وبعدين يخرج .
14- الافضل انك تدبحها بنفسك .. والله الموضوع سهل جدا لو بتدبح خروف او جدي .. لو بقرة او جمل هنقول ماشى هات جزار .. وياسيدي ممكن تخلى الجزار يقف جنبك ويعلمك .. احساس حلو اوى انك تدبح بنفسك .
15- أقسم بالله العظيم ما ينفع تضحي بفرخة .. ومعرفش اصلا الناس مهتمة بكلام د. سعد الدين الهلالي ليه ؟ دا واحد مينفعش معاه غير التجاهل ..