صاحب الصورة هو المشير عزة الدوري .. نائب صدام .. وإللى تولى أسخف خطة خداع استراتيجي في التاريخ ..
العراق قعدت تطحن في إيران وإيران تطحن فيها لمدة 8 سنين متصلة .. خلال الحرب دي تم استنزاف العراق اقتصاديًا وحتى إن بعض موانئها تم تدميرها وتعطل تصدير البترول منها والحالة بقت كرب وديونها وصلت للكويت والسعودية بس 60 مليون ..
طلع صدام حسين قال إحنا بنحارب بالوكالة عنكم .. أنتم مرتاحين وإحنا بنحميهكم من خطر الفرس .. نبي مصاري .. لازم تسقطوا الديون .. غير إنه كان بيخفض إنتاج النفط علشان يرفع تمنه .. والإمارات والكويت كانوا فاتحين الحنفية وده بيخفض تمنه عالميًا فبالتالي مش عارف يصرف على الحرب.
الكويت قالت مش هنسقط حاجة .. صدام قال خلاص .. مش هنرسم الحدود معاكم وهتفضل محل نزاع ومتزعلوش بقى لما نبعت الولاد يعملوا طابور لياقة فيها ..
بسرعة الكويت والسعودية حبوا يلموا الحوار .. عملوا اجتماع أظن في جدة .. سعد الصباح ولي العهد الكويتي مع عزة الدوري برعاية الملك فهد الله يرحمه .. نهايته إن السعودية هتدي العراق منحة 10 مليار .. الكويت 9 مليار .. وكان شرطهم إن مفيش دولار واحد هيندفع قبل ترسيم الحدود ..
للوهلة الأولى هتقول عزة كان رايح يقلبهم .. ونجح فعلاً ..
بس الحوار دا كله كان عبارة عن خطة تمويه مقرفة خسيسة بقيادة عزة ..
بعدها بأسبوعين تلاتة .. وبتاريخ 2/8/1990
صحينا على أسوأ خبر مر علينا في حياتنا كلها ..
عزة وعلى كيماوي اجتاحوا الكويت بسبع فرق من الحرس الجمهوري العراقي بأمر مباشر من صدام !!
العرب كلهم أصيبوا بالشلل .. إللى هو متهزروش بقى يا جماعة اجتياح إيه ..لكنه للأسف كان حصل .. وانتهت العملية في يومين .. يوم 4 أغسطس الكويت كلها كانت في قبضة عزة وعلي كيماوي ومن وراهم صدام ..
بالنسبة لصدام .. فهو صورة طبق الأصل من ناصر لكن صدام كان أعقل شويتين .. وأقوى 3 شويات ..
وعلشان تقيم صدام فإنت مينفعش تاخده إجمالاً كده وتقول صدام حلو ولا وحش .. عندنا 4 صدام :-
1- صدام قبل ومع بداية حكمه: ودي يطول شرحها لإنها محتاجة شرح للوضع العام في العراق من أواخر حكم المماليك
2- صدام بعد ما بقى حاكم مطلق: حقبة كان فيها في قمة الاستبداد .. إللي هو صباح الخير اعتقلنا كام ألف واحد النهاردة ؟!
3- صدام في حقبة قبل الغزو: ودي أفضل فترات صدام وحقق اتزان إلى حد ما كبير وتخلى عن كتير من العجرفة وعمل إصلاحات دينية حتى إنه خلى القرآن إجباري في الجامعات وصادر ممتلكات مزوري النسب إللى نسبوا نفسهم لآل البيت وسن قوانين بتجريم سب الصحابة وغيره
4- صدام ما بعد الغزو: ودا مكنش ينفع حد يختلف عليه أصلا .. بل وإن الخلاف في دعمه كان خيانة وقلة دين
