ليه مستوى خريجي هندسة ضعيف ؟!
.
- الهندسة اكتر كلية تطبيقية فى الكون .. لازم شغل عملي .. لكن المعامل مبتشتغلش .. اما لانها غير مجهزة او خايفين على العهدة.
- واللى شايل العهدة حقه يخاف .. ماهى فيها كلابوش ولو حاجة باظت مش هيعرف يقول فى التحقيق ( معلش .. فد الطلبة .. المهم يتعلموا ) .
- اما المعيد فبياخد 3000 جنيه .. ومطلوب منه يصرف منهم على نفسه و مواصلاته او سكنه و اكله وشربه و ماجيستيره و كمان يشيل جزء على جنب علشان يتجوز.
- فيتكون نوعين من المعيدين .. اللى مبيديش كورسات ودا مطحون لدرجة انه فى الغالب هيصاب بأمراض نفسية هتأثر على شغله بسبب الضغوط اللى عليه .. او بيدي كورسات ودا فى الغالب هينفض لشرح الكلية ويقنع نفسه بالمبدأ الشيطاني ( على قد فلوسهم ) .
- الدكاترة بقى حاجة تانية .. احوالهم المادية مش افضل كتير من المعيدين .. ناهيك ان عليهم مسئولية اكبر .. زوجة واولاد .. لازم لبس معين وعربية كويسة و مدارس عالية .. نظرة المجتمع بقى لسى الدكتور .. غير مصاريف ابحاثهم علشان ياخدوا الاستاذية ويزودوا مرتباتهم ملاليم ..
- الحل اللى انتشر كما النار فى الهشيم فى هندسات مصر كلها .. اقسام الكريديت .. اللى الطالب فيه بيختار المواد والدكاترة بمزاجه .. وهنا بقى ندخل فى كهف مظلم تاني هو ان الدكتور بقى يتهاون فى المادة العلمية والامتحانات علشان يرضى الطلبة .. لان كل ما الطلبة اللى بتختاره بيكتروا العائد المادي بيكبر ..
- الطالب بقي بيخرج من الثانوية العامة محمل بامراض نفسية هو مش حاسس بيها .. بتزيد بدخوله هندسة .. بتتطور لحالة من الاتنين .. اما الاكتئاب بدرجات متفاوتة .. او اللامبالاة .. ومن مظاهر اللامبالاة ( التعايش ) .. ودى السمة الاكثر شيوعا .. بيتعايشوا من الوضع القائم وبيبقى اقصى طموحهم يعدوا السنة .. ومش مهم يدوروا على تطبيق اللى درسوه .. على شغل عملي .. على تدريب ..
.
.
كل طرف من اطراف المنظومة ضحية ومذنب فى نفس الوقت .. الطالب .. المعيد .. الدكتور.. الموظف ..
المشاكل دى اكثر تعقيدا من انها تتحل بين يوم وليلة .. علشان كدا بنصحك كطالب انك تشتغل على نفسك برا .. وبنصحك كمعيد انك متنساش الهندسة وتشتغل برا كمهندس بدل ما تنسى الهندسة وتتحول لمدرس لا حول ليك ولا قوة ..
.
