بص على الصورة إلى تحت كدة .. هتلاقي على اليمين فيه منطقة فيها بشر موج ( إللى لونه أبيض ) .. على الشمال فيه منطقة تانية زيها .. وفي النص مفيش لون أبيض
المنطقة إللى فى النص دى بتكون سبب فى 90% من حالات الغرق .. لإنها ببساطة عبارة عن القناة إللي بترجع من خلالها المية إللي بتزقها الأمواج للشاطئ .. فأي حاجة بتقع فى المنطقة دى بتتسحب لجوة ..مع إنك للوهلة الأولى هتقول إنها المنطقة الآمنة وشكلها كيوت وتنزل وتنزل العيال فيها
طيب إنت سرحت ولقيت نفسك اتسحبت فى تيار السحب دا تعمل ايه ؟!

لو بتعرف تعوم:

إياك تعوم ناحية الشط .. أنا نفسي كنت عامل فيها أبوهيف من 15 سنة وكنت هغرق .. لا أنا ولا إنت ولا عبد اللطيف أبو هيف نفسه أقوى من البحر .. فإنت هتبدد طاقتك فى مصارعة تيار السحب لحد ما جسمك ينهار وتغرق .. الحل الوحيد إنك تفرد جسمك لحد ما تدخل جوة شوية وبعدين تعوم بشكل عرضي ناحية أي منطقة فيها بشر موج وساعتها هتلاقي نفسك بتروح للشط بسهولة

لو مبتعرفش تعوم:

إفرد جسمك على المية .. حاول تسيطر على نفسك ومتتخضش .. تقريبًا مفيش حد مبيجربش ينام على المية على الشط حتى لو مبيعرفش يعوم .. إفرد جسمك .. التيار هيسحبك لجوة صحيح لكن مش هيسحبك لتحت .. يمكن ربنا ييسرلك الحال وتنجر لتيار طرد وترجع تاني للشط ويمكن حد يشوفك من المنقذين فينزل ينقذك غير كدة فإنت ميت ميت
ومتنساش في المواقف إللي زي دي متبطلش تقول (لا إله إلا الله) لآخر نفس فيك

أنا ممكن أتفهم إن مش كل الناس ظروفهم تسمح يتعلموا سباحة .. وهو يوم في السنة بياخدوه صد رد ..

بس مقدرش أتفهم أبدًا إنك متعلمش ابنك الطفو .. يفرد جسمه على المية علشان لو في موقف زي دا ميغرقش

دي أسهل حاجة في الدنيا .. مش محتاجة غير تكسر حاجز الخوف أول مرة وبمجرد ما ينجح فيها خلاص هيحترفها للأبد

أولادكم أهم بكتير من متعة نزول المية .. فمتروحوش شواطئ خطر زي النخيل في إسكندرية .. ومتروحوش في وقت فيه موج عالي وسحب .. ومتشيلوش عيونكم عن ولادكم في المية ..