اكاديمية الضباط المتخصصين

.
عملت البوست دا مخصوص بسبب انى بتسأل كتير .. وهضيف فيه كل حاجة ممكن تتقال :-
1- التخصصات المطلوبة بتختلف كل سنة .. بس فيه تخصصات دائمة زى طب وتمريض وهندسة ..
2- الضباط المتخصصين نوعين .. قوات مسلحة و شرطة .
3- الشروط بسيطة .. مصري لابوين مصريين .. متحكمش عليك فى قضية مخلة للشرف .. طولك لو ولد اكبر من 170 ولو بنت اكبر من 155 سم .. حسن السير والسلوك .. واختبارات اللياقة .. اما السن والدرجة العلمية سواء بكالريوس او ماستر او دكتوراة فبتختلف بحسب التخصص ..
4- عموما هندسة بيحتاجوا منها بكالريوس وطب ماستر ودكتوراة.
5- التخصصات المطلوبة واللى مدة دراستها فى الكلية الحربية سنتين : كلية علوم بكل اقسامها – تربية رياضية .. تجارة.. حقوق.. زراعة.. لغات انجليزي وفرنش وعبرى و روسي وصيني ..
6- التخصصات المطلوبة للاطباء فى كلية الشرطة (اورام وجلدية وقسطرة القلب والجراحة العامة وجراحة المخ والاعصاب وعظام وأنف وأذن ورمد وجهاز الهضمى) .. ولازم ماستر او دكتوراة ..
7- التخصصات المطلوبة لكلية الشرطة غير طب : هندسة وحاسبات و سياحة وفنادق و سياسة واقتصاد و معهد سينما وتربية نوعية و تطبيقية ..
8- الكلية البحرية بتقبل تخصصات كتير فى هندسة .. اكترها ميكاترونكس وميكانيكا باور .. وبتقبل حاسبات .. ومبتقبلش خريجي المعاهد الخاصة باستثناء الاكاديمية ..
9- متهتمش اوى بالتخصصات اللى كتبتها .. دى بوضحلك المطلوب السنادي بس .. والمطلوب بيتغير كل سنة .. فمطلوب منك انك تستني الاعلان عن شروط الدفعات الجديدة فى السنة اللى هتقدم فيها .. ومفيش داعي للسؤال عن تفاصيل التخصصات لانى زي ما قلتلك بتتغير ..
.
.
وفي النهاية عايز اقولك نقطتين :
1- لو انت مهندس فتيقن تماما انك كمدني افضل من عسكري بعد كام سنة شغل من ناحية الماديات ..
2- انك لو دخلت طلبا للفلوس او البدلة شكلها حلو وعاجباك .. او وجاهة اجتماعية .. واخدت رصاصة فى اى وقت فانت مش شهيد .. انت رحت فطيس .. والعكس طبعا صحيح .. لو ظبطت نواياك فالشهادة اعظم مكافأة واعظم شرف ممكن تنولهم على الاطلاق ..