الحقيقة وراء اغلاق موقع ايجي بيست

.
انا معنديش ادني مشكلة مع اغلاق موقع ايجي بيست ..
مش هكدب عليكم .. نفسى اصحى الصبح ألاقى الافلام والمسلسلات والاغاني اختفت من حياتنا ..
.
مشكلتى فى نقطتين :-
1- كان من باب اولى الحكومة تحجب مواقع البورنوجرافي ..
2- اغلاقهم للموقع بعد حجبه معناه انه تم تهديدهم بشكل مباشر.. لانهم كانوا ممكن بمصاريف بسيطة ينشروا ثقافة الـ VPN – Proxy .. الادوات اللى بقدر اشوف بيها مواقع الاخوان المحجوبة بيقولوا ايه ..
.
بس عموما معتقدش فيه اتنين ممكن يختلفوا ان تامر مرسى ( صاحب الصورة ) سبب بشكل او بآخر فى اللى حصل ..
الفكرة كلها اننا عندنا سرطان فى مصر اسمه ايجل كابيتال .. كيان بيسعى لاحتكار كل حاجة فى البلد .. واللى من ابرز شركاته ( اعلام المصريين ) ..
.
علشان تستوعب حجم اعمالهم .. فهم استحوذوا كليا او جزئيا على الكيانات دى فى اخر 5 سنين :
1- اليوم السابع
2- قنوات ON
3- قنوات DMC
4- قنوات CBC
5- قناة Extra News
6- قنوات الحياة
7- قناة العاصمة
8- موقع دوت مصر
9- شركة مصر للسينما
10- مجلات زى ( عين – بيزنس توداي – ايجبت توداي )
.
.
.
وبالمناسبة .. اجور الممثلين انخفضت السنادي لاقل من النص بسبب ان كل القنوات دى تابعة لجهة واحدة .. اللى هى عاجبك سعرنا اتفضل .. مش عاجبك انتج زى مانت عايز ومفيش حد هيعرضلك مسلسلك .. ودا اللى خلى عادل امام ميمثلش السنادي .. السرسجي محمد رمضان مثلا السنة اللى فاتت اجره كان 35 مليون .. السنادي 18 مليون ..
.
نموذج الاحتكار دا جربناه قبل كدا فى حديد التسليح .. وهنجربه مرارا وتكرارا لانه اثبت جدواه الاقتصادية لاصحاب رؤوس الاموال .. ودا معناه سواد السواد جاى علينا فى قطاعات كتير جدا واسأل الله ان يخيب ظني دا و يجنب بلدنا كل شر .
.

بالشفا