وقفنا المرة اللى فاتت عند الحرب اللى دارت بين مهلائيل النبى و بين جيش الشياطين والغيلان .. وقولنا ان الغيلان انقرضت بعدها لإن جيش الانس قدر يخلص عليهم تماما .. وقتل كثير من الشياطين و اللى تبقوا هربوا تاني لاماكن بعيدة مقدرش يوصلها البشر ..

جميل .. ايه اللى حصل بعد كدا .. مهلائيل انجب طفل اسمه ( يارد ) او ( يوارد ) .. أورثه النبوة .. لكن اشتغل بدرى اوى .. قام بأعمال النبوة فى نفس الوقت اللي كان ابوه لسة بيمارس اعمال النبوة .. السبب فى كدا ان بعد هزيمة جيش الشياطين كل اسرة من احفاد ادم لموا بعضهم وانتشروا فى الارض علشان يعمروها .. فمش معقول يبقى نبى واحد متولى المسئولية الكبيرة دى و ينتقل من مصر لاثيوبيا لمطروح لفلسطين للبنان للحجاز لليمن للعراق لايران .. فكان كل واحد منهم بيشيل مسئولية جزء معين لحد ما مرض مهلائيل واضطر ابنه النبى يارد انه يتحمل مسئولية تبليغ الرسالة للعالم كله ..

المشكلة اللى قابلت سيدنا يارد انه تولى النبوة فى فترة حرجة جدا .. الفترة اللى بدأ فيه ابناء شيث ينقضوا العهود .. لإن ادم كان اخد عهد على اولاده انهم مينزلوش الارض اللى فيها ابناء قابيل .. كذلك شيث من بعده اخد عهد على اولاده مينزلوش الارض اللى فيها ابناء قابيل .. وهكذا .. فضل كل نبى ياخد عهد على جيله انهم مينزلوش ارض قابيل .. لكن فى فترة نبوة يارد ناس منهم نزلت ارض ابناء قابيل ودى كارثة .. دول خالطوا قوم يا كفار يا مجرمين وبيستهينوا بالدماء .. القتل عندهم كان زى لعب البلاى ستيشن كدا ..مش كدا وبس .. دول كمان اخترعوا عبادة الاصنام .. وصنعوا اصنام وعبدوها .. اصنام لجدهم الاكبر آدم .. وهنا نقدر نقول ان دى اول مرة يعبد فيها صنم فى التاريخ .. بعدها قرر يارد انه ميروحلهمش ارض ابناء قابيل علشان يستردهم وينصحهم مينزلوش الارض دى تانى ويحافظوا على العهد .. قال يتحرقوا بجاز وانا انجو بنفسي .. وعايز اقولك ان دا المنطق اللى انت المفروض تمشى عليه فى حياتك .. اوعى تقدم مساعدة دينية لحد لو هيكون في تقديمها خطر على دينك .. مثلا تلاقى واحد ميعرفش حاجة عن الانجيل .. يقراله كلمتين على اى منتدى وياخد مقلب فى نفسه ويقول انا هعمل مناظرات مع قساوسة .. يدخل يناظرهم ياخد على دماغه و يشك فى ايمانه وممكن يتحول خالص عن الملة .. كذلك الشيعة .. فيه شباب كتير ميعرفوش حاجة عنهم غير كام مقالة قرأوها وبيدخلوا نفسهم فى مناظرات ونيلة .. مفكرينها فهلوة لكنها فى الحقيقة علم .. حتى انت لو ليك صديق فاسق مثلا وانت التزمت .. لو حسيت انه هو اللى هيجرك للبلاوى اللى بيعملها مش انت اللى هتقدر تجره للطاعة والتوبة .. ابعد عنه وانجو بدينك .. دا دين مش دنيا .. لو بتغامر بحاجة دنيوية هقولك ماشى .. لكن حاجة تدخلك جنة او نار فلا وألف لا ..

دينا .. ام سيدنا يارد شافت بنت اسمها ( بركة ) عجبتها اوى .. فخطبتها ليارد واتجوزها وانجب منها طفل عبقرى اسمه ( أخنوخ ) .. أخنوخ دا بقى يا سيدي اول صعيدي فى التاريخ .. كان بيسكن جبال الأقصر .. ودا بقى يا سيدي اللى اخترع اجمد واهم واعظم اختراع فى التاريخ .. ومفيش اى اختراع حصل او هيحصل لسة يضاهي اختراعه فى عظمته .. عارف اخترع ايه ؟؟ اخترع الكتابة .. لولا الكتابة مكناش هنقدر ندون العلوم و ندرسها ولا كنا هنقدر نوصل لاختراعات معقدة ولا كمبيوتر ولا حتى عربية لعبة .. دانت لما تيجي تحل مسألة تفاضل على ما توصل لنهايتها بتكون نسيت البداية كانت بتتكلم عن ايه .. لكن بنظرة عين واحدة على اللى كتبته بتسترجع تاني كل المعلومات المدونة ..
استمرت مشكلة ابناء شيث اللى نقضوا العهد و نزلوا ارض ابناء قابيل .. كانوا بيروحوا ارض ابناء قابيل يلاقوا هناك الدنيا مليطة .. اى واحد عايز اى واحدة بيحصل عليها ببساطة .. مفيش جواز و مفيش عورات مصانة .. بيشربوا خمور وبيقيموا حفلات رقص وبغاء .. إلخ .. فكل ما كانت مجموعة من ابناء شيث تروح هناك ترجع لاهلها تانى علشان يحكولهم عن العز اللى كانوا عايشين فيه ويغووهم علشان يروحوا معاهم ويتمتعوا .. وفعلا يوم بعد يوم الاعداد اللى بقت تروح عند ابناء قابيل زادت بشكل بشع .. وابناء قابيل هايصين .. لإنهم مش لوحدهم هيدخلوا النار وكمان اللى بييجي من ابناء شيث بييجي والخير معاه .. اكل ومية و حاجات حلوة من اللى محرومين منها ..

وهنا بقى قرر أخنوخ انه ياخد موقف علشان يمنع المهازل دى .. استدعى جيش مهلائيل اللى حارب بيه جيش الجن و الغيلان وقالهم يلا نطلع طلعة على ارض قابيل نعلم عليهم ونرجع .. وبكدا كانت اول مرة فى تاريخ البشرية تحصل حرب بين جيشين من البشر .. كذلك اول مرة فى تاريخ الديانات يحصل فيها جهاد فى سبيل الله .. أخد اخنوخ جيشه وطلع على العراق .. تحديدا مدينة الكوفة حاليا .. وتمركز جيشه وبدأ يعمل هجمات متفرقة على جيش ابناء قابيل اللى كان موجود فى ايران .. طاااااااخ طيييييييييخ طوووووووووخ .. قتل منهم كتير .. أسر منهم كتير .. والأسرى دول اصبحوا عبيد عند المسلمين الموحدين بالله .. اتباع النبى أخنوخ .. وهنا برضو نقدر نقول ان دى اول مرة يسترق فيها انسان فى التاريخ .. دى بداية الرقيق ( العبيد ) ..

لما كان اخنوخ فى الكوفة .. علم بعض العراقيين الكتابة .. علشان كدا تلاقى الحضارة الاشورية من اقدم الحضارات فى التاريخ .. بس جت قبلها الحضارة المصرية لإنها اصلا مهد مخترع الكتابة ( أخنوخ ) .. رجع تاني أخنوخ الاقصر بعد ما فرض سيطرته من جديد .. وهنا بقى ربنا وهبه عدة هبات كجزاء على الجهاد اللى جاهده فى سبيل الله .. مكافأة عظيمة جدا .. علمه الخياطة .. فكان أول واحد فى تاريخ البشرية يصنع قماش ويقصه ويعمل منه جلباب وسروال و غيرهم .. وكمان علمه الحساب .. ودى حاجة عظيمة جدا جدا جدا وكانت حاجة فرقت اوى الفراعنة عن غيرهم من اصحاب الحضارات التانية .. وكمان وهب له علم جده أنوش فى الفلك و مسير الكواكب والنجوم .. وزاد عليه كمان انه علمه اسمائهم .. فعرف ان التابع دا اسمه قمر .. والنجم دا اسمه شمس .. والنقطة اللى بتلمع دى اسمها كوكب الزهرة .. وبرضو دا سبب تفوق المصريين القدماء فى علم الفلك .. علشان كدا متستغربش من ان الاهرامات مرصوصة بنفس رصة النجوم فى السماء .. او ان في معبد ابو سمبل الشمس كل سنة بتتعامد مرتين على تمثال رمسيس التاني .. مرة فى اليوم اللى ولد فيه .. ومرة فى اليوم اللى تولى فيه الحكم !! وطول السنة الضوء مبيوصلش له اصلا .. كل دا عرفوه منين ؟؟ من علم أخنوخ اللى نقله لأهله وعشيرته من الصعايدة الجامدين اوى ..

هقولك حاجة كمان غريبة اوى .. بس قبل ما اقولها هعرفك بمين الرائع اللى اسمه اخنوخ دا .. اخنوخ دا بقى يا سيدي هو نفسه سيدنا ( إدريس ) .. وبعض العلماء قالوا ان سيدنا ادريس هو نفسه سيدنا إلياس .. وكمان هو نفسه ( هرمس ) بتاع اليونانيين .. وهو نفسه الكاتب الجالس القرفصاء اللى كلنا عارفيه زى ما رجع كتير من المؤرخين الميثولوجيين ..
إلعبببببببببببب .. دى الحكاية إحلوت اوى .. أقولك بقى الحاجة الغريبة ؟؟ علماء الميثولوجي وكتير من المؤرخين قالوا ان سيدنا إدريس هو اللى بنى الهرم الاكبر وجمع فيه كل العلوم اللى يعرفها .. فتلاقى تصميم الهرم الاكبر محكم جدا ( حسابيا ) .. ومرتبط جدا بالكواكب والنجوم ( فلكيا ) .. وفيه خصائص رهيبة .. تعرف مثلا انك لو جبت موس حلاقة بارد .. استخدمته انت لحد ما بقى بارد مبيحلقش .. وحطيته فى مركز الهرم هيرجع شارب تاني .. هيرجع حاد تاني وتقدر تحلق بيه مرة تانية ؟!! دا مجرد مثال من المعجزات بتاعة الهرم .. وفيه علم كامل اسمه علم الهرميات حاليا بيدرس الخصائص الرهيبة للشكل الهرمي ..

انتقلت العلوم دى كلها من ( الصعايدة ) للعالم كله فيما بعد عن طريق الانبياء و حركة التجارة اللى ازدهرت بعد ما انتفع المصريين بالعلوم التطبيقية .. فبقوا يصنعوا ملابس وبقوا عارفين مواعيد الفيضان وازاى يعملوا خزانات فى الأرض علشان يخزنوا مية النيل ويستخدموها تانى فى موسم الجفاف .. واتعلموا فنون مختلفة زى النحت والعمارة .. برعوا جدا فى الهندسة .. وغيرها من العلوم .. كمان كان البشر بييجوا من كل انحاء العالم فى بعثات منظمة لمصر علشان يتعلموا مننا كل العلوم دى .. وبرضو دى كانت اول مرة التاريخ البشري يعرف رحلات الابتعاث ..

وبكدا تكون انتهت حلقتنا النهاردة ..المرة الجاية هنستكمل حدوتة سيدنا إدريس لإنها مهمة اوى .. هنعرف شكل الدول زمان كان عامل ازاى وهنفهم ليه الفراعنة والأشوريين و الصينيين و اليونانيين كانت عندهم صفات مشتركة فى شكل الدولة والسلطات .. يارب تكون حلقة النهاردة عجبتكم