نظام تشغيل SphinUX المصري
.
فى البوست اللى فات لما قلت دى فرصة لشباب حاسبات ومعلومات انهم يشتغلوا على انظمة تشغيل وان شكل السوق هيتغير .. كانت معظم ردود الفعل مأساوية .. فكان لازم احكي حدوتة SphinUX ..
.
نظام التشغيل SphinUX اشتغل عليه تيم من الاسكندرية سنة 2011 وانتهوا منه سنة 2013 ..
النظام بيعتمد على 3 انوية مختلفة حققوا دمج بينها للوصول لافضل خرج ممكن لمعمارية النظام .. نواة لينكس . نواة هيرد . نواة LSX ودى نواة قام بتطويرها الفريق ..
هدفهم من الدمج دا تحقيق شىء من الاستقلالية .. بالرغم من انهم كانوا ممكن يبنوه بالكامل على نواة لينكس ويمشوا مع التيار ..
.
النظام من الناحية التقنية كان يقدر يكون بديل للويندوز لمستخدمين كتير .. بديل مجاني زى لينكس .. لكن اسهل فى التعامل بمراحة وله GUI شبيهة بالويندوز..
واللى مضطر لويندوز بسبب بعض البرمجيات ممكن يعمل زيي ويسطبه جنب ويندوز .. انا مسطب لينكس جنب ويندوز وتقريبا مبستخدمش ويندوز الا فى حالة استخدام سوليد ووركس او تسجيل محاضرة .
.
النظام سريع بشكل مذهل .. بيحتاج رام ( ربع جيجا ) .. لو عندك اكتر من كارت شاشة تقدر تختار بينهم من غير ما تريستارت الكمبيوتر .. وكمان مزود بحزمة ضخمة من البرامج .. محررات نصوص .. فيديو .. صور .. ملفات صوتية .. برامج للاطفال واسلاميات ..
.
ميزة كمان فيه انه بيدعم البرمجيات ذات الانوية 32 و 64 بت فى وقت واحد .. مش محتاج تسطب نسخة خاصة بالـ 32 ولا نسخة خاصة بالـ 64 .. ومبيحتجش انك تعرف الدرايفرات ..
.
المشكلة فى السيستم ان الفريق بالرغم من مجهوده العظيم الا انه محتاج حد متخصص امن معلومات .. لو كان اعتمادهم على لينكس فقط مكانوش هيحتاجوا لكدا .. لكن عملية التهجين اللى حصلت خلفت وراها مجموعة لا بأس بها من الثغرات ملحوظة فى السيرفر بتاعهم مش فى التوزيعة نفسها.. دى مشكلة ممكن تتعالج .. مش مشكلة تخلينا نقول ان السيستم كله ملوش لزمة !!
.
لحد النهاردة انا شايف ان الحائل دون انتشار السيستم دا فى المقام الاول شكل وطبيعة السوق .. اللى اتغيروا امبارح .. بالرغم من ان فيه تراجع جزئي عن القرار الا ان مجرد التهديد بحاجة زى دى كفيلة انها تمسح كل قواعد السوق القديم بأستيكة ..
.
.
بالمناسبة .. نظام اندرويد نفسه مبني على نواة لينكس ..
انا مش بقولك اعد اختراع الكرة .. انت عندك عشرميت نظام اوبن سورس تقدر تعدل عليه..
.
تبقى غلطان كدا لو مش قادر تستوعب المسئولية اللى على رقبتك .. مسئولية انك تخلصنا من التبعية ولو بشكل جزئي ..لو متخيل انك عايش علشان تحقق نجاحات شخصية بغض النظر عن حق دينك وبلدك عليك .. وانك اقصى طموحك انك تشتغل عبد ( موظف ) فى شركة من شركاتهم .. تبقى بتهين نفسك متناسى انك هتقف ادام ربنا وتسأل عن عملك كله ..
.
علمينتفعبه
