معاهد هندسة الخاصة

.
زى ما ذكرت قبل كتابة البوست .. انا مش جاي اكلمكم فى حلول .. انا جاي اوضحلكم ابعاد المشكلة وافتح عيونكم على حاجات متعرفوهاش فى الغالب .. فاللى مستني مني حلول ميكملش البوست .. واللى ناوي يقل ادبه على الطرف التاني سواء حكومي او خاص ياريت يخرج بكرامته .. قول اللى انت عايزه بس بأدب ..
.
مشكلة المعاهد الخاصة الحقيقية انها خلت العرض ( اعداد المهندسين ) اكبر بكتير من الطلب ( اعداد الوظائف ) وبالتالى نسبة البطالة ارتفعت والمرتبات تدنت .. السنة اللى فاتت بس انضم للنقابة 58 الف مهندس !!
.
طيب سبب المشكلة دى ايه ؟!
المعاهد الخاصة بدايتها كانت بانشاء معهد العاشر من اكتر من 30 سنة .. ومكنش فيه اى مشاكل وكل المعاهد المنشأة كانت بتاخد من تنسيق عالي وبيقدموا تعليم بجودة عالية لحد ما انفجرت قنبلة المعاهد بعد 2011 كنوع منحط من البيزنس ..
.
الفرصة الذهبية لاحتواء المشكلة دى كانت فى عهد م.طارق النبراوي .. بانه يرفض تسجيل خريجي المعاهد دى فى النقابة او على الاقل يحط شروط دنيا للقبول .. دا محصلش ومكنش ينفع يحصل لان مجلس النقابة فى عهده عمل كارثة كبيرة .. انه لاول مرة فى تاريخ النقابة كسر وديعة المعاشات و صرف منها على النوادي .. وبالتالى حصل عجز ضخم فى صندوق المعاشات .. يعوضه منين ؟ قبل خريجين بالهبل من الخاص .. ورفع رسوم اشتراك الخاص والحكومي لاضعاف اضعافها .. وكمان خلى برنامج الرعاية الصحية اجباري مش اختياري ..
.
طيب من ناحية تانية .. هم مين اصحاب المعاهد دى اصلا ؟!! كتير جدا من اصحاب المعاهد اعضاء مجالس النقابة والنقابة الفرعية .. علشان كدا بشوف انه من السذاجة مطالبة النقابة بإنها تقفل معاهد مملوكة للي بيديروها !!
.
اضف للكلام دا ادارة التدريب اللى فى النقابة .. وكمية البيزنس اللى بيعملوه فى الجامعات والمعاهد الخاصة اللى الطلبة فيها بيجروا ورا اى حاجة معتمدة من النقابة ( مع ان الاعتماد من النقابة ملوش اى تلاتين لزمة ) فبياخدوا كورسات بمبالغ وقدرها وبغض النظر عن المحتوي اهم حاجة الشهادة تكون مختومة بختم النقابة !!
.
طيب نيجي للناحية القانونية .. هل من حق النقابة انها ترفض قيد خريجين معهد تحت بير السلم ؟
الاجابة : لا .. ليه ؟ لان القانون رقم 66 لسنة 1974 في الباب التاني منه مادة 3 .. بيقولك عن شرط قبول العوض أن يكون حاصلا على بكالوريوس في الهندسة من إحدى الجامعات المصرية أو على درجة علمية يعتبرها المجلس الأعلى للجامعات معادلة لدرجة البكالوريوس في الهندسة .. وطبعا المجلس الاعلى للجامعات بيديهم بكالريوس هندسة ..
.
خلاصة الكلام دا ان مشكلتك مع المجلس الاعلى للجامعات لانه بيديهم بكالريوس هندسة .. ومشكلتك مع النقابة لانها مبتتحركش قانونيا لايقاف قبول اعداد هستيرية .. وطبعا ذكرنا ليه النقابة مرمي طوبتها ..
.
بعض الشباب بيقترحوا انشاء نقابة موازية .. والكلام دا بيتعارض مع القانون .. النقابة مش جمعية خيرية .. النقابة منشأة بقانون اقره مجلس النواب وهى الجهة الوحيدة الممثلة لجموع المهندسين فى مصر .. فمجرد اقتراح حل زى دا مثير للسخرية واهدار للجهود والطاقات ..
.
كمان بعض الشباب قرروا يدخلوا الانتخابات .. وحشدوا بعض من خلال فيس بوك .. فى الوقت دا قلتلهم اللى بتعملوه دا ملوش اى تلاتين لزمة وان الانتخابات بتكون انتخابات بين شركات وتحالفات .. فمثلا مهندسي شركة المية بيتم حشدهم للتصويت لمرشحهم .. مهندسي المقاولين العرب نفس الكلام .. إلخ .. وقلتلهم انهم بيتم اجبارهم على التصويت باخد حضورهم امام اللجان وبيتم اغراءهم بوعود فى حالة فوز مرشحهم .. ودا اللى شوفتوه بعيونكم فى الانتخابات اللى فاتت .. فتجربة الانتخابات كانت مخزية لابعد الحدود ومفروض كنتم تشوفوا اهل الخبرة وتعرفوا ازاى بيتم ادارة الانتخابات وبعدين تدخلوها .. حلقة جديدة فى مسلسل الجهود المهدرة ..
.
احد ابعاد المشكلة التانية هى الاستاذ الجامعي اللى بيوافق يدرس فى خاص ..
وحقيقي بنزعج جدا جدا من قلة الادب اللى بشوفها من الطلبة فى الكلام عنه .. حبيبي انت متعرفش عضو هيئة التدريس اللى بيدرسلك فى الجامعة بياخد كام .. مرتبات منحطة لواحد مفروض يلبس كويس و يسكن فى مكان كويس ويركب عربية كويسة و يدخل اولاده مدارس كويسة .. ماهو ادام الناس دكتور جامعة بقى .. فطبيعي ان دكتور الجامعة لما يلاقى انه فى حالة ( عوز ) وان دخله مش مكفي بيته انه يدور على مصدر دخل اضافى .. واى واحد بيقرأ الكلام دا لما يكون مسؤول عن بيت واولاد هيعمل زيه ولا نعيبه فى شىء.
.
من اكتر الحاجات المستفزة الكلام عن ( الغيرة على المهنة ) .. اللى هو انت ازاى مش غيور على مهنتك !! .. وكأنها واحدة من حريمي مثلا !! دا كلام فارغ بيتقال فى الافلام .. على ارض الواقع مفيش الكلام دا .. واستدعاء المصطلحات دى مثير للسخرية حقيقي وشغل عيال ..
.
بالتوازي مع كل دا بتلاقى عنصر السبوبة متواجد بقوة .. فمثلا قنبلة البوستات من نوع ( انا اعرف محامي جامد تنين وافق انه يعملنا قضية ومحتاجين نعمله توكيلات ونجمع فلوس من بعض )
.
الخلاصة .. رأيي الشخصي .. انا شايف من حق اى حد يتعلم اى حاجة هو عايزها .. وشايف ان من حق النقابة تحمي المهنة ..
مينفعش نقرب من الخريجين اللى تم تسجيلهم بالفعل .. ولا الطلبة اللى التحقوا بمعاهد خلاص ولسة متخرجوش منها .. ولا اصلا القانون هيسمح بكدا .. لكن الجهود مفروض تتوجه لتنظيم عمل المعاهد دى خلال السنين الجاية .. غير كدا اعتقد انها كلها هتبقى مساعي عبثية ..
.
.
تعديل : مشكلة الجهود المهدرة اللى حاولت اوضح عدم جدواها فى البوست انها بتملك اليأس من الطلبة وتسود الدنيا فى وشهم .. بيتعبوا كتير وفى الاخر مفيش عائد منها .. كمان الكلام عن طلبة الخاص وكأنهم اصحاب ملايين مع ان مصاريف معظم المعاهد اقل من 15000 جنيه فى السنة .. يعني اقل من تمن دروس الثانوية العامة .. و الكلام عن الواسطة اللى حقيقي مش موجودة فى السوق الا فى الشركات الحكومية اللى دخولها بمثابة انتحار .. مفيش صاحب عمل هيجامل حد ويجيب مهندس فاشل يخسره فلوس ..
.
وبالنسبة للناس اللى ميعرفونيش قبل كدا وبيسألوا.. انا حكومي .. اول دفعتي .. صاحب شركة .. واللى متابعني من زمان يعرف ان قايمة النبراوى فى الانتخابات قبل اللى فاتت طلبوني و رفضت مع انى توقعتلهم الفوز وفازوا .. وقايمة ضاحي عرضوا عليا الترشح معاهم وبرضو رفض مع توقعي الفوز ليهم وبرضو فازوا .. والبوستات القديمة موجودة من سنين .. انا مش بتاع انتخابات ومش هيبقالى يوم يد فى اى عمل نقابى لاني مش فاضيله ..
.
.
اعتقد من واجبي اقولكم .. ان علشان تطلعوا بأقل الخساير لازم تحطوا ايديكم فى ايدين بعض .. الخاص والحكومي اللى لسة بيدرسوا او اتخرجوا .. علشان تعالجوا مشكلة الاعداد السنة الجاية .. طول ما نتم بتقلوا ادبكم على بعض والله ما هتوصلوا لحاجة .. والكل متضرر حكومي وخاص ..